Tag: kërkojnë

Kryeministri Edi Rama dukshëm ka vendosur të bëjë fushatë me dy gjëra kryesore për zgjedhjet e 11 majit, në të cilat kërkon një mandat të katërt, bashkë me ambicien për të fituar tre të pestat e parlamentit: Shkëmbim batutash dhe tallje me kundërshtarët nga njëra anë dhe premtim për anëtarësim të shpejtë në Bashkimin Evropian nga ana tjetër. Kjo është fushata e katërt radhazi dhe duket se në formë dhe përmbajtje po përsërit dy fushatat e shkuara, në të cilat, politikat identitare dhe sulmet e karakterit personal zëvendësuan premtimet konkrete apo programet e qeverisjes.
Gjithsesi, fushata e këtij viti duket se mbart një premtim më konkret se sa ajo e vitit 2017, e cila u mbështet në teorinë e tepsisë që duhej t’i mohohej LSI-së dhe t’i jepej PS-së, apo ajo e vitit 2021, e cila mund të përshkruhet, siç e përshkroi në një rast vetë Rama, “përballje personalitetesh dhe jo idesh”. Premtimi për anëtarësim në Bashkimin Evropian duket se synon të kalërojë një perceptim më të gjerë për një realitet të ri gjeopolitik, përballja mes Evropës dhe Rusisë dhe gatishmërinë e perceptuar të evropianëve për të ndëshkuar Serbinë dhe Maqedoninë e Veriut për sjelljet antievropiane të qeverive të këtyre vendeve përmes shpërblimit, me fonde dhe me premtime për më shumë integrim dhe më shpejt, të Shqipërisë dhe të Malit të Zi.
Megjithatë, pas gjithë këtij angazhimi të Ramës për shpejtësi dhe lehtësira, një goditje e fortë nga Brukseli ka shuar çdo iluzion për një rrugë të shkurtër dhe të thjeshtë për në BE.
Mesazhi i forte nga Brukseli
Në një konferencë të përbashkët me Ramën në Tiranë, Përfaqësuesja e Lartë e Bashkimit Europian për Punët e Jashtme dhe Sigurinë, Kaja Kallas, ka theksuar dje një të vërtetë të pamëshirshme që hedh në erë propagandën e Ramës për zgjedhjet e 11 majit. Ajo theksoi se vitit 2030 i ofron Shqipërisë mundësinë reale për t’u bërë pjesë e Bashkimit Europian, por vetëm nëse reformat implementohen me sukses. Kallas bëri të qartë se kjo mundësi është e realizueshme vetëm nëse Shqipëria e bën “detyrën e shtëpisë”, duke filluar me sundimin e ligjit, një nga elementët kyç për çdo shtet që aspiron të bëhet pjesë e Bashkimit Europian.
“Shqipëria duhet të fokusohet në sundimin e ligjit, i cili është thelbësor për Bashkimin Europian dhe për begatinë e një vendi. Nëse investitorët kanë besim te sistemi juaj ligjor, po. Është realiste nëse të gjithë bëjnë detyrat e shtëpisë,” tha Kallas, duke nënvizuar se nuk ka rrugë të shkurtra për të arritur në BE, përveç se përmes implementimit të thelluar të reformave. Ajo gjithashtu shtoi se Bashkimi Europian mbështet plotësisht Shqipërinë në këtë rrugëtim dhe është i gatshëm të ndihmojë në përmbushjen e standardeve ligjore të kërkuara. “Reformat janë të vështira, por janë të vetmet që do të na çojnë përpara”, tha Kallas, duke theksuar se kjo është mundësia e vetme për të kaluar përtej barrierave të krijuara nga korrupsioni dhe paqartësitë legjislative.
Rama nuk ka plotësuar asnjë kusht
Duke u bazuar në të dhënat e Raporteve të Progresit të Brukselit, është mëse e qartë se Edi Rama në 12 vite pushtet nuk ka plotësuar asnjë nga kushtet kyçe për integrimin e Shqipërisë në BE. Në shumicën e rasteve, këto kushte, që janë të detyrueshme dhe të panegociueshme për një vend kandidat, nuk janë vetëm të pashlyeshme nga vullneti i politikës aktuale, por edhe nuk janë implementuar siç duhej. Disa prej këtyre kërkesave janë të mundshme për tu realizuar, por kërkojnë vendosmëri dhe angazhim konkret nga qeveria. Për shembull, ndryshimi i ligjeve për të eliminuar vendimet diskrecionare në prokurimet publike dhe heqja e shpifjes dhe fyerjes nga Kodi Penal janë kushte që mund të arrihen përmes një vullneti politik të shprehur në parlament, dhe që nuk kërkojnë burime financiare të mëdha.
Por, as këto kërkesa nuk janë realizuar. Për më tepër, disa kushte kërkojnë investime të konsiderueshme në infrastrukturë, si ndalimi i derdhjes së ujërave të zeza në lumenj dhe krijimi i infrastrukturës moderne të transportit. Këto janë kërkesa që kërkojnë angazhim afatgjatë dhe burime ekonomike të konsiderueshme, të cilat aktualisht nuk janë të disponueshme për shkak të menaxhimit të dobët të financave të shtetit dhe korrupsionit që mbizotëron. Pra integrimi do kohë dhe nuk mund të arrihet sipas dëshirave të Ramës. BE ia bëri të qartë se s’ka rrugë të shkurtër për në BE pa plotësuar reformat.