Tag: kinës

Bursat globale vijojnë rënien dhe obligacionet u rritën pasi Kina përshkallëzoi konfliktin tregtar global duke rritur tarifat mbi importet nga SHBA.Kontratat e së ardhmes për indeksin S&P 500 ranë me 2.2%. Indeksi i aksioneve europiane ra me 4%, duke fshirë të gjitha fitimet e këtij viti. Ndërkohë, rendimentet e obligacioneve amerikane 10-vjeçare ranë me 14 pikë bazë, ndërsa dollari mbeti i qëndrueshëm.Pekini do të vendosë një tarifë prej 34% mbi të gjitha importet nga SHBA duke filluar nga 10 prilli, sipas agjencisë zyrtare të lajmeve Xinhua.Autoritetet kineze gjithashtu njoftuan kufizime të menjëhershme për eksportin e shtatë llojeve të metaleve të rralla, nisjen e një hetimi anti-dumping për tubat mjekësorë të rrezeve X për skanera CT nga SHBA dhe India, si dhe ndalimin e importeve të produkteve të shpendëve nga dy kompani amerikane. Për më tepër, Kina ka shtuar 11 kompani amerikane të mbrojtjes në një listë të subjekteve të pabesueshme dhe ka vendosur kufizime eksporti për 16 kompani të tjera amerikane.Masat e Kinës vijnë si kundërpërgjigje ndaj tarifave reciproke të shpallura nga Trump ndaj partnerëve tregtarë globalë. Tarifat më të fundit të SHBA rrisin taksat mbi pothuajse të gjitha produktet kineze në të paktën 54%, një lëvizje që mund të dëmtojë rëndë eksportet kineze drejt SHBA.Tensionet midis Uashingtonit dhe Pekinit janë përkeqësuar që kur Trump u rikthye në Shtëpinë e Bardhë në janar. Vlen të theksohet se presidenti amerikan ende nuk ka folur me homologun e tij kinez më shumë se dy muaj pas inaugurimit të tij.Ata gjithashtu mbeten të bllokuar në një ngërç për rolin e pretenduar të Kinës në furnizimin e Amerikës me fentanyl, një çështje që Trump e ka përmendur si arsye për dy raundet e mëparshme të tarifave.Përpara njoftimit të së mërkurës, pabarazia tarifore midis SHBA-së dhe Kinës ishte e dukshme: tarifat amerikane mbi mallrat kineze ishin shumë më të larta se ato që Kina i vendoste SHBA-së. Sipas një analize të Bloomberg Economics, tarifa mesatare e Kinës për mallrat amerikane ishte 17.8%, shumë më e ulët se 32.8% që SHBA aplikonte për mallrat kineze.Vitit e kaluar, Kina importoi pothuajse 164 miliardë dollarë mallra nga SHBA, niveli më i ulët në katër vitet e fundit.“Veprimi i SHBA nuk respekton rregullat ndërkombëtare të tregtisë, cenon rëndë të drejtat dhe interesat legjitime të Kinës dhe është një akt tipik i bullizmit unilateral,” tha Ministria e Financave në një deklaratë, duke shpallur tarifat prej 34%.Konflikti ekonomik midis dy qeverive ka prekur edhe kompanitë private në të dy vendet. Zyrtarët kinezë kanë kundërshtuar përpjekjet e Walmart Inc. për të detyruar furnizuesit kinezë të ulin çmimet për të kompensuar tarifat e Trump. Ndërkohë, miliarderi nga Hong Kongu, Li Ka-shing, ka zemëruar Pekinin pasi pranoi të shiste portet e kompanisë së tij në Panama për të kënaqur Trumpin.Trump i ka justifikuar tarifat e reja si një mënyrë të drejtë për të balancuar barrierat tregtare që vendet e tjera vendosin ndaj kompanive dhe mallrave amerikane. Administrata e tij ka akuzuar gjithashtu Kinën për vendosjen e pengesave jotarifore që dëmtojnë eksportet dhe bizneset amerikane, ankesa që u shpalosën në një raport vjetor të publikuar këtë javë nga Zyra e Përfaqësuesit të Tregtisë së SHBA-së (USTR)./ BloombergKy është artikull ekskluziv i Revistës Monitor, që gezon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetm duke cituar “Revista Monitor” shogëruar me linkun e artikullit origjinal.