Ndryshe nga vitet e mëparshme, ku transaksionet e shitblerjes kanë qenë të pakta dhe kryesisht mes familjarëve, në 2024-n dhe në pjesën e parë të 2025-s ka pasur më shumë lëvizje.Në tregun financiar, Grupi austriak “Uniqa” ka dalë nga tregu i sigurimeve në Shqipëri, Kosovë e Maqedoni të Veriut.Grupet e mëdha shqiptare kanë filluar riorganizimin strategjik teksa po përgatiten që t’ia kalojnë aksionet brezit të dytë, siç është rasti i Grigor Jotit, i cili ka shitur tërësisht aksionet e “Infosoft Systems”. Grupi austriak “Uniqa” tërhiqet nga “Sigal” Transaksioni më i madh i vitit të fundit është dalja nga tregu e grupit austriak të sigurimeve “Uniqa”, që kishte blerë shoqëritë e sigurimeve të jo jetës dhe jetës të “Sigal” në vitin 2007.Sipas Qendrës Kombëtare të Biznesit, në qershor 2025 është mbyllur transaksioni në bazë të të cilit “UNIQA Osterrich Versicherungen” ka shitur paketën prej 90% të aksioneve në shoqëri te “Sigal Business Center”, shoqëri e kontrolluar 100% nga Avni Ponari, themelues dhe aksioner pakice i “Sigal Uniqa Group Austria”.Z. Ponari zotëronte në mënyrë të drejtpërdrejtë edhe pjesën e mbetur prej 10% të aksioneve, ndërsa me blerjen e kuotave të “Uniqa” bëhet pronar i vetëm i kompanisë. “Sigal Business Center” është tashmë 100% aksionere edhe e “Sigal Life”.Njëkohësisht “Uniqa” ka shitur dhe filialet e saj në Kosovë dhe Maqedoni të Veriut. “Sigal” vepron në tregun e Kosovës, me dy ndërmarrjet e kontrolluara 100% prej saj, “Sigal Uniqa Group Austria” dhe “Sigal Life Uniqa Group Austria”. Në Maqedoninë e Veriut, kompania vepron nëpërmjet “Uniqa AD Skopje”, me 99,95% të aksioneve dhe “Uniqa Life AD Skopje”, me 100% të aksioneve.“Sigal” është shoqëria më e madhe e sigurimeve në vend. Sipas të dhënave nga Autoriteti i Mbikëqyrjes Financiare (AMF), në fund të vitit 2024, “Sigal” zotëronte 25.5% të primeve të shkruara bruto të sigurimit të Jo-Jetës dhe 39.6% të primeve të shkruara bruto të sigurimit të Jetës. Grigor Joti mbyll ristrukturimin strategjik të grupitSipërmarrësi Grigor Joti ka vijuar ristrukturimin strategjik të grupit “Investment Joti”, përmes të cilit ka reduktuar kompleksitetin e kompanive të grupit dhe rritur fokusin menaxherial.Z. Joti thotë se në korrik 2025 ka nënshkruar kontratat e shitjes së kuotave të tij edhe në kompanitë “InfoSoft Systems” sh.p.k. në Kosovë dhe “InfoSoft Systems doo” në Maqedoninë e Veriut. Kjo përmbyll këtë fazë të ristrukturimit strategjik të grupit.Në maj 2023, z. Joti u largua nga “InfoSoft Systems” në Shqipëri duke transferuar në favor të z. Armand Sharra 36.6% të kuotave. Tashmë “InfoSoft Systems” zotërohet 30% nga “TAG Engineering”, po në pronësi të Armand Sharra, i cili 66.7% të kompanisë dhe 33.3% nga Bledar Dhima.Në qershor 2025, “Investment Joti” ka shitur dhe 55% të aksioneve që zotëronte në “InfoSoft Business Solution”, ku 36.66% i janë shitur z. Armand Sharra dhe 16.33% tek Bledar Dhima, pjesëmarrja e të cilit ka arritur në 33.33% të kapitalit të shoqërisë.Pjesa tjetër prej 30% zotërohet nga “TAG Engineering”, në pronësi 100% të Armand Sharrës. Vlera e transaksionit ishte rreth 300 milionë lekë.Z. Joti ka rritur pjesëmarrjen në “Inter Trade & Distribution”, ku “Investment Joti”, që ai zotëron, ka 76% të aksioneve nga 52% që kishte më parë (24% zotërohen nga Roland Joti).Në janar 2025, z. Grigor Joti ka dalë nga shoqëria “Interbrands”, teksa është depozituar marrëveshja për shkëmbimin/kalimin e 52% të kuotës nga ortaku Investment Joti – InfoSoft Group në favor të ortakut Plarent Kristo, që rriti përqindjen e kapitalit nga 24% në 76%. (24% zotërohet nga Roland Joti).“Ky transaksion nuk ishte thjesht një shitje e kuotave të mia në ‘Interbrands’, por një shkëmbim reciprok kuotash midis meje dhe një ortaku të përbashkët në të dy kompanitë.Unë mora kuotat e tij në ‘Inter Trade & Distribution’, duke i kaluar atij kuotat e mia në ‘Interbrands’. Edhe ky transaksion kishte për qëllim konsolidimin e pronësisë mbi kompanitë dhe rritjen e fokusit mbi mirëmenaxhimin e tyre”, ka pohuar z. Grigor Joti më herët në një intervistë për “Monitor”.“Duke konsideruar diversifikimin e lartë dhe kompleksitetin e bizneseve të grupit, që shtriheshin nga ndërtimi i infrastrukturave komplekse të IT në Shqipëri, Maqedoni e Veriut dhe Kosovë, te distribucioni i produkteve IT në këto tre vende, në distribucionin e produkteve të konsumit, në Real Estate në Shqipëri e Austri, në Investimet Financiare, etj., si dhe bazuar mbi strukturën familjare, unë vendosa të reduktoj kompleksitetin dhe të rris fokusin menaxherial.Qëllimi ishte të përmirësohej qeverisja e përgjithshme e grupit dhe të krijoheshin kushte më të favorshme për kalimin e brezit të dytë në drejtim”. Grupi BALFIN shet “SPAR Albania” dhe “Fashion Group”Në fund të muajit mars 2025, kompania nga Kosova, “Viva Fresh Store”, njoftoi se ka arritur një marrëveshje për blerjen e “SPAR Albania” nga grupi shqiptar BALFIN.Vlera finale e transaksionit ishte 36.4 milionë euro, sipas transaksionit të regjistruar në Qendrën Kombëtare të Biznesit. Pas njoftimit të blerjes, Banka Europiane për Rindërtim dhe Zhvillim (BERZH) dhe fondi Enterprise Expansion Fund II (ENEF II), në kuadër të Kornizës së Investimeve për Ballkanin Perëndimor të Bashkimit Europian (WBIF), njoftuan se do të japin një hua deri në 25 milionë euro për të mbuluar pjesërisht koston e blerjes së “SPAR Albania” – me BERZH që kontribuon me 22 milionë euro dhe ENEF II me 3 milionë euro.Kjo është huaja më e madhe që BERZH ka dhënë ndonjëherë për një kompani vendase në Kosovë. Pas blerjes, “Viva Fresh” planifikon të zgjerojë aktivitetin në Shqipëri me hapjen e dyqaneve të reja dhe rinovimit të pikave ekzistuese të “SPAR”.Në një strategji për të mbajtur vetëm biznese që kanë hapësira të jenë rajonale dhe më gjerë, grupi BALFIN ka shitur “Fashion Group Albania” te kompania me kapital nga Kosova, “Albi Holding”, për 7.6 milionë euro, sipas kontratës së depozituar në QKB. “Fashion Group Albania” (FGA) ka për objekt aktiviteti importin dhe tregtimin e veshjeve dhe këpucëve.Shoqëria operon nëpërmjet rrjetit të saj të dyqaneve nën markën ndërkombëtare “Aldo”, “Carpisa”, “Cortefiel”, “Geox”, “Mango”, “Okaidi”, “Parfois”, “Prenatal”, “Springfield”, “Woman Secrets”, brenda territorit të Shqipërisë. “Albi Holding” është pjesë e “Albi Group”, i themeluar në Kosovë, i cili zotëron rrjetin e dyqaneve me produkte të modës që operon në Kosovë dhe rajon, duke përfaqësuar markat ndërkombëtare si: “Celio”, “Chaussea”, “Okaidi”, “Mango”, “Springfield”, “Ozdilek”, “Geox”, “Gant”, “Timberland”, “Hugo Boss”, “Sportina Armani Exchange”, “Tom Tailor”, “XYZ”, “UGG”, “Plein Sport”, “Orsay”, “Dan John”, “Parfois”, “Boggi”. “Albi Holding” zotërohet prej biznesmenëve nga Kosova, Tahir Humolli, Sutki Humolli, Nexhat Humolli, Nehat Humolli dhe Betim Humolli. Transaksioni nuk është regjistruar ende në Qendrën Kombëtare të Biznesit, por ka marrë miratimin e Autoritetit të Konkurrencës. Edhe “Kastrati Group” ndryshon emrin, riorganizon aksionet Në dhjetor 2024, “Kastrati Group”, kompania më e madhe në vend sipas të ardhurave, me aktivitet kryesor tregtimin me shumicë të hidrokarbureve, ndryshoi emrin në “Kastrati Energy Trade”.Në maj 2025, sipërmarrja kreu një riorganizim të aksioneve. Aksioneri 100% i kompanisë është shoqëria e re e krijuar në janar 2025 me emrin “Jonuz Kastrati”, (e emëruar sipas emrit të të atit të aksionerëve ekzistues).Shoqëria “Jonuz Kastrati” zotërohet 65% nga kompania “Kastrati” sh.p.k, (në pronësi 100% të Shefqet Kastrati), 20% të Shefit Kastrati dhe nga 5% secili kanë Bilbil Kastrati, Selam Kastrati dhe Hajredin Kastrati.Sipas dokumenteve të dorëzuara në QKB, ky proces riorganizimi i entiteteve në pronësi po bëhet për të optimizuar operacionet e tyre dhe për t’iu përgjigjur nevojave të zhvillimit strategjik të shoqërive, si dhe përmirësimin e efikasitetit operativ për të nxitur rritjen e investimeve afatgjatë dhe përfitimet për ortakët e saj.Të njëjtat shkëmbime janë bërë dhe për shoqërinë tjetër, “Kastrati sh.p.k.”, me aktivitet tregtimin me pakicë të hidrokarbureve, e cila është riemërtuar “Kastrati Energy”.Nga maji 2025 “Shoqëria Jonuz Kastrati” është aksionere 100% e “Kastrati Energy”. “Eurolab” blen “Birra Stela”Në prill 2025 u finalizua marrëveshja e shitjes së fabrikës së prodhimit të birrës “Stela” te kompania “Eurolab Internacional Grup”, një nga më të mëdhatë në fushën e distribucionit.Procedurat për transaksionin e shitjes mes operatorëve rezultojnë se kanë nisur që në muajin tetor 2024, pas miratimit të vendimit të Asamblesë së Përgjithshme të aksionerëve të shoqërisë “Stefani & CO” Sh.A. për shitjen e të gjitha aksioneve të saj te kompania “Eurolab Internacional Grup” sh.p.k., për një shumë totale prej 10 milionë eurosh.Marrëveshja finalizuese e blerjes së fabrikës së birrës “Stela” është e vlefshme prej 10 prillit 2025.Kjo marrëveshje përfshin: 100% të aksioneve të kompanisë “Stefani & Co” ShA; Transferimin e kontrollit operacional dhe strategjik; Integrimin në grupin e kompanive “Eurolab Internacional Grup” Sh.P.K. “Tranzit” blen “NOA”Në janar 2025, 100% e aksioneve të shoqërisë mikrofinanciare “NOA” janë transferuar tek institucioni financiar konkurrent “Tranzit” (aksioner i vetëm i Bankës Amerikane të Investimeve – ABI Bank).Pronësia e kompanisë nga 100% e huaj u bë 100% shqiptare. Më parë aksionerët e “NOA” ishin “NOA Cooperatief U.A.” dhe “NOA Holdings N.V.”, të dyja korporata investimi me origjinë holandeze, të regjistruara dhe me seli në Amsterdam, Holandë, ndërsa përfitues përfundimtarë ishin një grup biznesmenësh shqiptarë.“NOA” shënon blerjen e tretë të grupit të “ABI Bank”, pas bankës “Credite Agricole Albania” dhe bankës “NBG Albania”. Ndryshojnë aksionerët e “Digit-Alb”“Digit-Alb”, platforma më e madhe me pagesë televizive në vend, ka pasur lëvizje të shumta të aksionerëve në pjesën e parë të 2025-s. Në datën 27.01.2025 janë shitur 2.52% të kuotave të Shoqërisë nga ortaku Alban Jaho në favor të Shoqërisë “Albsea Transport” .Në datën 25.02.2025 janë shitur 13.6% të kuotave të Shoqërisë nga Shoqëria “Union Grup” në favor të Shoqërisë “About Times”, subjekt në pronësi të plotë të Vjollca Hoxhës. Po në atë datë, “Grupi Union” ka shitur njëkohësisht edhe 3.2% të aksioneve që kontrollonte nëpërmjet shoqërisë tjetër të grupit, “Arch Investor”, te “Top Channel”, kompani që zotërohet nga trashëgimtarët ligjorë të themeluesit të saj, Dritan Hoxha.Pas këtyre transaksioneve, familja Hoxha e ka rritur pjesëmarrjen e saj në “Digit-Alb” në 60.25% të aksioneve, duke përfituar shumicën vendimmarrëse në shoqëri.Në datën 08.05.2025 janë shitur 10.52% të aksioneve nga Shoqëria “Albsea Transport” në favor të Shoqërisë që ka aktivitet kryesor prodhimin e shpendëve, “A.I.B.A. KOMPANI”.Kjo e fundit kishte hyrë si aksionere në “Digit-Alb” në 2019-n dhe më pas në fillim të vitit 2022 kishte shitur aksionet tek “Albsea Transport”, nga e cila i bleu sërish. Vilma Nushi këmben me tokë 50% të aksioneve të “Marketing & Distribution”Sipërmarrësja Vilma Nushi, e cila themeloi kompaninë e shpërndarjes së produkteve “Marketing & Distribution” në vitin 1997, ka vendosur që në gusht 2024 të bëhet kalimi i 25% të kapitalit të shoqërisë në favor të Niki Gleoudi dhe 25% të kapitalit të shoqërisë në favor të Dorothea Gleoudi, shtetase greke, sipas vlerës së kontributit të ofruar në natyrë, që lidhet me sipërfaqe të pasurive arë prej 15 mijë metra katror në zonën e Katundit të Ri, Kashar.Pas kësaj lëvizjeje, shoqëria nga shqiptare u bë e përbashkët, shqiptare – e huaj. “AGIKONS” bëhet shoqëri e huaj, por me aksioner shqiptar Në dhjetor të vitit 2024, është depozituar në Qendrën Kombëtare të Biznesit kontrata e shkëmbimit të kuotave që Gentian Sula kishte në shoqërinë e ndërtimit “AGIKONS” me shoqërinë “UK Development Holding Limited”.Shoqëria u bë me kapital të huaj 100%, nga 100% shqiptare që ishte më parë. Sipas vendimit të Asamblesë, “Ortaku i vetëm miraton shkëmbimin e kuotës së Shoqërisë ‘AGIKONS’ sh.p.k. me kapital 1,501,000,000 lekë me kuotat e Shoqërisë angleze ‘UK Development Holding Limited’ në 12,652,449 GBP e cila përbën 100% të pjesëmarrjes në kapitalin e Shoqërisë”.Edhe pas këtij shkëmbimi, aksioneri nuk ka ndryshuar.“Në përfundim të transaksionit, Shoqëria do të ketë ortak të vetëm z. Gentian Sula, i cili do të jetë zotërues i një kuote që përbën 100% të kuotave të kapitalit të Shoqërisë”, thuhet në vendimin e asamblesë.Z.Sula ka regjistruar shoqërinë “UK Development Holding Limited” në Londër në korrik 2024. Transaksionet e tjera– Në qershor 2025, z. Petrit Shijaku, i cili zotëronte 33% të shoqërisë “Shijaku”, me aktivitet në ndërtim, është larguar nga kompania dhe ua ka dhuruar pjesën e tij dy vëllezërve, përkatësisht Shpëtim Shijakut me 15.67%, i cili ka rritur kuotat në 49%, dhe Bilbil Shijakut, 16.67%, që tashmë ka 51% të kuotave të kompanisë.Çmimi i shitjes, sipas kontratës, ishte 1.2 milionë euro.– Në korrik 2025, ortaku Kujtim Kale, i cili zotëronte 50% të aksioneve të shoqërisë së tregtimit me shumicë të karburanteve, “RDA Petrol”, ka shitur kuotën e tij tek aksioneri tjetër Fation Veizaj, që tashmë zotëron 100% të kompanisë.– Në maj 2024 u zbatua projekt-bashkimi me përthithje, ku shoqëria “Riofarma” sh.p.k. u përthith nga “Trimed”, të dyja me aktivitet në tregtimin e produkteve farmaceutike. Qëllimi i transaksioneve është zvogëlimi i kostove dhe bashkimi i sinergjive.Në gusht 2024, nga “Trimed” u largua ortaku Gani Peposhi, i cili i dhuroi 40% të aksioneve te Gentiana Peshkatari, kuota e së cilës u rrit në 50%. Pjesa tjetër prej 50% vijon të zotërohet nga Endrit Hido.– Në shkurt 2024, në shoqërinë e tregtimit të produkteve farmaceutike “Megapharma” është shtuar ortaku “T-Medss”, i cili ka blerë 30% të aksioneve nga aksionerët ekzistues për 4.6 milionë euro. Monika Hamzaraj ka shitur 15% të aksioneve, duke mbajtur 35%, dhe Robert Çina ka shitur po 15% të aksioneve, duke mbajtur 35%. Zotëruesi i “T-Medss” është Sokol Ramizi.– Një tjetër ndryshim në pronësinë e shoqërive farmaceutike lidhet me transferimin e 20% të kapitalit të z. Izmir Shehu, në favor të znj. Besjana Gradica në shoqërinë “Alfamarkos”, për 70 milionë lekë.Z. Shehu ka ulur pjesëmarrjen në kapital nga 60 në 40%, ndërsa pjesa tjetër prej 40% vijon të zotërohet nga Vladimir Margjeka. Transaksioni ka ndodhur në prill 2024.– Në qershor 2024, Bardhyl Sali, i cili zotëronte 100% shoqërinë “Sali Elektrik”, me aktivitet në tregtimin e materialeve elektrike, i ka dhuruar 40% të aksioneve të birit, Rikardo Sali. Lexoni edhe:200 VIP-at e 2024-s; Në “kurthin” e punonjësve Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.
