Tag: kapur

Rigels Seliman
Bashkimi i votave për të ngritur Komisionin e Reformës Zgjedhore dhe Territoriale mund të jetë paralajmërim i një kompromisi më të madh mes Partisë Demokratike dhe Partisë Socialiste për ndryshimin e Kushtetutës (ligjit themeltar të shtetit), që kërkon minimalisht 94 vota, 11 më shumë seç Rama ka. Ditën e djeshme kreu i PD, Sali Berisha është shprehur i gatshëm të ulet me kryeministrin Edi Ramën për të prekur Kushtetutën, duke hapur rrugën për një “pakt të madh” që mund të tronditë themelet e Reformës në Drejtësi. Burime pranë grupit të Berishës pohojnë se pas bashkimit të votave me Ramën për ngritjen e Komisionit të Reformës Zgjedhore, po përgatitet terreni për ndryshime kushtetuese që mund të paralizojnë SPAK-un dhe të zhbëjnë punën e disa viteve të reformave të BE-së.
“Ka dhe një mendim të kahershëm, është i 25-30 viteve më parë që vendi të bëhet me 2 dhoma. Dhoma e lartë e senatit, dhe ajo e parlamentit. Jam dakord me këtë se sado pak, po në qoftë se e ndërton senatin jo si një institucion bllokues, po si një institucion frenues, atëherë i bën një të mirë vendit. Kur një mazhorancë, senati është i dobishëm. Shqipëria në rast se ngre një senat, pa diskutim që duhet të pakësohet numri i deputetëve. Për zvogëlimin e bashkive nuk jemi dakord. Ne kemi vendosur një kusht që kemi pranuar. Në komisionin për Zgjedhoren të jetë ODHIR, dhe në Territorialen të jetë ekspertët e Kongresit të Autoriteteve Rajonale dhe Lokale të Evropës. Nëse është problemi për të përcaktuar senatin e republikës në Kushtetutë, jam gati të ulem. Mendoj se është institucion i dobishëm. Reforma vendore nuk ka nevojë për Kushtetutë”, deklaroi dje Berisha gjatë një konference për mediat nga selia blu.
Prapaskenat
Por kjo lëvizje vjen në momentin kur Berisha përballet me akuza të rënda nga drejtësia dhe kur shumica kërkon një “riformatim” të sistemit përmes krijimit të një Senati. Ish-kryeministri ka deklaruar se “është gati të ulet me Ramën” për të diskutuar modelin me dy dhoma, duke pranuar që ky proces mund të çojë edhe në uljen e numrit të deputetëve. Por nëse e shohim me kujdes, duket qartë se jemi përballë një skenar të rrezikshëm: Rama dhe Berisha, dikur armiq politikë, po afrohen për një marrëveshje që mund të zhbëjë SPAK-un dhe të rikthejë kontrollin e plotë të politikës mbi drejtësinë.
Burime nga selia blu nuk e mohojnë mundësinë e një “kompromisi historik”, ndërsa në selinë rozë edhe pse mbizotëron heshtja, sinjalet janë se edhe mazhoranca e kërkon ta vendosë Prokurorinë e Posaçme nën tutelë duke qenë se here pas here kryeministri Rama e ka sulmuar për shkak se shumë zyrtarë të lartë të PS janë arrestuar ose po hetohen, madje socialistët ngritën edhe komisionin“Xhafaj”, i cili misionin e tij e ka për të goditur reformën në drejtësi. Kështu që nëse ky plan ecën përpara, Shqipëria mund të përballet me ndryshimin më të madh kushtetues të dekadës së fundit, një lëvizje që shumë e quajnë “goditje të drejtpërdrejtë ndaj drejtësisë së pavarur”. Pra e gjithë kjo tregon se një “pakt i heshtur Rama-Berisha” po merr formë, ndërsa loja për pushtetin absolut duket se sapo ka nisur dhe se kjo aleancë e papritur mund të shënojë fundin e Reformës në Drejtësi ashtu siç e njohu vendi deri më sot. Megjithatë mbetet të shihet në ditët në vijim se çfarë do të ndodhë më konkretisht.
Berisha sulmon Dumanin
Ndërkohë kryedemokrati Sali Berisha vijoj dje me akuzat e tij kundrejt kreut të SPAK, Altin Dumanit, i cili dy ditë më parë raportoi në Kuvend mbi veprimtarinë vjetore të Prokurorisë së Posaçme. Seanca e djeshme në Kuvend, përpara raportimit të institucioneve të drejtësisë, u kthye në sherr pasi opozita kërkonte që deputetët t’i drejtonin pyetjet direkt, ndërsa mazhoranca refuzonte. Berisha thotë se Dumani nuk i duronte dot pyetjet e deputetëve të opozitës, ndërsa thotë se përgjigjet e tij ishin tipike të një njeriu të kapur. Sali Berisha akuzon Altin Dumanin për lidhje të ngushta me krimin dhe me qeverinë Rama dhe se operon për interes të këtyre të fundit. “Dita e djeshme regjistrohet në analet e Parlamentit shqiptar si dita e kapitullimit pa kushte të pseduomazhorancës së krimit dhe jo vetëm asaj, por para shqiptarëve dhe mbarë botës, mercenarit të Edi Ramës, Altin Troplini.
Qytetarë, ju dje në një teatër tragjikomik patë sesi pseudomazhoranca e tërë u angazhua të shkelë ligje, të shkelë kushtetutën e vendit vetëm në diktatin e Dumanit, i cili refuzonte të merrte pyetje me gojë direkt nga deputetët. Akt i pashembullt. Në të gjitha parlamentet e botës pyetjet bëhen me shkrim dhe me gojë. Dorëzohen me shkrim në mënyrë që zyrtari që pyetet t’i jepet mundësia të përgatisë përgjigjet, lexohen nga autori dhe ky është një standard. Por i keqpërdoruri dhe i keqshfrytëzuari në ekstrem nuk uronte dot pyetjet. I dukeshin si shigjeta. U bë një kompromis, dhe ai kompromis u bë pas një përpjekje shumë të madhe të opozitës që donte që shqiptarët të mësonin të vërtetat e këtij sistemi të falimentuar.
Kompromisi ishte që zyrtari të lexonte pyetjet dhe pas përgjigjeve të tij ,autori i pyetjes të shprehej 2 minuta për përgjigjet që ai dha. Kjo funksionoi shumë mirë, ndonëse ju e patë vetë, pozitën mjerane në të cilën u ndodhën palët tona kundërshtare. Ai fliste si i kapur. Për të gjithë ata që njohin gjuhën e trupit, kjo ishte e vërteta e tij, ishte i kapur, ai është i kapur”, deklaroi ai. Po ashtu, Berisha ka rilexuar mesazhin e qytetarit digjital ku pretendohet për një ujdi me vlerë 5 milionë euro që Altin Dumani ka bërë në lidhje me dosjen e shtetasit Kreshnik Farruku nga Manza, Durrës, mik, bashkëpunëtor i Xhevdet Troplinit dhe Elvis Troplinit, thotë Berisha. Lideri i opozitës thotë se askush nuk merr përsipër të hetojë Dumanin, duke e cilësuar këtë të fundit si një mashtrues dhe të kapur nga krimi.