Komisioni i posaçëm i reformës zgjedhore ka miratuar kalendarin e punës së këtij komisioni, duke përfshirë edhe çështjen e sistemit zgjedhor.
Edhe pse Partia Demokratike ka 5 vite që kërkon ndryshimin e sistemit zgjedhor, kryetari i PS Edi Rama nuk ka folur asnjëherë për nevojën e një sistemit të ri, por sot socialistët dhe demokratët votuan kalendarin ku parashikohet të diskutohet për sistemin zgjedhor, në varësi edhe të ndryshimeve të ndarjes së re administrative-territoriale.
“Kemi përfshirë diskutimin e sistemit zgjedhori jo vetëm për ndryshimet në hartën territorial, por edhe për faktin që debate duhet të jetë i plotë. Shqiptarët duhet të kenë mundësinë të kenë një debat të plotë eventualisht. Sistemin zgjedhor duhet ta kenë të dakordësuar palët. Sot nuk është. Sot është i njëanshëm”, tha Oerd Bylykbashi, bashkëkryetari i “zgjedhores”.
Megjithatë përfshirja në kalendar nuk do të thotë se palët do të gjejnë dakordësi për sistemin zgjedhor e mbetet për tu parë se si do të jenë qëndrimet e dy partive kryesore në raport me një prej çështjeve më të debatueshme të zgjedhjeve në Shqipëri. Ndërkaq çështjet e tjera duket se do të sigurojnë më lehtë konsensusin dhe PS kërkon që ligji për financimin e partive politike të jetë çështja e parë që do të diskutohet.
Komisioni i reformës zgjedhore gjithashtu do të diskutojë edhe rekomandimet e OSBE-ODIHR duke filluar nga ndalimet për përdorimin e burimeve shtetërore në fushatë, tek përbërja e komisioneve që administrojnë zgjedhjet./vizionplus.tv
