Tag: jashtme

Rigels Seliman
Parlamenti Evropian përmes një deklaratë që tund skenën politike shqiptare, ka lëshuar një sinjal të fuqishëm, se reforma në drejtësi nuk negociohet dhe Prokuroria e Posaçme (SPAK) është një vijë e kuqe që askush nuk guxon ta prekë. Në raportin e përvitshëm për politikën e jashtme dhe të sigurisë, PE jep mbështetje të pakushtëzuar ndaj institucioneve të reja të drejtësisë në Shqipëri. Mesazhi shkon direkt për Ramën, Berishën, Xhafajn dhe çdo figurë politike që tenton të zhbëjë arritjet e reformës. “Çdo përpjekje për të minuar SPAK do të hasë rezistencë të fuqishme nga BE-ja”, thuhet në raportin e eurodeputetit David McAllister. Në të njëjtën linjë me SHBA-të, edhe Brukseli mbështet pa asnjë hezitim integritetin e SPAK.
Gjithashtu Parlamenti Evropian i kërkon opozitës dhe mazhorancës të lënë mënjanë konfliktet dhe të ndërtojnë një klimë të re politike. Polarizimi ekstrem në Shqipëri shihet si pengesë për integrimin dhe BE kërkon dialog të sinqertë. Po ashtu, raporti vlerëson përputhshmërinë e Shqipërisë me politikën e jashtme të BE-së, duke e konsideruar këtë si një sinjal pozitiv për negociatat. Megjithatë mesazhi i Brukselit është i qartë: drejtësia është themeli i integrimit, dhe kush e prek, do të përballet me pasoja të rënda.
Qëndrimi i PE
Konkretisht Parlamenti Evropian i ka dërguar një mesazh të fortë klasës politike. Pas DASH që shprehej se mbështet integritetin e SPAK, PE kujdeset t’i dërgojë mesazh Ramës, Berishës, Xhafajt dhe kujtdo tjetër që mendon se mund të zhbëjë reformën, se duhet ta harrojnë këtë gjë. Në raportin vjetor mbi implementimin e Politikës së Jashtme dhe Sigurisë, hartuar nga eurodeputeti David McCallister, Parlamenti Evropian i jep mbështetje absolute reformës në drejtësi. “Parlamenti Evropian mirëpret ambicien e Shqipërisë për të përmbyllur me shpejtësi negociatat e anëtarësimit; nënvizon nevojën për të intensifikuar më tej reformat për të adresuar mangësitë që vazhdojnë të jenë të pranishme në lidhje me ‘themelet’, veçanërisht për sa i përket sundimit të ligjit, luftës kundër korrupsionit dhe krimit të organizuar; paralajmëron kundër çdo përpjekjeje për të minuar punën e institucioneve të pavarura, siç është Struktura e Posaçme kundër Korrupsionit dhe Krimit të Organizuar (SPAK)”, thekson PE.
Po ashtu ka dhe një mesazh për klasën politike. PE kërkon nga opozita dhe mazhoranca të kontribuojnë për një klimë politike më miqësore. “Parlamenti Evropian thekson rëndësinë e një pluralizmi politik funksional dhe një opozite konkurruese dhe bën thirrje për dialog dhe angazhim konstruktiv midis shumicës dhe opozitës, për të kapërcyer polarizimin e theksuar politik në vend dhe për të nxitur procese demokratike gjithëpërfshirëse që respektojnë të gjitha palët, përfshirë pakicat greke, rome dhe egjiptiane në vend”, vijon raporti. Në fund Raporti i Parlamentit Evropian vlerëson përputhjen e plotë të vendit tonë me politikën e jashtme dhe të sigurisë të Bashkimit Evropian, përfshirë edhe me masat kufizuese të BE kundër Rusisë dhe Bjellorusisë.