Pas publikimit të fakteve tronditëse mbi mënyrën sesi kompania Bankers Petroleum ka përvetësuar pasurinë kombëtare pa paguar asnjë lekë taksa për mbi dy dekada, dalin tashmë edhe emrat konkretë të përfituesve politikë që janë fshehur pas “studiove ligjore” që dyshohet se kanë marrë miliona euro për “konsulenca” fiktive. Deklaratat e forta që për vite janë injoruar apo quajtur “sulm politik”, po rezultojnë sot të mbështetura nga shifra zyrtare dhe të dhëna që nuk lënë vend për dyshime: deputetë, ish-ministra dhe avokatë të lidhur me kupolën politike, përfshirë emra të afërt me Shkëlzen Berishën rezultojnë të kenë përfituar 11.5 milionë euro nga Bankers Petroleum, përmes tre studiove juridike me staf minimal. Skema e përfitimeve është e qartë: studio me vetëm 2 apo 3 punonjës, të regjistruara nga njerëz të lidhur me Partinë Socialiste, Partinë Demokratike dhe ish-zyrtarë të lartë, kanë përfituar miliona euro, ndërkohë që vetë Bankers disponon një zyrë juridike të brendshme me mbi 15 punonjës.
Emrat
Besnik Çerekja, i njohur edhe si avokat i Shkëlzen Berishës, rezulton pjesë e dosjes së zhvatjes 20-vjeçare të pasurisë nëntokësore shqiptare nga kompania Bankers, në bashkëpunim me politikanë dhe oligarkë. Pedagogu i Fakultetit të Drejtësisë, gjatë periudhës 2020-2025, ka marrë rreth 4.4 milionë euro nga komapania Bankers, me faturime të dyshuara si fiktive dhe për shërbime vetëm në letër. Avokati i Shkëlzenit i ka përfituar paratë përmes studios së tij ligjore Studio Legale Cerekja shpk dhe Besnik Cerekja PF. Rreth 2.8 milion euro i ka përfituar përmes subjektit ‘Besnik Cerekja PF’ me dy punonjës. Bankers kishte të punësuar me kohë të plotë ekspertë ligjorë, madje me rroga marramendëse, dhe nuk kishte nevojë për shërbimet e Besnik Cerekjas. Atëherë pse Bankers i ka dhënë 4.4 milionë euro avokatit Besnik Cerekja, duke përfituar 20 % të shumës rimbursim me TVSH, fryrë shpenzimet dhe evituar taksat?
Përfitimet e Alket Hysenit
Po aq flagrant është implikimi i ish deputetit socialist (2017-2021), Alket Hyseni, i cili ka përfituar 6 milionë euro nga Bankers për shërbime të dyshuara si fiktive, përmes zyrës së tij ligjore H&A Laë Firm, në administrim nga kunati i tij, Idajet Çelaj. Zyra ligjore, themeluar nga babai pensionist i Hysenit, Namik Hyseni, është lakuar edhe për implikim në zhvatje pronash në jug të vendit, kur Hyseni udhëhoqi task-forcën e ngritur nga kryeministri Edi Rama për të verifikuar tjetërsimin e paligjshëm të pronave shtetërore. Hysenit i përfundoi mandati i deputetit në 2021. Në tetor të 2022 Hyseni mori 51 % të aksioneve të studios ligjore dhe në vitin 2024 100 % të aksioneve. Hyseni, i cili ka nisur karrierën 25 vite më parë si doganier në Kakavijë, në 2016 bëhet drejtor i përgjithshëm i Drejtorisë së Parandalimit të Pastrimit të Parave dhe një vit më vonë deputet. Ka dyshime të forta se Hyseni, në këtë detyrë, ka konstatuar pastrimin masiv të parave nga Bankers, i konfirmuar nga Prokuroria e Fierit. Në vend të denoncimit në Prokurori, Hyseni dyshohet se ka hyrë në pazar me Bankersin, duke ndarë bashkë një pjesë të parave. Hetimi i Prokurorisë ka zbuluar se Bankers i ka dhënë 6 milionë euro Alket Hysenit përmes zyrës së tij ligjore nga viti 2014 deri në vitin 2025. Mbetet për t’u parë nëse Hyseni, edhe si deputet, ka favorizuar Bankers.
Përfitimet e ish-ministrit dhe ish-deputetit Eduard Halimi
Gjithashtu, Murrizi u shpreh dje se një studio tjetër është e një ish ministri dhe deputeti te PD dhe ka mare 2.7 milion euro nga shkurti 2019 kur PD dogji mandatet deri ne prill 2025 dhe ka vetëm 2-3 punonjës te punësuar. Mësohet se ajo është Halimi Tax and Law e ish ministrit të drejtësisë Eduart Halimi.
Përse nuk po e heton SPAK?
Hetimi ndaj Bankers Petroleum nisi si referim nga Drejtoria e Hetimit Tatimor tek prokuroria e Fierit, duke u konsideruar fillimisht si evazion fiskal dhe mashtrim financiar, jo si korrupsion institucional i nivelit të lartë. Hetimi u fokusua te mos-pagimi i tatimit mbi fitimin dhe rimbursimet e parregullta të TVSH-së . Sipas prokurorisë së Fierit, Bankers ka nxjerrë dhe shitur naftë me vlera marramendëse gjatë periudhës 2004‑2024, por ka deklaruar humbje rreth 11.7 miliardë lekë, dhe ka përfituar rimbursime TVSH . Kjo shifër e madhe është trajtuar si parregullsi fiskale dhe jo si korrupsion dhe këtu fillon problem. Në pamje të parë, mungon indikacioni se zyrtarë qendrorë (ish-ministra apo ministra, deputetë apo ish-deputetë, funksionarë të lartë, të sotëm dhe të djeshëm) janë përfshirë, mirëpo, duke qenë se dëmi i shkaktuar shtetit është shumë i madh, SPAK duhet të nisë një hetim ndaj politikanëve që kanë pasur përgjegjësi dhe kanë mbyllur sytë përballë kësaj afere të madhe. Deri më sot, hetimi është mbajtur në nivel lokal pa dyshime se janë përfshirë zyrtarë të lartë, mirëpo shifra e lartë e dëmit ekonomik së bashku me pasojat sistematike mbi buxhetin, i jep rastit një rëndësi të veçantë dhe kërkohet patjetër një hetim nga Prokuroria e Posaçme, e cila, nga ana e saj, mund ta nis pa pasur nevojën e një referimi formal. Në kushte normale, SPAK duhet ta marrë drejtimin e Hetimit të Bankers, sepse bëhet fjalë për një kompani që operon që në 2004 dhe vëtëm pas kaq shumë vitesh është kujtuar prokuroria për ta hetuar si çështje.
