Ministri i Tregtisë i Kinës Wang Wentao u takua të martën në Pekin me Drejtorin Ekzekutiv të Airbus, Guillaume Faury, sipas një deklarate të publikuar nga Ministria e Tregtisë.
Wang vuri në dukje se vitet e fundit tregu i Kinës ka vazhduar të zgjerohet, duke u bërë tregu i dytë më i madh i konsumit në botë, si edhe tregu i dytë më i madh i importeve.
Vendi do të përparojë më tej modernizimin kinez dhe do të nxisë forca të reja prodhuese cilësore, tha ministri, duke shtuar se kjo do të krijojë mundësi të mëdha për kompanitë e huaja, përfshirë Airbus.
Airbus përuroi të mërkurën në Tianjin në veri të Kinës, linjën e saj më të fundit të montimit përfundimtar për avionët e familjes A320, e dyta e këtij lloji në Kinë por edhe në mbarë Azinë.
Wang shprehu shpresën se Airbus do ta shfrytëzojë lançimin e linjës së fundit të montimit, si një mundësi për të thelluar bashkëpunimin me Kinën. Gjithashtu për të ofruar më shumë produkte dhe shërbime të aviacionit me cilësi të lartë.
Me unilateralizmin dhe proteksionizmin që paraqesin sfida për rendin ekonomik dhe tregtar ndërkombëtar, Wang tha se pala kineze do të vazhdojë të shfrytëzojë sa më mirë mekanizmin e tryezës së rrumbullakët për kompanitë e huaja, t’i adresojë në mënyrë aktive shqetësimet e Airbus-it në lidhje me operacionet e saj në Kinë, si edhe të punojë së bashku për të mbrojtur stabilitetin e zinxhirëve globalë industrialë dhe të furnizimit.
Faury tha se Airbus ka besim në ekonominë kineze dhe në zhvillimin e sektorit të aviacionit civil të Kinës.
Ai shtoi se kompania është e përkushtuar për të thelluar praninë në tregun kinez dhe për të kontribuar në bashkëpunimin ekonomik dhe tregtar mes Kinës dhe Francës si edhe mes Kinës dhe BE-së.
Tag: kinës
-
Airbus thellon praninë në tregun kinez
-
Raporti britanik: Kina po zgjerohet me shpejtësi në Ballkanin Perëndimor, Serbia epiqendra e ndikimit
Raporti “Rikthimi i udhëheqjes britanike në Ballkanin Perëndimor”, i përgatitur në kuadër të Procesit të Berlinit dhe njëri prej autorëve të të cilit është edhe ish-sekretari i përgjithshëm i NATO-s, Lord George Robertson, Mbretëria e Bashkuar paralajmëron se ndikimi i Kinës në Ballkanin Perëndimor po rritet me ritme të shpejta përmes asaj që autorët e quajnë një “Perde mëndafshi” të re – një version modern i “Rrugës së Mëndafshit” që shtrihet nga rajoni drejt Evropës përmes vendeve si Hungaria dhe Greqia.
Sipas raportit, Serbia është shndërruar në partnerin kryesor të Pekinit në rajon, duke zhvilluar marrëdhënie të avancuara politike, ekonomike dhe ushtarake me Kinën. Presidenti kinez Xi Jinping ka vizituar Beogradin, ndërsa presidenti serb Aleksandër Vuçiç ka marrë pjesë në paradë ushtarake në Kinë, duke konfirmuar, sipas dokumentit, një aleancë në rritje.
Raporti thekson se bashkëpunimi ushtarak mes dy vendeve ka hyrë në fazë të re, me stërvitjen e parë të përbashkët të forcave speciale dhe me furnizime të konsiderueshme nga industria kineze e mbrojtjes.
Edhe skandali që çoi në protesta masive në Serbi, shembja e çatisë së një stacioni treni në Novi Sad ku humbën jetën 14 persona, ka, sipas raportit, “dimension kinez”, pasi projekti ishte pjesë e një investimi të madh të Pekinit në infrastrukturën hekurudhore të Serbisë.
Mbështetja e Kinës po zgjeron ndikimin e saj ekonomik në gjithë rajonin, me rreth 90% të kredive kineze në Ballkanin Perëndimor të përqendruara vetëm në Serbi. Projekte të ngjashme infrastrukturore janë kushtëzuar edhe në vende të tjera, si autostrada Bar–Boljare në Mal të Zi, ku një kredi afro 1 miliard dollarë nga Exim Bank e Kinës e futi vendin në krizë borxhi, duke hapur rrezikun e “diplomacisë së kurthit të borxhit”.
Pekini po fuqizon gjithashtu “Rrugën Dixhitale të Mëndafshit” përmes kompanisë Huawei dhe po zgjeron ndikimin mediatik në rajon, duke mbushur boshllëkun e krijuar nga rënia e mbështetjes amerikane në fushën e medias dhe informacionit.
Raporti paralajmëron së fundi se rritja e varësisë ekonomike, ngadalësimi i programeve perëndimore të zhvillimit dhe lodhja nga procesi i anëtarësimit në BE po krijojnë terren të përshtatshëm që Kina, në të ardhmen e afërt, ta shndërrojë ndikimin e saj ekonomik në fuqi politike dhe gjeostrategjike në Ballkanin Perëndimor. -
Australia akuzon Kinën: Keni kryer veprime të rrezikshme ajrore mbi Detin e Kinës Jugore
Australia ka akuzuar një avion luftarak kinez për kryerjen e një manovre të rrezikshme dhe joprofesionale, pasi ky i fundit lëshoi fishekzjarrë pranë një avioni patrullues të Forcës Mbrojtëse Australiane mbi Detin e Kinës Jugore.
Sipas Ministrisë australiane të Mbrojtjes, incidenti ndodhi të dielën dhe përfshiu një avion kinez Su-35, i cili u afrua në mënyrë agresive ndaj një P-8A Poseidon të Australisë. Autoritetet konfirmuan se nuk pati dëmtime në avion dhe ekuipazhi mbeti i padëmtuar.
Nga ana tjetër, Kina akuzoi Australinë për “hyrje të paligjshme” në hapësirën ajrore kineze dhe deklaroi se avioni australian u desh të “dëbohej” si masë për të mbrojtur sovranitetin.
Ky është incidenti i fundit në një seri përplasjesh mes dy ushtrive në rajon, ku pretendimet territoriale të Kinës mbivendosen me interesat e vendeve të tjera, përfshirë partnerët e Australisë si SHBA dhe Mbretëria e Bashkuar.
Ngjarja ndodhi në të njëjtën kohë kur kryeministri australian Anthony Albanese ishte rrugës për në Uashington për një takim me presidentin amerikan Donald Trump, me fokus në AUKUS – marrëveshjen strategjike të mbrojtjes mes SHBA, Australisë dhe Mbretërisë së Bashkuar.
Top Channel
-
Trump ia bën të qartë Kinës: Do nënshkruajë një marrëveshje tregtare, ndryshe do të përballet me tarifa të reja
Presidenti amerikan Donald Trump deklaroi të hënën se beson që Kina do të ulet në tryezën e negociatave dhe do të arrijë një marrëveshje tregtare me Shtetet e Bashkuara, duke paralajmëruar gjithashtu tarifa të reja nëse kjo nuk ndodh.
Në një konferencë për shtyp, Trump u pyet nga një gazetar mbi pasojat e mundshme nëse “Kina nuk luan drejt” në tregtinë globale. Ai u përgjigj se tarifat mbeten një armë e fuqishme ekonomike në duart e Amerikës dhe se është i bindur që Pekini do të zgjedhë rrugën e bashkëpunimit.
“Ata do të na paguajnë qindra miliona dollarë në vit nëse nuk bëjnë një marrëveshje. Por unë besoj se do të bëjnë”, tha Trump, duke shtuar se ka një marrëdhënie të mirë personale me presidentin kinez Xi Jinping.
Presidenti theksoi se Kina “na ka trajtuar me shumë respekt”, por nuk e përjashtoi mundësinë e vendosjes së tarifave të reja ndaj mallrave kineze nëse negociatat dështojnë.
Deklarata vjen në një kohë kur tensionet mes Kinës dhe fqinjëve të saj janë përshkallëzuar, veçanërisht në Detin e Kinës Jugore, ku përplasjet me forcat australiane dhe të tjera rajonale kanë tërhequr vëmendjen ndërkombëtare.Top Channel
-
Robotët marrin vëmendjen qendrore në Panairin e Kantonit
Panairi i Importit dhe Eksportit të Kinës, u hap të mërkurën e kaluar në qytetin Guangzhou të Kinës jugore, duke tërhequr një rekord prej më shumë se 32,000 ekspozuesish, njofton Xinhua.
Është hera e dytë që panairi ka paraqitur një zonë të robotëve të shërbimit, e cila këtë vit ka bashkuar 46 kompani kryesore të robotëve të shërbimit për të shfaqur produkte të teknologjisë së fundit.
Një raport i publikuar nga Federata Ndërkombëtare e Robotikës, një organizatë jofitimprurëse me seli në Frankfurt, tregon se Kina kishte mbi 2 milionë robotë industrialë në funksion deri në fund të vitit 2024, duke u renditur e para në nivel global. Robotët kinezë, vëren raporti, po demonstrojnë perspektiva të gjera aplikimi në fusha të tilla si automobilat, elektronika, makineritë metalike, shërbimet shtëpiake, mjekësia dhe arsimi, duke kaluar gradualisht nga laboratorët në linjat e prodhimit të fabrikave, dhe më pas në shtëpitë e njerëzve në vende të ndryshme të botës.
Sipas të dhënave të publikuara në Konferencën Botërore të Robotëve (WRC) në Pekin, industria e robotikës e Kinës gjeneroi gati 240 miliardë juanë (rreth 33.4 miliardë dollarë amerikanë) të ardhura në vitin 2024. Në gjysmën e parë të vitit 2025, prodhimi i robotëve industrialë në vend arriti në 370,000 njësi. Industria kineze e robotikës po sheh qartë një rritje të fuqishme si në të ardhura ashtu edhe në aplikim. -
Si plani 5-vjeçar i Kinës 2026-2030 mund të ndryshojë ekonominë botërore/ Çfarë po diskutohet këtë javë në Pekin
Liderët më të lartë të Kinës po mblidhen këtë javë në Pekin për të vendosur mbi objektivat kryesore dhe aspiratat e vendit për pjesën e mbetur të dekadës.
Çdo vit, ose çdo pak vite, organi më i lartë politik i vendit, Komiteti Qendror i Partisë Komuniste Kineze, zhvillon një javë mbledhjesh, të njohura si Plenum.
Vendimet që do të merren në këtë Plenum do të formojnë më pas bazën e Planit të Pestë Pesëvjeçar të Kinës, udhërrëfyesi që ekonomia e dytë më e madhe në botë do të ndjekë midis viteve 2026 dhe 2030, shkruan BBC.
Plani i plotë nuk do të publikohet deri vitin e ardhshëm, por zyrtarët pritet të japin sinjale mbi përmbajtjen e tij të mërkurën, ndërsa në të kaluarën, më shumë detaje janë bërë publike brenda një jave pas mbledhjes.
“Politikat perëndimore funksionojnë mbi ciklet zgjedhore, por politika kineze bazohet në cikle planifikimi,” thotë Neil Thomas, studiues i politikës kineze në Asia Society Policy Institute. “Planet Pesëvjeçare tregojnë se çfarë synon Kina të arrijë, sinjalizojnë drejtimin që udhëheqësit duan të ndjekin dhe orientojnë burimet e shtetit drejt këtyre rezultateve të paracaktuara.”
Edhe pse në dukje mund të duket e zakonshme një javë mbledhjesh burokratike, historia ka treguar se vendimet e marra gjatë këtyre plenumeve kanë ndikime të mëdha globale.
Ekspertët theksojnë se Planet Pesëvjeçare të Kinës shpesh kanë reshaped ekonominë botërore, duke ndikuar në tregjet ndërkombëtare, investimet dhe linjat e politikave globale.Top Channel
-
Zv/Kryeministri i Kinës zhvillon video-telefonatë me Sekretarin e Thesarit të SHBA-së dhe përfaqësuesin tregtar për çështjet ekonomike
Zv/Kryeministri i Kinës He Lifeng, gjithashtu drejtuesi kinez për çështjet ekonomike e tregtare Kinë-ShBA, të shtunën zhvilloi një telefonatë video me Sekretarin e Thesarit të ShBA-së Scott Bessent dhe Përfaqësuesin e Tregtisë së ShBA-së Jamieson Greer, gjatë së cilës të dy palët ranë dakord të mbajnë një raund të ri konsultimesh ekonomike e tregtare sa më shpejt të jetë e mundur.
Palët zhvilluan shkëmbime të sinqerta, të thelluara dhe konstruktive për zbatimin e konsensusit të rëndësishëm të arritur nga dy krerët e shteteve gjatë bisedimeve të tyre telefonike në fillim të këtij viti, si dhe për çështjet kyçe në marrëdhëniet dypalëshe ekonomike e tregtare. -
Kush po e fiton garën për Inteligjencën Artificiale?
Kina i ofron botës një vizion të qeverisjes së IA-së pa vlera dhe të bazuar te rezultatet, shkruan The Economist
Në vitin 1995, gjatë një epoke të artë për globalizimin, një profesor biznesi nga Berkeley shpiku një term optimist: “efekti Kaliforni”.
Kur kompanitë në tregjet e pasura përballen me konkurrencë të re nga rivalët e huaj, argumentoi David Vogel në librin e tij “Trading Up: Consumer and Environmental Regulation in a Global Economy”, ato nuk ulin domosdoshmërisht standardet, siç mund të parashikonin pesimistët.
Përkundrazi, rregullat strikte në një treg konkurrues mund të nxisin një garë drejt majës, përfshirë edhe juridiksione fqinje.
Një shembull i qartë lidhet me standardet e rrepta të emetimit të motorëve të vendosura nga shteti i Kalifornisë, tregu më i rëndësishëm i makinave në SHBA.
Në vend që të prodhonin motorë të ndryshëm për shtete të ndryshme, për të përfituar nga ato me rregulla më të lirshme, shumë kompani zgjodhën që të gjitha makinat e tyre t’i bënin sipas standardeve të Kalifornisë, shkruan The Economist.
Në vitin 2012, Anu Bradford nga Universiteti Columbia shpiku atë që e quajti “efekti Bruksel”.
Ky ishte homazhi i saj për fuqinë e Bashkimit Europian në hartimin e rregullave, një treg gjigant konsumator i lidhur nga rregulla të shkruara në Bruksel.
Kompanitë shumëkombëshe mund të shprehin pakënaqësi nga rregulloret e ngurta të BE-së, ose të zemërohen kur gjobiten nga burokratët europianë. Por në mënyrë të vazhdueshme, ato i kanë pranuar standardet e BE-së në mbarë botën.
Sot qeverisja globale e tregtisë nuk po kalon një epokë të artë. Megjithatë, ekonomitë më të mëdha — SHBA-ja, Kina dhe BE-ja — mbeten shumë të interesuara për të vendosur standarde globale.
Dhe për hartuesit e rregullave në vitin 2025, formësimi i qeverisjes së Inteligjencës Artificiale (IA) është çmimi më i madh nga të gjithë.
Deri këtë vit, pak do të kishin parashikuar një fitore të Kinës në atë garë, ose për shfaqjen e një “efekti Pekin”. Për shumë vende, praktika e Partisë Komuniste për rregullimin e internetit ishte një precedent frikësues. Shkëndijat e para të rregullimit të IA-së me tipare kineze nuk ishin inkurajuese.
Autoritetet ndaluan menjëherë ChatGPT, chatbotin amerikan të IA-së gjeneruese. Partia është veçanërisht e ndjeshme ndaj aplikacioneve që rekomandojnë përmbajtje.
Në vitin 2023, zyrtarët kërkuan që shërbimet e IA-së gjeneruese që mund të formësojnë opinionin publik t’i nënshtrohen një vlerësimi sigurie dhe të regjistrojnë algoritmet e tyre.
Reputacioni i Kinës për inovacion u përforcua në janar, me publikimin e DeepSeek-R1, modelin e avancuar gjuhësor (large language model, LLM), të prodhuar me një fraksion të fuqisë kompjuterike dhe mbështetjes financiare të nevojshme për rivalët amerikanë.
“Momenti DeepSeek” hodhi dyshime mbi strategjitë e qeverisë amerikane për të ruajtur epërsinë në IA duke i mohuar Kinës aksesin në gjysmëpërçuesit e avancuar.
Por suksesi teknik përballet me pengesa politike. Italia e ndaloi DeepSeek për shkak të shqetësimeve për privatësinë e të dhënave dhe Tajvani e ndaloi DeepSeek nga sistemet qeveritare, duke përmendur frikën për sigurinë.
Megjithatë, investitorët dhe zyrtarët kinezë të IA-së janë optimistë. Shteti po investon në një fushatë për të prodhuar aplikacione të lira, të aksesueshme dhe “mjaftueshëm të mira”.
Me ndihmën e energjisë elektrike të lirë dhe një fushate të brendshme propagandistike për përfitimet e IA-së, partia dëshiron që teknologjia të përdoret sa më shpejt dhe sa më gjerësisht.
Të jesh i kënaqur të renditesh pranë SHBA-së shihet si një lëvizje e zgjuar tregtare. Është gjithashtu një qasje që ka gjasa të rezonojë me shumë vende.
Dallimi me SHBA-në është i dukshëm, ku disa në Kongres e krahasojnë garën për epërsi në IA me garën për ndarjen e atomit. Në shkurt, zëvendëspresidenti J.D. Vance qortoi europianët për rregullimin e tepruar, duke deklaruar:
“E ardhmja e IA-së nuk do të fitohet duke u marrë me frikë për sigurinë.”
Të tjerë duket se ndajnë hamendësimin e Kinës, se IA është një teknologji me përdorim të përgjithshëm me rëndësi të madhe por jo apokaliptike: diçka më shumë si elektriciteti ose kompjuterët sesa si bomba atomike.
Në korrik, kryeministri i Singaporit, Lawrence Wong, u shpreh se pas shpikjes së dinamove elektrike, u deshën dekada për të gjetur përdorime industriale për të.
“Na tërheqin shumë vendet që janë liderë të teknologjive më të avancuara”, tha Wong. “Por në fakt, përparësia e madhe e teknologjisë është kur gjen zbatim të gjerë”.
Për më tepër, rregullimi i Kinës është më pragmatik dhe miqësor ndaj industrisë sesa mendojnë të huajt, argumenton një artikull nga Angela Huyue Zhang, profesore e së drejtës në Universitetin e Kalifornisë Jugore.
“The Promise and Perils of China’s Regulation of Artificial Intelligence”, botuar vitin e kaluar, katalogon se si kontrollet strikte mbi informacionin bashkëjetojnë me zbatimin e lirshëm të rregullave për privatësinë, të drejtën e autorit apo mbrojtjen e të dhënave.
Kështu, sistemet kineze të njohjes së fytyrës janë ndër më të avancuarat në botë, sepse zyrtarët u japin kompanive private sasi të mëdha të të dhënave qeveritare. Gjyqtarët krenohen publikisht se japin vendime për të përshpejtuar zhvillimin e IA-së në Kinë.
Kontroll i shoqërisë? Ka një aplikacion për këtë
Nëse një “efekt Pekin” do të përhapej një ditë, është e pamundur të nxisë një garë drejt majës. Qasja e Kinës vendos përfitimin, komoditetin dhe rendin shoqëror përpara të drejtave individuale.
Një dokument i Komisionit Europian për IA nga viti 2020 shpreh shqetësim për rreziqet e diskriminimit nga algoritmet.
Ai citon sistemet e njohjes së fytyrës që janë më pak të sakta kur skanojnë lëkurë të errët, dhe algoritmet që tregojnë paragjykim racor, për shembull kur parashikojnë nëse një person i dënuar do të kryejë një krim tjetër.
Në Kinë, diskriminimi racor është një model biznesi. Kompanitë janë kapur duke regjistruar patenta për sisteme që synojnë të identifikojnë ujgurët dhe pakicat e tjera etnike, të mbajtura prej kohësh nën mbikëqyrje të rreptë nga policia kineze.
Dokumenti i BE-së shqetësohet për punëdhënësit që përdorin IA për të gjurmuar sjelljen e punëtorëve. Në Kinë, kjo është një industri në lulëzim.
Versioni i Kinës për qeverisjen e IA-së përballet me pengesa në demokracitë liberale. Por mjaft vende të tjera kërkojnë teknologji të lira që vlerësohen vetëm nga performanca e tyre.
Kina ka edhe një avantazh tjetër.
Ajo po konkurron me një administratë Trump të hapur në synimin e saj për dominimin e IA-së dhe në përdorimin e atij monopoli për të imponuar preferencat e saj ideologjike.
Trump së fundmi kërcënoi me tarifa ndëshkuese ndaj vendeve të huaja, që kërkojnë të rregullojnë kompanitë amerikane të teknologjisë, në mënyra që atij nuk i pëlqejnë. Përsëri, SHBA-ja po i jep një dhuratë politike Kinës.
Le ta quajmë këtë “efekti Trump”./ Monitor.al -
SHBA kërcënon Panamanë me anulim vizash për lidhje me Kinën
Presidenti i Panamasë, Jose Raul Mulino, deklaroi sot se një zyrtar në ambasadën e Shteteve të Bashkuara të Amerikës ka kërcënuar me anulimin e vizave të disa zyrtarëve panamezë, ndërsa administrata e presidentit Donald Trump po ushtron presion ndaj Panamasë për të kufizuar marrëdhëniet me Kinën.
Duke folur në një konferencë shtypi javore, Mulino tha pa dhënë prova konkrete se “një zyrtar i ambasadës amerikane po na kërcënon për të marrë vizat”, duke shtuar se veprime të tilla “nuk janë në përputhje me marrëdhëniet e mira që unë dua të ruaj me SHBA-në”. Ai nuk përmendi emrin e zyrtarit.
Ambasada amerikane në Panama nuk ka dhënë ende një përgjigje zyrtare. Administrata Trump më herët ka refuzuar të komentojë për vendime të veçanta mbi vizat.
Në shtator, Departamenti i Shtetit i SHBA-së njoftoi se do të kufizonte vizat për individë që “mbajnë marrëdhënie me Partinë Komuniste të Kinës” ose “minojnë demokracinë në rajon në emër të Kinës”.
Këtë javë, SHBA-ja revokoi vizat e gjashtë të huajve që, sipas autoriteteve amerikane, kishin bërë komente përqeshëse lidhur me vrasjen e aktivistit konservator Charlie Kirk muajin e kaluar.
Raste të ngjashme janë raportuar në rajon: në prill, ish-presidenti i Kosta Rikës dhe fitues i Çmimit Nobel për Paqe, Oscar Arias, tha se SHBA-ja i kishte anuluar vizën; ndërsa në korrik, Vanessa Castro, nënkryetare e parlamentit të Kosta Rikës, deklaroi se ambasada amerikane i kishte revokuar vizën për shkak të kontakteve të supozuara me Partinë Komuniste Kineze.
Panamaja ndodhet në një pozicion delikat për shkak të tensioneve SHBA–Kinë dhe rolit strategjik të Kanalit të Panamasë.
Sekretari amerikan i Shtetit, Marco Rubio, gjatë një vizite në Panama në shkurt, e para jashtë vendit në këtë post, kërkoi që Panamaja të zvogëlojë menjëherë ndikimin e Kinës mbi kanalin detar.