Lajmidites.com

Tag: kajro

  • Kryenegociatori i Hamasit takohet me ndërmjetësin nga Kajro, presidenti egjiptian: E vlerësoj planin e Trump

    Kryenegociatori i Hamasit takohet me ndërmjetësin nga Kajro, presidenti egjiptian: E vlerësoj planin e Trump

    Negociatat mes Hamasit dhe Izraelit po hyjnë në një fazë kritike, pasi këtë mëngjes kryenegociatori i Hamasit, Khalil al-Haya, u takua me ndërmjetës nga Egjipti dhe Katari në Kajro.

    Pas këtij takimi, priten bisedime të mëtejshme indirekte me përfaqësues të Izraelit dhe Shteteve të Bashkuara në Sharm el-Sheikh.
    Qëllimi i këtyre negociatave është të përcaktohet një datë për një armëpushim të përkohshëm dhe të vendosen themelet për fazën e parë të një plani paqeje. Sipas këtij plani, 47 pengje që mbahen aktualisht në Rripin e Gazës do të lirohen në këmbim të lirimit të qindra të burgosurve palestinezë.
    Kryeministri izraelit, Benjamin Netanyahu, deklaroi një ditë më parë se bisedimet përfshijnë edhe lirimin e gjithsej 48 pengjesh, duke përfshirë trupin e ushtarit Hadar Goldin, i cili mbahet nga Hamasi që prej më shumë se një dekade.
    Presidenti egjiptian, Abdel Fattah al-Sisi, ka përshëndetur planin amerikan për Gazën dhe ka shprehur mbështetje për Presidentin e SHBA-së, Donald Trump. “Nuk mund të mos shpreh vlerësimin dhe admirimin tim për Presidentin e SHBA-së Donald Trump,” tha al-Sisi në një fjalim zyrtar.
    “Një armëpushim, kthimi i të burgosurve dhe pengjeve, rindërtimi i Gazës dhe fillimi i një procesi politik paqësor që do të çojë në njohjen dhe krijimin e një shteti palestinez, do të thotë se jemi në rrugën e duhur drejt paqes dhe stabilitetit të qëndrueshëm në rajon”,- shtoi ai.

    Top Channel

  • “Gaza e Vogël”, vitet e padukshme të palestinezëve në Kajro: Nuk do të kthehemi më kurrë!

    “Gaza e Vogël”, vitet e padukshme të palestinezëve në Kajro: Nuk do të kthehemi më kurrë!

    “Zemra ime është varrosur në qytetin e Gazës. Jetoj, marr frymë dhe ec vetëm për vajzën time 5-vjeçare, Ulya. Ajo është gjithçka që më ka mbetur nga familja”. Kështu e nis rrëfimin e saj Samira, 35 vjeçe, e mbijetuar nga një sulm ajror izraelit më 19 tetor 2023, që i mori jetën burrit të saj, dy binjakëve 2-vjeçarë, prindërve dhe vëllezërve me familjet e tyre.
    “Isha jashtë me vajzën kur ndodhi sulmi. Na shpëtoi rastësia. Nga binjakët, u gjet vetëm trupi i njërit. Të jenë ndarë edhe në varr, është e padurueshme për mua”, shtoi ajo
    Samira arriti të largohej nga Gaza në mars të vitit 2024, kur kufijtë u hapën për pak ditë për ata që mund të paguanin agjencinë “Hala”: 5 mijë dollarë për të rriturit, 2 mijë e 500 për fëmijët. Paratë ia pagoi kunati egjiptian që punon në Libi. Tani jeton në Kajro me motrën dhe mbesat e saj. Në maj, atyre iu bashkua edhe Niveen, 50 vjeçe, e cila humbi prindërit në një tjetër bombardim.
    “Djemtë më shoqëruan në kufi, më detyruan të largohem. U nisa me një fustan të grisur dhe këpucë të shkatërruara. Fqinjët e motrës më sollën veshje, këpucë e madje edhe rroba të brendshme”, rrëfen ajo.
    Në shtëpinë e thjeshtë në Kajro, me mure të zbehta rozë, ka vetëm divane, krevate dhe një televizor që nuk fiket kurrë. Të gjithë ndjekin me ankth lajmet për planin e paqes të Donald Trump. Niveen, ekonomiste me master dhe ish-kandidate e Fatahut, thotë: Dua të kthehem në një Gaza pa Hamasin. Na kanë vrarë edhe para luftës, morën pushtetin me dhunë.
    Samira tund kokën: Nuk ka më asgjë për mua atje, vetëm dhimbje. Dua të çoj vajzën time në Gjermani dhe ajo të bëhet inxhiniere. Ka parë shumë shkatërrim, dua të mësojë të ndërtojë.

    Kjo ndarje mendimesh sjell tension në çdo familje palestineze në Kajro, disa shpresojnë të kthehen dhe të rindërtojnë, të tjerë vetëm të largojnë të afërmit e mbetur dhe të rifillojnë jetën diku tjetër, thotë Abdalmuhdi Abumotawi, politolog nga Gaza, që jeton në Egjipt që prej vitit 2006 për arsye politike. Ai njihet si mbështetës i opozitës ndaj Hamasit dhe është burim ndihme për shumë të ardhur.
    Sipas Autoritetit Palestinez, 170 mijë qytetarë të Gazës kanë hyrë në Egjipt që nga fillimi i luftës. 85% prej tyre ndodhen në Kajro, kryesisht me viza turistike 45-ditore që kanë skaduar prej kohësh. Ata nuk kanë status ligjor, nuk mund të punojnë, të çojnë fëmijët në shkollë, të pajisen me patentë apo të blejnë kartë telefoni. Tolerohen, por nuk integrohen, dhe as agjencitë e OKB-së si UNHCR apo UNRWA nuk operojnë në Egjipt për t’i ndihmuar.
    Kështu ka lindur një “Gazë e Vogël” në qytetin Nasr, një zonë në lindje të Kajros, ku qytetarët e Gazës jetojnë me qira trefish më të shtrenjta se egjiptianët.
    “Shumë mendonin se do qëndronin për pak muaj. Tani janë të bllokuar”, thotë Abumotawi. Megjithatë, ekziston edhe solidaritet: taksistë e tregtarë që nuk marrin pagesë nga palestinezët. Por, sërish, trauma e luftës dhe lidhja emocionale me Gazën i pengon të rifillojnë.
    Një prej këtyre familjeve është familja Kolutth, që jeton në një apartament të errët. Babai, një ish-funksionar i Autoritetit Palestinez, merr një pension të reduktuar për shkak të një kredie të marrë pak para luftës për të hapur një dyqan, tani i shkatërruar, ndërsa kredia vazhdon. Vajza e tyre, Maysaa, 21 vjeçe, kishte filluar universitetin në Gaza për Siguri Kibernetike, por tani studion online për menaxhim, e mbështetur nga vëllezërit që punojnë në të zezë. Djali i vogël, Nael, 11 vjeç, ndjek mësime online nga Ramallahu.
    “Është i varur nga lajmet për Gazën, shikon vetëm imazhe lufte dhe nuk arrijmë ta largojmë nga ankthi”, thotë Maysaa.
    Të premteve, komuniteti takohet në restorantin Al-Samer, një restorant i njohur më parë në Gaza, i rihapur në Kajro me të njëjtin emër dhe menu. Ahmed, 23 vjeç, punon aty si kamarier për të mbështetur familjen e tij në Gaza. “Punoj mes ushqimit, por ata atje janë të uritur. Paratë i dërgojmë me aplikacione, por ndërprerjet e energjisë e bëjnë të pamundur shpesh”, shprehet ai.
    Omar Saquer, ish-rrobaqepës i njohur në Gaza, humbi gjithçka dhe tani ka hapur një punishte të vogël në Kajro me të birin dhe një punëtor të moshuar me kancer.
    “Për momentin nuk kam leje, mund të më mbyllin çdo ditë. Por nuk mund t’i lë pa rroba qytetarët nga Gaza, edhe kur nuk kanë para. Kam tre vajza, që nuk ekzistojnë ligjërisht: nuk kanë dokumente dhe nuk do marrin diplomë, edhe nëse shkojnë në shkollë.”
    Për të ardhmen, Omar thotë: “Dua të kthehem në Gaza. Por vetëm kur ajo të jetë rindërtuar dhe të mos ketë më Hamas. Ndërkohë, kam duar të mira, vullnet e talent. Pse nuk na hapni kufijtë e Europës?”
    Shkrim nga La Repubblica

  • Egjipti kundërshton zhvendosjen masive të palestinezëve: Është një ‘vijë e kuqe’ për ne

    Egjipti kundërshton zhvendosjen masive të palestinezëve: Është një ‘vijë e kuqe’ për ne

    Zhvendosja e palestinezëve nga Rripi i Gazës është një “vijë e kuqe” dhe Kajro nuk do të lejojë asnjë palë të rrezikojë sigurinë kombëtare ose sovranitetin e Egjiptit, tha të hënën Ministri i Jashtëm egjiptian Badr Abdelatty.

    Në një intervistë për CNN, Abdelatty tha se Egjipti po punon përmes “kanaleve të ndryshme, me objektivin e vetëm për të lehtësuar barrën dhe vuajtjet e palestinezëve”, duke shtuar se emigrimi masiv palestinez nga Gaza nuk do të tolerohet nga vendi i tij.
    “Ne nuk do ta pranojmë, nuk do të marrim pjesë në të dhe nuk do ta lejojmë të ndodhë”, tha Abdelatty për CNN, duke shtuar se zhvendosja do të jetë një “biletë vajtje” për palestinezët nga Gaza, gjë që do të çonte në “likuidimin” e plotë të kauzës së tyre.

    Qeveria izraelite nuk ka dhënë kurrë një vizion të detajuar se çfarë do të ndodhë me Gazën pas luftës, por kryeministri Benjamin Netanyahu ka mbështetur vazhdimisht zhvendosjen e palestinezëve nga Gaza në vende të tjera, veçanërisht pasi Presidenti i SHBA-së Donald Trump e hodhi idenë në fillim të këtij viti. Por edhe pasi Trump u duk se u qetësua ndaj propozimit, zyrtarët izraelitë e kanë përqafuar atë.
    Egjipti është e vetmja rrugëdalje e Gazës me botën e jashtme, pasi Izraeli e ka bllokuar territorin nga toka, deti dhe ajri.
    Kajro është vënë nën presion të fortë publik për të lehtësuar vuajtjet e palestinezëve dhe e ka fajësuar vazhdimisht Izraelin për bllokimin e ndihmave, ndërsa mijëra kamionë mbeten të bllokuar në kufirin e saj.
    I pyetur nëse lufta e vë në rrezik traktatin e paqes Egjipt-Izrael, Abdelatty tha se Kajro po “respekton dhe nderon angazhimet e saj sipas traktatit të paqes”, por shtoi se “çdo lloj zhvendosjeje do të ishte një rrezik i madh dhe ne nuk do të lejojmë asnjë palë të vetme të rrezikojë sigurinë tonë kombëtare dhe sovranitetin tonë në kufirin tonë”.
    Paralajmërimet e ministrit janë ndër më të ashprat që kur Izraeli tha javën e kaluar se është në bisedime me disa vende për të pranuar palestinezët e zhvendosur nga lufta.
    “Nëse izraelitët arrijnë t’i zhvendosin ata, mund t’ju siguroj se ky do të jetë fundi i kauzës palestineze”, tha ministri i jashtëm.
    Egjipti ishte kombi i parë arab që njohu Izraelin në vitin 1979.
    Kryeministri izraelit Benjamin Netanyahu tha javën e kaluar se po zhvillohen bisedime me disa vende për të strehuar palestinezët e zhvendosur.
    Vendet e përfshira janë Sudani i Jugut, Somalilandi, Etiopia, Libia dhe Indonezia, tha një zyrtar i lartë izraelit për CNN. Në këmbim të pranimit të një pjese të popullsisë së Gazës prej më shumë se dy milionë banorësh, zyrtari tha se vendet po kërkojnë “kompensim të konsiderueshëm financiar dhe ndërkombëtar”.
    Nuk është e qartë se sa të avancuara janë këto diskutime dhe nëse ka gjasa që ato të realizohen. Sudani i Jugut hodhi poshtë raportet e mëparshme se ishte në diskutime rreth zhvendosjes së palestinezëve, duke thënë se ato ishin “të pabaza”. Indonezia tha se ishte gati të merrte 2,000 palestinezë nga Gaza për trajtim, por se ata do të ktheheshin në Gaza sapo të shëroheshin.
    Më herët këtë vit, Somalilandi tha gjithashtu se nuk kishte pasur bisedime të tilla.

  • Egjipt/ Zjarr në ndërtesën e telekomunikacionit në Kajro, 4 të vdekur dhe 22 të plagosur

    Egjipt/ Zjarr në ndërtesën e telekomunikacionit në Kajro, 4 të vdekur dhe 22 të plagosur

    Katër punëtorë u vranë dhe të paktën 22 të tjerë u plagosën në një zjarr që shpërtheu të hënën në një qendër kyçe të të dhënave në Kajro, tha të martën për Reuters Hossam Abdel Ghaffar, zëdhënësi i Ministrisë së Shëndetësisë së Egjiptit.

    Ministri i Komunikacionit dhe Teknologjisë së Informacionit i Egjiptit, Amr Talaat, tha në një deklaratë të martën se shërbimet do të rikthehen gradualisht brenda 24 orëve.

    Në një deklaratë të martën, Telecom Egypt shprehu ngushëllime për punonjësit që humbën jetën dhe ofroi mbështetje për familjet e tyre. Zjarri ndërpreu thirrjet telefonike dhe aksesin në internet.

    Ministria e shëndetësisë postoi numra alternativë për shërbimet e ambulancës në të gjitha provincat në rast se njerëzit nuk do të ishin në gjendje të kontaktonin linjën e saj kryesore të ndihmës së shpejtë.

    Përveç thirrjeve telefonike, disa shërbime bankare dixhitale u prekën gjithashtu, duke përfshirë kartat e kreditit, bankomatet dhe transaksionet online, tha një burim bankar të hënën.

  • Zjarri në qendër telekomunikacioni në Kajro, raportohet për të paktën 14 të plagosur

    Zjarri në qendër telekomunikacioni në Kajro, raportohet për të paktën 14 të plagosur

    Të paktën 14 persona janë plagosur nga një zjarr që shpërtheu pasditen e sotme në një ndërtesë të telekomunikacionit në qendër të Kajros, njoftoi Ministria e Shëndetësisë së Egjiptit.

    Sipas televizionit shtetëror, zjarri është vendosur nën kontroll, por për pasojë janë regjistruar ndërprerje të shërbimeve të telekomunikacionit dhe të lidhjes në internet. Disa linja telefonike dolën jashtë funksioni.
    Autoriteti Kombëtar Rregullator i Telekomunikacionit në deklaratën e tij bëri të ditur se zjarri nisi në sallën operative dhe qendrën e kontrollit, që ndodhen në katin e shtatë të Qendrës Telefonike Ramses të kompanisë Egyptian Telecommunications Company.

    Si pasojë, u pezulluan përkohësisht shërbimet e telekomunikacionit. Autoritetet thanë se problemi pritet të zgjidhet brenda orëve në vijim, pasi për arsye sigurie u ndërpre energjia elektrike në të gjithë ndërtesën.
    Një re e dendur tymi ishte parë më herët duke u ngritur mbi lagjen Ramses në Kajro.
    Agjencia zyrtare MENA raportoi se u shmang përhapja e flakëve në pjesë të tjera të ndërtesës dhe në godina përreth. Sipas burimeve nga shërbimet e sigurisë, shkaqet paraprake të zjarrit dyshohet të jenë një qark i shkurtër elektrik.
    Ndërtesa dhjetëkatëshe kishte shërbyer më parë si seli e Ministrisë së Telekomunikacionit.

  • Hamasi hedh poshtë pretendimet: Bisedimet për armëpushim të ri në Gaza nuk kanë përparime të rëndësishme

    Hamasi hedh poshtë pretendimet: Bisedimet për armëpushim të ri në Gaza nuk kanë përparime të rëndësishme

    Situata në Lindjen e Mesme vazhdon të mbetet shqetësuese, mes shkatërrimit të infrastrukturës dhe humbjes së jetëve, pas sulmeve na të dyja palët në Gaza.

    Një zyrtar i Lartë i Hamasit, ka deklaruar se bisedimet e fundit në Kajro, nuk kanë sjellë përparim në një marrëveshje të re armëpushimi me Izraelin në Rripin e Gazës.

    Gjithashtu në një komunikim për mediat zyrtari i Hamasit ka thënë se nuk kanë marrë asnjë propozim të ri për armëpushim në Gaza, ndërsa nënvizojnë se organizata kundërshton çdo mundësi të një armë pushimi të pjesshëm ose të përkohshëm.

    Kujtojmë se të shtunën, të pesë anëtarët e këshillit ekzekutiv të Hamasit ishin në Kajro dhe u takuan me zyrtarë të lartë egjiptianë.

    Ndërkohë në mediat ndërkombëtare, duke cituar burime egjiptiane, u raportua se ishte bërë një përparim i rëndësishëm për të arritur një marrëveshje.

  • Pas Izraelit, Hamasi dërgon delegacion në Kajro për të diskutuar ide të reja armëpushimi në Gaza

    Pas Izraelit, Hamasi dërgon delegacion në Kajro për të diskutuar ide të reja armëpushimi në Gaza

    Një delegacion i Hamasit do të shkojë në Kajro për të diskutuar me ndërmjetësit “ide të reja” për një armëpushim në Rripin e Gazës pas 18 muajsh lufte, tha një zyrtar i lartë i Hamasit për AFP.
    Delegacioni, i cili përfshin kryenegociatorin e Hamasit, Khalil al-Haya, “do të zhvillojë takime me zyrtarët egjiptianë për ide të reja në mënyrë që të arrihet një armëpushim” në enklavën palestineze, tha zyrtari, disa ditë pasi Hamasi refuzoi një propozim izraelit për një armëpushim të përkohshëm.
    Dje, një delegacion izraelit ishte në Kajro për të njëjtën arsye.

    Ndërkohë, një zyrtar i lartë palestinez i tha BBC-së se ndërmjetësit nga Katari dhe Egjipti kishin propozuar një formulë të re për përfundimin e luftës në Gaza.
    Sipas tij, propozimi i ri kërkon një armëpushim që zgjat pesë deri në shtatë vjet, lirimin e të gjithë pengjeve izraelitë të mbajtur në Gaza në këmbim të të burgosurve palestinezë në burgjet izraelite, përfundimin zyrtar të luftës dhe tërheqjen e plotë të trupave izraelite nga enklava palestineze./vizionplus.tv