Arsenal-Bayern nuk është një ndeshje e zakonshme. Për çfarë përfaqësojnë të paktën sot këto dy skuadra, pozicionin e tyre në krye të renditjes së Champions dhe dominimin e madh në kampionatet respektive, mund të konsiderohet pa frikë ndeshja me pritshmërinë më të lartë në këtë pjesë të parë të edicionit të ri në Ligën e Kampionëve.
“Topçinjtë” nuk janë një rastësi. Londinezët janë vazhdimësia e sezonit të kaluar në Europë, teksa u eliminuan me shumë vështirësi nga ata që më pas do të shpalleshin kampionë, PSG në gjysmëfinale. Këtë vit janë edhe më të konsoliduar, por edhe më të fortë në organikë me emra si Gyökeres dhe Eze.
Kanë organikë të bollshme, aq të bollshme saqë për Artetën nuk është problem nëse mungon sot Gyökeres, apo nëse emra të tjerë si Kai Havertz apo Gabriel Jesus vijnë nga dëmtimi gjithashtu. Në 16 ndeshje deri më tani kanë marrë 13 fitore, 2 barazime dhe një humbje, duke shënuar jo pak por 39 gola.
Nga ana tjetër, Bayerni është një makineri perfekte. Ashtu si topçinjtë, kanë siguruar 4 fitore në 4 ndeshje në Champions. Forcën e tyre e kanë provuar deri tani gjigandë si Chelsea e mbi të gjithë PSG. Kanë një rekord pozitiv prej 17 fitoresh dhe 1 barazimi në 18 ndeshje.
Nuk i ka mundur askush dhe shkojnë në Londër për të treguar të gjithë potencialin e tyre, ndonëse pa yllin kolumbian Luis Díaz apo dy yje të tjerë si Davies dhe Musiala.
Mjaftojnë këto elemente dhe yjet në fushë për të shijuar sonte në Vizion Plus një duel klasi, të denjë për turneun më të bukur në botë, UEFA Champions League.
