Gjergji Nika
VLORË- Anëtari i Këshillit Bashkiak në Vlorë nga radhët e Partisë Demokratike, Gjergji Nika, ka shpallur kandidaturën e tij të pavarur për zgjedhjet e pjesshme lokale të 9 nëntorit.
Në një deklaratë publike, Nika theksoi se Vlora ka nevojë për një përfaqësim të denjë dhe të vërtetë, duke shtuar se dëshiron që Partia Demokratike të “çlirohet” nga individë groteskë, siç i cilëson ai. Megjithëse vjen nga PD, Nika nuk ka mbështetjen e kësaj force politike, e cila në këtë garë ka zgjedhur të mbështesë një tjetër kandidat të pavarur, Dionis Sotën.
Si anëtar aktual i Këshillit Bashkiak, Nika përjashtohet nga detyrimi ligjor për të dorëzuar formularët e Komitetit Nismëtar pranë KQZ-së për t’u regjistruar si kandidat në zgjedhjet e 9 nëntorit në Bashkinë Vlorë. Ai do të përballet në garë me kandidatin e mbështetur nga PD, Dionis Sotën, dhe me kandidaten e PS-së, Brunilda Mersini, e cila aktualisht mban postin e deputetes në Kuvendin e Shqipërisë.
Ndërkohë, Gjergji Nika ka kandiduar për deputet në listën e Koalicionit Euroatlantik në qarkun e Vlorës për zgjedhjet parlamentare të 11 majit, por nuk arriti të siguronte votat e mjaftueshme.
Deklaratë kandidimi për zgjedhjet e pjesshme vendore në Vlorë
Kandidoj në zgjedhjet e pjesshme vendore në Vlorë, sepse pavarësisht se janë zgjedhje për pushtetin vendor, në të vërtetë janë zgjedhje thellësisht politike.
Vlora ka nevojë për një përfaqësim të vërtetë, të ndershëm dhe të përgjegjshëm. Vlora nuk është një bashki që thjesht menaxhohet, është një qytet që duhet çliruar nga interesat e ngushta, kapja politike e ekonomike, korrupsioni dhe klientelizmi, që e ka mbajtur peng prej gati 30 vjetësh.
E majta e ka kthyer Vlorën në një pronë private, ku pushteti nuk u shërben qytetarëve, por miqve të pushtetit. Tenderat, emërimet, vendimmarrjet, gjithçka sillet rreth një qarku vicioz interesash ndërsa qytetari i zakonshëm është i pafuqishëm në shfaqjen e përditshme të arrogancës dhe abuzimit.
Nga ana tjetër, e djathta, pothuajse është zhdukur nga harta politike e qytetit. Prej vitesh, demokratët në Vlorë janë tallur e nëpërkëmbur me kandidatë të imponuar, që nuk kanë asnjë lidhje me Partinë Demokratike, me historinë e saj dhe me qytetin tonë, me të djathtën apo me parimet që përfaqësojmë.
Kandidatë që kanë qenë produkt i pazareve të lidershipit dhe enturazhit të tij, jo i vullnetit të demokratëve të vërtetë.
Unë kam qenë aktiv dhe i angazhuar në Këshillin Bashkiak, një zë i fortë dhe i pandikuar në mbrojtje të qytetarëve vlonjatë, të drejtave të tyre dhe të interesit publik edhe kur të tjerët heshtnin. Kam qenë gjithmonë në krah të njerëzve të ndershëm që duan një qytet më të mirë, më të drejtë dhe më të lirë.
Sot kandidoj sepse nuk dua ta shoh më qytetin tim pa zë dhe demokratët pa dinjitet. Kandidoj, sepse nuk dëshiroj që PD të zhbëhet nga individë groteskë!
Kandidoj, sepse në këto vite, kryesia e degës lokale të PD-së ka larguar sistematikisht njerëzit më të aftë, më të përkushtuar, më të ndershëm dhe më të lirë, për të mbajtur afër vetëm të bindurit dhe idealistët, idealizmin e të cilëve e përdor.
Kandidoj sepse nuk dua ta shoh më Vlorën peng të një partie që s’qeveris dot ndryshe veçse për klientët e saj, dhe as të një opozite që rri në radhë për emërime, jo për ideale.
Sot, Vlora ka nevojë për një alternativë të re, për një kandidaturë që nuk ndan, por bashkon.
Unë jam kandidati sot dhe nesër kryetari përbashkues, për të gjithë qytetarët e Vlorës, që për shumë kohë nuk kanë pasur zë dhe përfaqësim. Do të jem zëri i të gjithë atyre që janë lodhur nga servilizmi, nga pazaret, nga fytyrat që nuk ikin kurrë! Do të jem kandidati sot e kryetari nesër i qytetarëve, jo i pazareve.
Ndaj ftoj të gjithë qytetarët e paangazhuar, opozitarët e sinqertë, demokratët e vërtetë, dhe të majtët e zhgënjyer të më bashkohen në këtë përpjekje për ta kthyer Vlorën në një qytet që i përket qytetarëve, jo klientelës politike.
Një qytet i lirë fillon me një votë të lirë!
Gjergji Nika/ZËRI
