Raportet qeveritare për shkeljet e të drejtave të njeriut në Afrikën e Jugut, të përpiluara përpara presidencës së Donald Trump, ndihmojnë në dhënien e besueshmërisë ndaj pretendimeve të tij se afrikanojugorët e bardhë, veçanërisht fermerët, përballen me dhunë të tepruar të motivuar nga raca në vendin e tyre, sipas një analize të gazetës Washington Examiner mbi të dhënat e Departamentit Amerikan të Shtetit.
Raportet për vrasjet e fermerëve të bardhë në Afrikën e Jugut datojnë prej dekadash, duke përforcuar kështu qëndrimin e Trump-it në favor të mbërritjes së afrikanerëve, popullsisë së bardhë pakicë në atë vend, të cilët ai thotë se po ikin me të drejtë nga përndjekja racore.
Më së fundmi, një raport i vitit 2023 i Departamentit të Shtetit, gjatë administratës Biden, mbi kushtet e të drejtave të njeriut në Afrikën e Jugut, citoi gjetjet e një organizate të shoqërisë civile lidhur me dhunën ndaj fermerëve të bardhë: në vitet 2021 dhe 2022, ndodhën afro 750 sulme dhe më shumë se 100 vrasje.
Megjithatë, raporti vuri në dukje se ndërsa disa grupe avokuese pretendonin se këto grabitje, hyrje me forcë në banesa dhe vrasje ishin të motivuara nga urrejtja racore, vëzhgues të tjerë i atribuonin këto ngjarje nivelit jashtëzakonisht të lartë të kriminalitetit në Afrikën e Jugut. Sipas studimeve mbi kriminalitetin afrikan, vitin e kaluar Afrika e Jugut u rendit si vendi më i rrezikshëm në kontinent, me një nga normat më të larta të vrasjeve në botë.
Por vrasjet masive të fermerëve të bardhë në Afrikën e Jugut janë një problem i vazhdueshëm që i paraprin mandatit të parë të Trump-it.
Raportet e mëhershme të Departamentit të Shtetit për shkeljet e të drejtave të njeriut në Afrikën e Jugut kanë dokumentuar në mënyrë të përsëritur, që nga viti 1999, shqetësime se fermerët e bardhë po bëhen “objektiva racore.”
“Vrasjet dhe krimet e tjera të dhunshme ndaj fermerëve të bardhë dhe, herë pas here, ndaj familjeve të tyre, vazhduan në zonat rurale,” ka shënuar Departamenti i Shtetit në raportet vjetore për Afrikën e Jugut që nga ajo kohë.
Raporte të tjera gjatë viteve kanë përmendur “vazhdimin e vrasjeve të pronarëve të fermave, kryesisht të bardhë, nga agresorë të zinj,” megjithëse Departamenti i Shtetit theksonte se studimet treguan se autorët ishin “zakonisht kriminelë të zakonshëm të motivuar nga përfitimi financiar” dhe “nuk ka prova që vrasjet të jenë pjesë e një konspiracioni politik të organizuar.”
Në një raport të vitit 2013, Departamenti i Shtetit raportoi se 68 fermerë të bardhë u vranë gjatë 176 sulmeve nga agresorë të zinj gjatë vitit të mëparshëm, një rritje prej 34% krahasuar me periudhat e raportimit të mëhershme, sipas statistikave të Unionit Bujqësor të Transvaalit në Afrikën e Jugut. Instituti i Marrëdhënieve Racore i Afrikës së Jugut tha se fermerët komercialë, që ishin kryesisht të bardhë, kishin “dyfish më shumë gjasa të vriteshin sesa qytetari mesatar,” sipas raportit të Departamentit të Shtetit.
Raporti i vitit 2012 vuri në dukje se ende nuk kishte pasur arrestime në lidhje me vrasjet e shkurtit 2011 të fermerëve të bardhë Deon van Staden, 51 vjeç, dhe Babs Strecker, 73 vjeçe, të cilët u goditën dhe u rrahën për vdekje me lopatë në shtëpinë e tyre.
Organizata Genocide Watch, e themeluar nga ish-zyrtari i Departamentit të Shtetit Gregory Stanton, deklaroi se vrasjet masive të fermerëve të bardhë “vazhdojnë me pandëshkueshmëri.” Sipas raportit të saj për vendin, autoritetet vendore kanë dështuar të ndjekin penalisht këto vrasje që synojnë të terrorizojnë fermerët e bardhë që të largohen nga Afrika e Jugut.
“Shumë prej këtyre vrasjeve janë krime urrejtjeje,” shkroi Genocide Watch. Me nxitjen e partisë nacionaliste të zezë Luftëtarët e Lirisë Ekonomike (EFF), e cila nxit dhunën kundër të bardhëve, autorët e krimeve do t’i torturonin, përdhunonin dhe sakatonin viktimat e tyre. Fermerët e bardhë shpesh janë të pambrojtur sepse Afrika e Jugut ka ndaluar posedimin privat të armëve dhe ka shpërbërë bashkësitë e vetëmbrojtjes të organizuara dikur nga fermerët, shpjegon Genocide Watch.
Sipas Genocide Watch, Afrika e Jugut ndodhet në “Fazën 6: Polarizimi” të procesit gjenocidal të përshkruar nga Stanton, modeli 10-fazor i të cilit përdoret gjerësisht për parandalimin e gjenocidit në mbarë botën. Fermerët e bardhë janë emëruar si një grup i veçuar dhe i shënjestruar.
Më herët këtë muaj, Trump mirëpriti dhjetëra afrikanerë për t’u vendosur në SHBA si refugjatë, duke thënë se ata janë objektiv i një gjenocidi dhe po humbin tokën e tyre për shkak të konfiskimeve të ligjshme të pronës së bazuara në racë. Kritikët që kundërshtojnë ardhjen e tyre pretendojnë se ky diskriminim racor nuk arrin nivelin e një gjenocidi, ose madje se diskriminimi nuk ekziston fare.
Në një takim në Zyrën Ovale me presidentin e Afrikës së Jugut, Cyril Ramaphosa, javën e kaluar, Trump tregoi pamje filmike të urrejtjes së hapur kundër afrikanerëve, të njohur gjithashtu si boerë. Pamjet tregonin liderin militant të së majtës ekstreme, Julius Malema, duke brohoritur “Vritini boerët” në një miting në mars. / Washington Examiner – Syri.net
