Tag: kadastrës

Rigels Seliman
Një furtunë e re pritet të godasë ndërtimet e legalizuara në mënyrë të dyshimtë, pas paralajmërimit të fundit të kryeministrit Edi Rama për shtrirjen e aksionit të prishjeve në të gjithë territorin. Pas zonës së Thethit dhe ndërtimeve abuzive që po dëmtonin peizazhin natyror, kryeministri Rama ka vënë në shënjestër edhe ato objekte që, megjithëse të legalizuara, kanë uzurpuar hapësira publike, trotuare, parqe apo rrugë. Ditën e djeshme Rama theksoi se këto legalizime janë bërë në shkelje të ligjit, për interesa klienteliste, dhe se do të anulohen me zero tolerancë, përmes një pakete të re ndëshkimore penale ndaj nëpunësve të përfshirë.
Por në fokus nuk janë vetëm punonjësit e thjeshtë. Pyetja që po ngrihet me forcë është: A do të mbajnë përgjegjësi krerët e Kadastrës, të cilët kanë firmosur ose toleruar këto abuzime? Rasti më i përfolur është ai i drejtoreshës së Përgjithshme të Agjencisë Shtetërore të Kadastrës (ASHK), Lorena Goxhobelli, për të cilën ka pasur akuza të vazhdueshme për lejim dhe nxitje të paligjshmërisë në legalizime.
Kryeministri përmendi një rast flagrant të një lokali që kishte “legalizuar” zaptimin e trotuarit me tenda hekuri, një simbol i haptë i asaj që ai e quajti “çmenduri urbane”. Ai premtoi se të gjitha këto raste do të goditen me forcë, si pjesë e reformës së re për kontrollin e territorit, ku për herë të parë do të përfshihen edhe masa penale për firmëtarët e legalizimeve të paligjshme. Por reagimi i Ramës ngjalli një valë denoncimesh që vërshuan dje në rrjetet sociale nga qytetarët, të cilët komentuan me zemërim ndaj postimit të tij, duke evidentuar sesi kanë vuajtur prej vitesh nga padrejtësitë dhe korrupsioni në Kadastra.
Në fakt, kjo nuk është hera e parë që flitet për këtë vatër abuzimi, pasi edhe gazeta “SOT” ka denoncuar sistematikisht që prej kohësh se Kadastra është kthyer në një çiban të korruptuar të administratës publike, ku ligji shkelet në mënyrë të organizuar nga lart-poshtë, ndërsa drejtoresha e këtij institucioni, Lorena Goxhobelli ngjan më shumë me atë shprehjen “peshku qelbet nga koka”.  Megjithatë teksa shohim deklaratën e kryeministrit Rama, për herë të parë, ai duket se bie në sintoni të plotë me denoncimet mediatike të gazetës “SOT”, duke pranuar publikisht se Kadastra është një vatër korrupsioni dhe paligjshmërie, që ka nevojë për pastrim rrënjësor dhe ndëshkim real, jo vetëm për rojet e portës, por për kokat që kanë firmosur dhënien e pronës publike për interesa private në këmbim të ryshfetit apo interesave të ngushta.
Detajet
Ndërkohë theksojmë se pas Thethit, duket se vala e prishjeve të ndërtimeve dhe objekteve që zënë hapësirat publike do të shtrihet në të gjithë vendin. Konkretisht pas aksionit për lirimin e zonave të përbashkëta, kryeministri ka paralajmëruar se do të goditen edhe ato subjekte që i kanë legalizuar objektet. Sipas tij, kudo që dyshohet se legalizimi është bërë në kundërshtim me ligjin, ai do të anulohet.
Në “Facebook”, Rama ka dhënë dhe një shembull konkret të një lokali që ka legalizuar një shtesë duke bllokuar trotuarin. “Për të gjitha këto lloj çmendurish me qëllim fitimi në kurriz të komunitetit, të cilat kanë marrë dokument legalizimi në hapësirën publike duke ngritur tenda hekuri, jo vetëm që do të reagohet me zero tolerancë duke i anulluar ligjërisht, por do të miratohet së shpejti, si pjesë e reformës së re të kontrollit të territorit edhe një masë për ndëshkimin penal të të gjithë atyre nëpunësve të Aluiznit dje apo të Kadastrës më pas, që kanë firmosur për këto legalizime kriminale në mes të lagjeve të qyteteve tona”, shkruan Rama. Por pyetja e madhe që shtrohet është: Kush realisht do të mbajë përgjegjësi për këtë legalizim?
Ashtu si në Theth ku asnjë institucion nuk mori masa të ndalonte ndërtimet, këtu kemi një nivel akoma më të lartë paligjshmërie. Objekte të caktuara janë legalizuar në shkelje flagrante të ligjit, pra kryeministri duhet të na thotë nëse do mbajë përgjegjësi dikush nga krerët e Kadastrës, duke filluar nga drejtoresha e Përgjithshme, Lorena Goxhobelli, e deri te drejtorët lokalë, të cilët gazeta “SOT” i ka denoncuar në mënyrë sistematike. Sipas asaj që thotë Rama, do e pësojnë nëpunësit e fundit. Por të gjithë e dimë se në këtë batërdi janë përfshirë krerët e organeve kompetente dhe nuk mund të kalohet me ndëshkim të punonjësve të thjeshtë.