Pas dy ditësh testesh fizike, për Interin ka ardhur dita e parë e stërvitjes në “Appiano Gentile”, ku pasditen e sotme pritet edhe trajneri i ri i Italisë, Rino Gattuso. Programi parashikon dy seanca stërvitore në ditë, të mbyllura për publikun, dhe grumbullim në qendër stërvitore për të gjithë lojtarët zikaltër.
Të vetmit që mungojnë janë: Taremi, me leje. Frattesi, në rikuperim pas operacionit për hernie inguinale më 10 korrik. Vanheusden, që vjen nga një sezon te Mechelen dhe do të kryejë një provë me ekipin spanjoll Marbella. Ja deklaratat e trajnerit Chivu në konferencën për shtyp.
Me çfarë fryme po e nisni sezonin e ri?Me frymën e duhur për të qenë konkurrues. Pritshmëritë për këtë skuadër janë gjithmonë të njëjtat, duhet t’i arrijmë objektivat.
Sa e ndihmon puna juaj një grup kaq të rëndësishëm?Një skuadër fituese që lufton për trofe dëshmon se grupi është i qëndrueshëm dhe solid.
Si do të luajë Interi i Chivu?Qëllimi ynë është të jemi agresivë, vertikalë, por duke ruajtur ekuilibrin si ekip.
A është kampionati, prioriteti kryesor për Interin?Nuk kemi për të marrë hak apo luajtur për revansh. Ne duhet të ndërtojmë për të ardhmen. Kemi detyrimin ta mbajmë këtë skuadër në majat e futbollit. Do të japim gjithçka për t’i arritur objektivat. Ky grup dhe kjo shoqëri janë të bashkuar dhe të vendosur të qëndrojnë lart në Itali dhe në botë.
Çfarë do të kërkoni nga lojtarët tuaj?Respekt për shokët e skuadrës dhe për klubin që përfaqësojnë. Duhet të dimë t’i menaxhojmë uljet dhe ngritjet.
Conte hodhi sloganin e tij për Napolin. Cili është slogani i Interit?Nuk kopjojmë askënd. Duam të jemi kompetitivë.
Çfarë iu thatë lojtarëve në Charlotte?Diskutime të tilla janë vetëm pjesë e grupit. Dhe grupi ndonjëherë ka nevojë për qartësi.
Si do t’i kapërceni pasojat e finales së Champions League?Jemi një grup i pjekur, me njëfarë eksperience, që di si t’i menaxhojë momente të caktuara. Dimë të pranojmë edhe kritikat, t’i përballojmë situatat e pakëndshme në aspektin mendor. Pritshmëritë për këtë skuadër ishin shumë të larta në maj, fatkeqësisht gjërat nuk shkuan siç i kishin imagjinuar të gjithë. Në aspektin psikologjik diçka zien, ka shumë zhgënjim, sepse kishte shumë dëshirë për të arritur diçka të rëndësishme. E bukura e futbollit është se gjithmonë vjen një ndeshje apo një sezon i ri dhe gjithçka nis nga e para, edhe pse duhet të pranosh realitetin. Ato që thuhen duhet të të shërbejnë si motivim për të ardhmen.
Leoni dhe Pio Esposito…Janë shumë premtues. Do të jenë e ardhmja e futbollit italian, për shumë vite do të përfaqësojnë kombëtaren italiane.
Çfarë po ju pëlqen më shumë deri tani tek Interi?Përgjegjësia që më është dhënë. Gjithmonë i kam marrë përsipër, gjithmonë i kam pranuar, për të arritur edhe objektivat e mi personalë. Është një sfidë e bukur të rikthehem te klubi që më ka dhënë kaq shumë. Nuk bëhet fjalë vetëm për këtë, por edhe për një klub që është në majat e futbollit. Do të bëj më të mirën për të qenë në nivelin e duhur, për të dhënë diçka ose për t’i kthyer diçka klubit që më ka dhënë shumë gjatë këtyre 18 viteve, me disa ndërprerje. Këto janë ambiciet e mia. Interi është gjithmonë në zemrën time, dua të jap edhe unë diçka të rëndësishme.
Sa do të duhet të presim për Interin e Chivu?Dallimin e bëjnë lojtarët, kjo është gjëja më e rëndësishme. Trajneri jep identitetin. Nuk kam parë kurrë një trajner të mirë të ecë përpara pa lojtarë të fortë.
A mund të luajë Calhanoglu në një rol tjetër?Mesfusha është e mbushur, kemi shumë lojtarë, shumë të mirë dhe të fortë. Do të jenë dy apo tre? Në disa ndeshje dy, në disa të tjera tre. Emrat do të zgjidhen në bazë të kundërshtarit dhe në bazë të performancës gjatë javës. Jam i lumtur që Calhanoglu është rikthyer i shëndetshëm, që ka dëshirë të rikuperojë. Në SHBA ishte i mërzitur që nuk mundi ta ndihmonte skuadrën. Ka punuar shumë fort këto tri javë, edhe sot e pashë në formë të mirë.
A mund ta përballojë mesfusha që keni tre sulmues përpara?Nuk kam thënë kurrë se do të luajmë kështu. Në futbollin e sotëm vendosja në fushë varet nga ajo që të lejon kundërshtari, janë gjëra që duhet t’i interpretojmë. Duhet të pranosh duelet. Kush fiton duelet, fiton ndeshjet. Ne përqendrohemi te parimet e lojës, për këtë arsye duam të kemi një identitet.
Si mund të bëni diferencën?Do të ndikoj me gjykim të shëndoshë, me zemërim, me buzëqeshje, me përgatitje më të mirë me lojtarët, do të përpiqem t’i kuptoj ata. Ndonjëherë harrohet se kemi të bëjmë me njerëz që kanë diçka në mendje, duhet të kuptojmë si t’i rregullojmë gjërat. Besoj shumë te komunikimi, në atë që një person mund t’i japë një tjetri. Më pëlqen ky stil jete. Nuk është rastësi që kam kaluar gjashtë vite te sektori i të rinjve, kam dashur të mësohem të jem empatik. Pastaj kam punuar me djem më të pjekur dhe tani merrem me lojtarë që janë kampionë të mëdhenj.
