Tag: kalon

Adriatik BALLA
Lojtarët shqiptarë që luajnë në Itali janë bërthama e skuadrës përfaqësuese. Natyrisht jo të gjithë, por një pjesë e madhe e Kombëtares tonë luajnë me klube të Serisë A italiane dhe kjo ka efektet e veta pozitive, pasi kampionati italianë shtë një nga 3-4 më të mirët në botë dhe klubet ku aktivizohen lojtarët tanë janë emra të njohur të futbollit europian. Ditët e fundit vëmendjen kryesore nga ky kontigjent e ka patur mesfushori Kristjan Asllani, që llogaritet se do të shitet nga Interi, por lojtari ende nuk ka dhënë sinjale që dëshiron të shkëputet nga fanella zikaltër. Ndërkohë, dje pati lajme pozitive për dy lojtarë shqiptarë që luajnë në Itali, për veteranin Elseid Hysaj që u fut në testet mjekësore të klubit të Lacios, si dhe për portierin Elhan Kastrati që ka shanse të kthehet te Peskara. Nga ana tjetër, i riu Bashi kaloi edhe zyrtarisht te Katanxaro.
Hysaj kalon testet mjekësore por…
Futbollisti i përfaqësueses kuqez, Elseid Hysaj, ka zhvilluar dje vizitat mjekësore, bashkë me pjesën tjetër të skuadrës. Mbrojtësi i Kombëtares vazhdimisht përflitet në Itali për largimin nga Lacio, pasi nuk konsiderohet titullar dhe paga e tij është ndër më të lartat e ekipit. Gjithsesi, sinjalet duken pozitive për sezonin e ri. Mauricio Sarri është në krye të skuadrës dhe Hysajt i ka besuar më parë. 31-vjeçari është ndër lojtarët që ka më tepër eksperiencë në skuadër. Në total me Lacion numëron 126 paraqitje. Mbetet për t’u parë si do shkojë ky sezon ku i përfundon kontrata.
Bashi kalon zyrtarisht te Katanxaro
Ervin Bashi ka hedhur hapin e rëndësishëm të karrierës së tij, teksa ka firmosur me klubin e Serisë B, Katanxaron, pasi ka spikatur një kategori më poshtë në futbollin italian me fanellën e Pro Patrias. Djaloshi shqiptar i cili luan me moshat kuqezi, ka bërë emër që në moshë të re dhe në sezonin 2022-2023 ishte me paratërinjtë e Milanit që e huazoi duke e paguar 5 mijë euro kartonin e tij. Por tani 19-vjeçari shqiptar do të ketë mundësinë të tregojë sa vlen në futbollin më të rëndësishëm, i cili nuk e tremb, ndonëse bëhet fjalë për një hap të rëndësishëm në karrierë në një moshë të re. “Jam një mbrojtës qendre, por mund të luaj edhe në krah në mbrojtjen me tre. Pika ime e fortë është agresiviteti. Jam i lumtur që jam këtu pasi e di që ky klub mund të më ndihmojë të rritem, siç kam bërë te Pro Patria. Unë jam pjekur si nga pikëpamja futbollistike, ashtu edhe ajo njerëzore në atë klub. E di që Seria B është një kampionat i vështirë, për nuk më tremb. Jam shumë punëtor, shpresoj të jap maksimumin”, tha djaloshi shqiptar në prezantimin e tij. “Jam i lumtur që kam ardhur te Katanzaro, pasi të gjithë më kanë folur mirë. E di që tifozeria është e zjarrtë dhe të mbështet, duke të lejuar të punosh me qetësi. Ju garantoj që unë dhe shokët e mi do të japim gjithçka për këtë fanellë kaq të rëndësishme. Pres me padurim që të zbres në fushë dhe të përjetoj ato emocione të cilat padyshim do të jenë të mëdha”, ishin fjalët e mbrojtësit i cili së fundmi është grumbulluar edhe me U21 të Shqipërisë.