Tag: haxhiut

Dy figura të njohura të artit dhe medias shqiptare, Osman Mula dhe Mevlan Shanaj, kanë reaguar ashpër ndaj deklaratës së analistit Baton Haxhiu, i cili së fundmi ka propozuar publikisht mbylljen e Radio Televizionit Shqiptar (RTSH). Sipas Haxhiut, ky institucion historik “duhet të shuhet”, deklaratë që është përkufizuar si provokim, injorancë dhe agjendë e rrezikshme kundër institucioneve publike. Artisti i njohur Osman Mula nuk ka kursyer gjuhën në adresë të Baton Haxhiut, duke e cilësuar atë si “personazhi më i keq në historinë e gazetarisë shqiptare”. Reagimi i tij është i gjatë dhe i mbushur me akuza të drejtpërdrejta, ku ai e përshkruan Haxhiun si të “padëshiruar” në Shqipëri dhe Kosovë, të paguar për të shkatërruar institucionet, dhe me agjenda të errëta.
“S’kisha dëshirë me shkru duke të pas ty si personazh se s’kam pas, as nuk kam asnjë lloj konsiderate për ty. Nuk kam parë asnjë rast që të vij një njeri i pa ftuar dhe ta marrin fjalën në një ambient duke u përpjek me të mbush mendjen dhe me ta imponu qëndrimin ndaj vendit, politikës, problemeve sociale dhe medias. Pasi leh nëpër stacione për politikën se cilin duhet të votojmë dhe kush është udhëheqësi më i mirë Shqiptar tani na u shfaqe duke na dhanë mend që tani duhet të shkrihet RTSh. Do të thotë që një institucion i rëndësisë të veçantë 65 vite ekzistencë, një institucion që e mbajti gjallë për dekada popullin, këtej dhe matanë kufirit me programe, ngjarje të mëdha epokale, historike, kulturore, sociale, duke hapur dhe një drejtori pas viteve 90 për diasporën duke u ndjekur në çdo vend të botës. Na del ti mor i pafytyre dhe do me na e mbush mendjen ne që u plakem në këtë institucion me një armatë mjeshtrat të mëdhenj të ekranit se duhet mbyll se kështu mendoj unë. Po kush të mbron apo kush të përkrah ty mor i pa dëshiruar edhe në Kosovë edhe në Shqipëri që vjen këtu dhe nuk len radhë njeriu për të folur kur ti nuk përfaqëson asnjë njeri apo komunitet? Po të jetë si Shqiptar ti nuk më përfaqëson, po të jetë si kosovar se prej andej jam, mos ta pafsha bojën mor spiun.
A në përfaqësosh qeverinë Shqiptare mjerë ne mor i pa fytyrë. Sa te Syri sa të Opinion, sa te Top Chanel e tek A 1. Kot nuk je këtu dhe as kot nuk paguhesh me pare të madhe, por e gjitha sipas mendimit tim, ti je i ardhur apo i ftuar nga qarqe shumë të rrezikshme në dëm të Shqipërisë. Po ne pse nuk ndërhyjmë në punën e vëllezërve tanë në Kosovë? As nuk i themi voto këtë apo këtë, as hiqe këtë apo veje këtë sepse Kosova ka institucionet e saj dhe nuk dua të ndërhyjmë se sasht as normale, as etike se nuk i shërben interesit reciprok. Por të ndërhysh ti këtu dhe pikërisht të japësh ti definicionin që të mbyllet RTSH, më krijon një shqetësim të madh. Ne sapo u mblodhëm si Këshill Drejtues, Drejtoria e Përgjithshme, AMA, kryesia e medias e Parlamentit Shqiptar, krijues dhe gazetarë mjaft të njohur se si duhet ta rrisim cilësinë programore dhe po përpiqemi çdo ditë, na del ti që duhet të flasësh i fundit na e merr fjalën i pari.
Ti o je delirant, i paguar po që po, i futur nga dikush që don të ngrejë kulla dhe ty të ka premtu për ndonjë hale, larg qoftë me të ba dhe kokën ty në katet e larta. Pas 90 në festivalet tona u bë sofër e përbashkët me të gjithë krijuesit e Kosovës ku ti ishe shpesh herë edhe në juri. Edhe figurat e patriotëve shkrimtarëve, njerëz të pajtimit të gjaqeve, luftës çlirimtare të Kosovës ku shumë operatorë tanë kanë xhiruar brenda territoreve të luftes si I.Buçpapaj etj. Ti po ndërhyn në bukën tonë të përditshme prandaj si hyre del mor horr nga problemet tona se po na sjell pshtjellim. Shpesh herë them: Eh moj Kosovë, nxore shumë heronj të mëdhenj si Adem Jashari apo Mandela i Kosovës A.Demaçi. Figura si Bekim Fehmiu apo Fadil Vokrri, por na nxore fatkeqësisht dhe një model të së keqes Baton Haxhiun – personazhi me i keq në historinë e gazetarisë Shqiptare”, përfundon ai reagimin.
Reagimi i Mevlan Shanajt
Edhe regjisori dhe aktori Mevlan Shanaj, një nga figurat themeluese të RTSH, ka reaguar me shqetësim ndaj idesë për ta shuar këtë institucion. Shanaj i kujton Baton Haxhiut se mendimi progresiv nuk është të shkatërrosh, por të ndërtosh, dhe se RTSH duhet reformuar dhe përmirësuar, jo shuar. “Baton Haxhiut! Ke vite që në median shqiptare shfaqesh si një ndër analistët e shumtë,duke stërthënë apo mbrojtur interesa të caktuara politike dhe jo ato publike, si po thuaj të gjithë ju të paguarit! Po që të vije në mënyrë publike me guxim dhe mendim të ditur “për mbylljen e RTSH” kjo ide shkatërrimtare nga ti po më çudit! Baton, mençuri nuk është të shkatërrosh, por të ndërtosh! Jam ndër themeluesit e RTSH së! Një institucion si RTSH mbrohet me krijimtari serioze! Krijimtaria i jep personalitet atij institucioni! Grupi ynë arriti të ndërtonte një televizion me atë arkiv që citoni ju! Sipas meje ka disa vite që nuk është politika ajo që deformon nivelin artistik të RTSH por pa aftësi e menexhimit në përthithje të personelit me ambicie krijuese! Nga sa kam kuptuar, aty është mbytur roli i regjisorit apo gazetarit krijues!
Vetëm këto figura krijojnë fytyrën artistike! Sa për garën politike mendoj se RTSH është shumë komod, pasi forcat politike kanë nënshtruar kanalet private të cilat janë nonstop media në shërbim të përfaqësimit respektiv politik nën shëmbëlltyrën e shëmtuar të politikës siç behej në redaksitë politike në RTSH vite të shkuara, por ne të krijimtarisë artistike e kishim fituar garën me spektakle, koncerte, dokumentarë, drama apo filma ! Ne kishim publikun me vete! Baton, jepe kontributin tënd për t’i shërbyer publikut shqiptar me ide krijuese dhe jo shfaruese! Kam bindje se distancimi nga format artistike apo programet cilësore sociale ka çimentuar distancimin nga publiku! Lidhur me idenë për të ftuar specialistë nga BBC, kjo rrugë duhet ndjekur duke mos u mbyllur, por duke transformuar me ndërhyrje të veçanta! Tokës i ndërrohen bimët por nuk e groposin! Po të thotë një njeri që punoi më se 30 vjet në atë Institucion që e di çdo të thotë kontroll, censurë dhe dënime, por jo deri në këtë pikë siç po thua ti, pasi kam dëgjuar në këto kohë dhe fjalën asgjësim! Hapësirat publike nuk janë të nevojshme vetëm për territore, por edhe për botën e komunikimit, informacionit dhe artit!”, shprehet ai.