Tag: jashtme

Ish-ministri i Jashtëm Igli Hasani ka reaguar në rrjetet sociale lidhur me shkarkimin nga detyra si ministër, sot në mbledhjen e Asamblesë së PS-së dhe zëvendësimit të tij me Elisa Spiropalin.
Rama e kritikoi në mbledhje drejtimin e ministrisë prej Hasanit në mënyrë indirekte duke thënë se kjo Ministri mbledh pluhura dhe punon në një orar tjetër, ndryshe nga ai i Shqipërisë.
Ministria ka nevojë për ndryshim dhe përshpejtim të të bërit të punëve sipas Ramës, gjë të cilën e përmbush një njeri “që nuk i pushon goja” si Elisa Spiropali.
Hasani, nga ana tjetër thekson se e ka kryer detyrën me bindjen se e vetmja mënyrë për zgjidhjen e punëve në atë ministri ishte besimi te diplomacia bashkëpunuese, e përmbajtur dhe efikase.
Reagimi i ish-Ministrit për Evropën dhe Punët e Jashtme:
Për një diplomat, është një nder i jashtëzakonshëm, por edhe një përgjegjësi e madhe të drejtojë Ministrinë për Evropën dhe Punët e Jashtme. Për dy vitet e fundit, pata këtë privilegj, duke u përpjekur çdo ditë ta shoh punën me sytë e kolegëve dhe të mbështes, me përulësi, shërbimin e rëndësishëm të përfaqësimit dinjitoz të Shqipërisë dhe interesave të saj në botë.
E kam kryer këtë detyrë me bindjen se rruga e vetme e qëndrueshme është forcimi i institucioneve dhe integriteti, dhe se diplomacia efikase i ka rrënjët në bashkëpunim, përmbajtje dhe besueshmëri.
Faleminderit Kryeministrit Rama për besimin e dhënë dhe urime Znj. Spiropali për këtë përgjegjësi. Mirënjohës për kolegët dhe partnerët, brenda dhe jashtë vendit, që ndanë këtë rrugëtim.
Fjala e Ramës në Asamble referuar Igli Hasanit:
Ministria për Europën dhe Punët e Jashtme, është një tjetër vend mbledhje pluhurash, të kohës që në atë ministri, matet me qetësi olimpike. Ministria e Jashtme jeton në një zonë orare tjetër, ma besoni këtë. Një zonë orare e ndryshme nga ora e Shqipërisë, ndërkohë që shërbimi i jashtëm ku fatmirësisht kemi disa ambasadorë të nivelit më të lartë europian, është një trup që në tërësinë e vetë, ecën me xhiro të ngadalësuara dhe nuk jep dot atë që me të drejtë pritet prej tij, sidomos në planin e diplomacisë ekonomike, ku me gjithë kërkesën time këmbëngulëse, prej vitesh rezultatet janë modeste, nuk ndryshojnë dhe janë shkurajuese, por ka dhe një arsye tjetër, më e rëndësishme për ta ndryshuar drejtimin e kësaj ministrie.
Në këtë fazë të re, ku na duhet të përgatitemi për një ofensivë diplomatike si asnjëherë më parë sepse procesi ka negociatat, por ka dhe gjithë qeveritë, ministritë e jashtme, parlamentet që do të duhet të votojnë anëtarësimin e Shqipërisë, duhet që ta çojmë në maksimum mbështetjen politike të anëtarësimit dhe na duhet në krye të diplomacisë shqiptare, një profil maksimalisht politik dhe me aftësi të spikatur për të mos i pushuar goja, që natyrisht është Elisa Spiropali.
E shoh të rëndësishme të nënvizoj diçka këtu, që Ervin Hoxha ashtu si dhe Igli Hasani, të cilit duhet t’i besojmë Komisionin e ri Parlamentar për Europën dhe Punët e Jashtme, kanë bërë që të dy punën e tyre me seriozitet dhe për kohën që patën në dispozicion, kanë vazhduar të mbajnë timonin drejt, por në krye të atyre dy prej ministrive më të prapambetura, ato, jo prej, por janë ministritë më të prapambetura, në aspektin e mendësisë së administratës, duhet tërmet. Tërmet Peçin e kemi deputet, nuk e bëjmë dot ministër të Brendshëm, sikundër më thanë që ishin shprehur disa shoqata në Tepelenë dhe disa portale në Tiranë.