Tag: klientit

Urime për emërimin tuaj! Cilat janë tre prioritetet kryesore në këtë rol të ri?Faleminderit! Jam vërtet i emocionuar për këtë rrugëtim të ri. Prioriteti im i parë është përmirësimi i përvojës së klientit – duke u siguruar që realizimi i çdo porosie të jetë i thjeshtë dhe i shpejtë, e të lërë klientët tanë jo vetëm të kënaqur, por edhe besnikë ndaj Wolt. Një tjetër prioritet kyç do të jetë rritja e qëndrueshme dhe strategjike, përmes partneriteteve të duhura, pa humbur esencën vendase që e bën Wolt të veçantë. Së fundmi, jam i përkushtuar në ndërtimin e një mjedisi të fortë dhe motivues për ekipin, ku secili anëtar të ndihet i fuqizuar për të dhënë më të mirën dhe për të kontribuar në suksesin tonë të përbashkët.Çfarë e dallon tregun shqiptar dhe atë të Kosovës përsa i përket sjelljes apo pritshmërive të përdoruesve?Të dy tregjet janë energjike dhe në proces të shpejtë digjitalizimi, por secili ka karakteristika unike. Në Shqipëri, përdoruesit janë shumë të orientuar drejt komoditetit dhe i përqafojnë me shpejtësi shërbimet e reja, ndërsa në Kosovë ka një theks më të madh te besnikëria ndaj klientit dhe shërbimi i personalizuar.Në të dy vendet ekziston një pritshmëri e përbashkët për shpërndarje të shpejtë dhe të besueshme, si dhe shërbim të shkëlqyer ndaj klientit – shtylla bazë e shërbimit tonë në Wolt. Ajo që i bën gjithashtu të veçanta këto tregje është mjedisi rregullator miqësor ndaj inovacionit, që u jep kompanive si Wolt mundësinë për të funksionuar në mënyrë efektive, e për të nxitur zhvillim dhe teknologji të reja. Me popullsi të orientuar drejt teknologjisë dhe të gatshme për të provuar shërbime të reja, Shqipëria dhe Kosova po shndërrohen me shpejtësi në qendra inovacioni, të cilat ofrojnë hapësira për bizneset, partnerët shpërndarës dhe konsumatorët.Në Wolt, misioni ynë është i qartë: t’u shërbejmë komuniteteve, të mbështesim ekonomitë lokale dhe të sjellim entuziazëm përmes shërbimeve të shpejta, të përshtatshme dhe të besueshme. Shqipëria dhe Kosova janë terren i përsosur për të rritur, zhvilluar dhe lënë një ndikim pozitiv dhe afatgjatë.Si do ta vlerësonit vitin e parë të Wolt në Shqipëri? Rruga jonë në Shqipëri sapo ka filluar, por ndikimi që Wolt ka pasur brenda një viti është frymëzues. Jemi krenarë që mbështesim bizneset lokale, ofrojmë mundësi të ardhurash për qindra partnerë shpërndarës dhe sjellim vlerë të vërtetë në jetën e përditshme të përdoruesve tanë.Kemi pasur fatin të bashkëpunojmë me mbi 1,000 biznese në sektorët e ushqimit, tregjeve dhe shitjes me pakicë. Numri i përdoruesve të regjistruar tregon qartë se shqiptarët e kanë përqafuar komoditetin që Wolt sjell në jetën e tyre. Jemi gjithashtu krenarë për ndërtimin e një rrjeti me mbi 500 partnerë shpërndarës, të cilët luajnë një rol kyç në ofrimin e shërbimit të jashtëzakonshëm që klientët tanë presin.Në vetëm një vit, kemi bashkëpunuar me marka të njohura si Heb’s, Conad, Burger King dhe KFC. Këto partneritete na kanë ndihmuar jo vetëm të ndërtojmë një themel të fortë në Shqipëri, por edhe të ndihemi më të lidhur me komunitetin lokal.Një tjetër arritje e rëndësishme për Wolt ka qenë zgjerimi në sektorin e shitjes me pakicë, veçanërisht në shpërndarjen e produkteve ushqimore. Ky hap e ka kthyer Wolt në një pikë të vetme ku mund të gjesh gjithçka, duke i bërë produktet bazë lehtësisht të arritshme nga rehatia e shtëpisë. Platforma është bërë një pjesë thelbësore për shqiptarët që vlerësojnë komoditetin dhe zgjidhjet që kursejnë kohë.Ne jemi këtu për një kohë të gjatë – duke investuar në komunitete dhe duke ndërtuar një përvojë më të mirë, më të shpejtë dhe me një rrjet më të gjerë të shpërndarjes në Shqipëri.Si planifikoni ta zgjeroni praninë e Wolt në Shqipëri duke ruajtur cilësinë e shërbimit ndaj klientit?Strategjia jonë për zgjerimin e Wolt në Shqipëri bazohet në rritje të qëndrueshme. Kjo nënkupton përzgjedhjen me kujdes të qyteteve të reja ku do të trokasim, ndërtimin e bashkëpunimeve të duhura lokale dhe ruajtjen e standardeve të larta të shërbimit. Për ne është thelbësore që rritja të mos vijë në dëm të cilësisë.Jemi të përkushtuar të dëgjojmë klientët tanë dhe të përdorim eksperiencën e tyre për të përmirësuar vazhdimisht shërbimin tonë. Kjo qasje e orientuar nga klienti do të na udhëheqë në çdo hap të ri që do të ndërmarrim.Jemi zgjeruar tashmë me sukses në Durrës dhe kemi plane për zgjerim në rajone të tjera, gjithmonë duke u siguruar që nevojat lokale të plotësohen në të njëjtin nivel cilësie. Në çdo hap, fokusi ynë do të mbetet ofrimi e një shërbimi të shpejtë, të besueshëm dhe me cilësi të lartë. Rritja duhet të jetë një vazhdimësi organike e përvojës së shkëlqyer që tashmë po ofrojmë dhe ne jemi të përkushtuar që të rritemi në mënyrë që përfitimi të jetë si për klientët, ashtu edhe për partnerët tanë të biznesit.Wolt njihet për efikasitet dhe shpejtësi. Si siguroheni që këto vlera të ruhen ndërkohë që kërkesa rritet?Në Wolt, efikasiteti dhe shpejtësia janë thelbësore për shërbimin tonë, dhe ndërkohë që kërkesa rritet, jemi të përkushtuar t’i ruajmë këto vlera. Teknologjia luan një rol kyç në këtë aspekt. Ne investojmë vazhdimisht në infrastrukturën tonë për të siguruar që çdo pjesë e platformës – që nga aplikacionet për shpërndarës dhe tregtarë, deri te platforma për klientët dhe sistemet e pagesave – të funksionojë në mënyrë të harmonizuar.Përdorim qasje të bazuar në të dhëna për të optimizuar të gjithë procesin e shpërndarjes. Analizat në kohë reale na ndihmojnë të menaxhojmë shpërndarjen e partnerëve tanë korrierë, të parashikojmë kërkesat në orët e fluksit dhe të bëjmë rregullime për të ruajtur performancën. Duke kombinuar teknologjinë me njohjen e tregut lokal dhe fleksibilitetin operacional, sigurojmë që shpejtësia dhe efikasiteti të mbeten në thelb të gjithçkaje që bëjmë.Çfarë roli luajnë teknologjia dhe inovacioni në përvojën e klientit në Wolt?Teknologjia dhe inovacioni janë themeli i përvojës së klientit në Wolt dhe na veçojnë në një treg shumë konkurrues. Që nga momenti kur klienti hap aplikacionin tonë deri në dorëzimin e porosisë, çdo hap është i ndërtuar me teknologji inteligjente dhe të orientuar drejt klientit.Dizajni intuitiv i aplikacionit, ndjekja në kohë reale e porosisë dhe mbështetja 24/7 në aplikacion sigurojnë një përvojë të qetë, transparente dhe të besueshme.Inovacioni gjithashtu luan rol kyç në personalizimin e shërbimeve tona. Duke analizuar preferencat dhe sjelljen e klientëve, ne arrijmë të rekomandojmë produkte dhe shërbime që përputhen me nevojat individuale. Shërbime të reja si Wolt+ – programi ynë i besnikërisë – ofrojnë një përvojë më të mirë për konsumatorët dhe tregtarët. Në aspektin operacional, përdorim inteligjencën artificiale dhe të dhënat në kohë reale për të optimizuar rrugët dhe shpërndarjen e partnerëve korrierë, duke siguruar efikasitet edhe në orët më të ngarkuara. Të gjitha këto bashkohen për të krijuar një përvojë të personalizuar që i bën klientët tanë të rikthehen vazhdimisht.Çfarë e diferencon Wolt nga platformat e tjera të shpërndarjes në treg? Wolt diferencohet përmes një kombinimi unik të orientimit ndaj klientit, teknologjisë së avancuar dhe angazhimit të fortë ndaj partneriteteve lokale. Ne nuk fokusohemi vetëm në shpërndarjen e ushqimeve apo produkteve, por në krijimin e një përvoje të besueshme dhe të harmonizuar për klientët dhe tregtarët, duke fuqizuar edhe shpërndarësit me mjetet dhe mbështetjen e duhur.Krijojmë teknologji që lidh njerëzit, të cilët kërkojnë të porosisin me ata që duan të shesin apo të shpërndajnë. Në këtë mënyrë, duam të sjellim gëzim, thjeshtësi dhe mundësi të ardhurash në çdo lagje të botës.Infrastruktura jonë teknologjike lidh klientët me një shumëllojshmëri biznesesh – nga supermarkete dhe farmaci, te dyqanet e luleve, elektronikë dhe restorante – duke ofruar shpërndarje brenda pak minutash.Me pak fjalë, Wolt nuk është thjesht një platformë shpërndarjeje; është një shërbim i bazuar në teknologji që transformon mënyrën se si njerëzit porosisin online, duke ndërtuar njëkohësisht partneritete të forta me bizneset lokale.Cili është një mësim i vlefshëm nga rolet tuaja të mëparshme që e sillni dhe në këtë rol?Një nga mësimet më të vlefshme që kam marrë gjatë kohës në telekomunikacion është se besnikëria e klientit ndërtohet mbi vlerën, jo vetëm mbi çmimin. Ofertat mund të tërheqin përdorues, por ajo që i mban ata është cilësia e shërbimit dhe besimi. Kjo vlen po aq edhe në Wolt. Çmimet konkurruese ndihmojnë, por suksesi i vërtetë qëndron në krijimin e një përvoje të qëndrueshme dhe të besueshme për klientët.Gjithashtu, të jemi të sinqertë – qofshin pako interneti apo sushi – nëse diçka shkon keq, klienti do ta shprehë menjëherë. Prandaj, shërbimi proaktiv dhe komunikimi i qartë janë të panegociueshme.A mund të ndani disa sfida specifike që Wolt ka përballuar në Shqipëri dhe Kosovë, dhe si i ka tejkaluar kompania ato?Në të dy tregjet, si në çdo treg të ri, jemi përballur me sfida të ndryshme logjistike dhe operacionale – që nga përfshirja e partnerëve deri te optimizimi i shpërndarjes në zona të ngarkuara. Jemi përshtatur duke punësuar ekipe të forta lokale që njohin terrenin, duke investuar në trajnimin e shpërndarësve dhe duke qenë të shpejtë në zgjidhjet teknologjike.Teknologjia jonë ka qenë thelbësore në këtë përshtatje – duke përmirësuar vazhdimisht zgjidhjet tona për të adresuar çështje si optimizimi i rrugëve, kohët e dorëzimit dhe komunikimi me klientët e partnerët. Gjithashtu, dëgjimi aktiv ndaj ndarjes së përvojës nga përdoruesit dhe partnerët lokalë na ka ndihmuar të përshtasim shërbimet tona dhe të përmirësojmë qasjen tonë, në mënyrë që të mbetemi gjithmonë në linjë me zhvillimet e tregut.Cilat janë hapat e ardhshëm ku Wolt do të fokusohet në vitet në vijim?Në të ardhmen, do të fokusohemi në zgjerim më të thellë në Shqipëri dhe Kosovë, duke hyrë në qytete të reja dhe duke shtuar më shumë shërbime. Edhe pse aktualisht bashkëpunojmë me restorante, dyqane ushqimore dhe biznese të tjera me pakicë, synojmë ta zgjerojmë këtë ekosistem edhe më shumë – për t’u ofruar klientëve më shumë larmi dhe lehtësira.Në të njëjtën kohë, do të vazhdojmë të përmirësojmë përvojën e shpërndarësve dhe të përmirësojmë platformën tonë për t`u shërbyer më mirë përdoruesëve dhe partnerëve tanë.Jemi të përkushtuar për rritje afatgjatë – duke ndërtuar një përvojë shpërndarjeje më efektive, më të shpejtë dhe më të këndshme, gjithmonë me synimin për të lënë një ndikim pozitiv në komunitetet lokale.Ky është artikull ekskluziv i Revistës Monitor, që gezon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetm duke cituar “Revista Monitor” shogëruar me linkun e artikullit origjinal.