Propaganda e Edi Ramës për lirimin e hapësirave publike ka kaluar çdo limit. Jo vetëm prishje tendash të bizneseve, por edhe punën për zënien e hapësirave me kulla e palate e shet si lirim hapësirash publike. Dje policia, IMT dhe Policia Bashkiake u vunë në dispozicion të një firme ndërtimi që do të vendoste rrethimin e kantierit në mes të rrugës që përdorej nga banorët. Kjo situatë shkaktoi edhe tensione e përplasje me banorët, ku pati edhe të shoqëruar.
SYRI TV
Këto pamje janë hedhur në Facebookun zyrtar të kryeministrit të vendit Edi Rama. Në këtë video ai ka propaganduar që prishja e këtij muri është pjesë e lirimit të hapësirave publike të cilat sipas kreut të qeverisë janë zënë në mënyrë të padrejtë, por të lejuara nga administrata e Bashkisë së Tiranës e drejtuar nga Erion Veliaj prej 2015.
Në fakt e vërteta është ndryshe, muri që kryeministri propagandon se po prishet për të liruar hapësirat publike, në fakt është e kundërta. Muri u prish për t’i zënë hapësirën publike qindra banorëve në qendër të Tiranës. Ajo që kryeministri propagandon si lirim hapësire publike në fakt është një aksion i IKMT, Policisë Bashkiake dhe Policisë së Shtetit, që dje u vunë në dispozicion të një firme private ndërtimi, që do të ndërtonte një pallat 10 katësh për llogari të Kishës Ortodokse. Syri Televizion ishte aty për të parë situatën pas një denoncimi të qytetarëve.
Banorët e pallatit ngjitur kanë kundërshtuar prishjen e murit dhe janë përplasur me punonjësit e IMT-së dhe policisë. Sipas tyre, prishja e murit po bëhet me qëllim që rrethimi i kantierit të bëhet në mes të rrugës, për shfrytëzimin total të hapësirës nga kantieri, por në kurriz të tyre, duke i bllokuar madje edhe hyrjen e pallatit. Zënia e rrugës në mes të Tiranës për ndërtimin e pallatit ka sjellë edhe konflikt mes banorëve dhe Policisë, të angazhuar për mbrojtjen e kantierit të ndërtimit.
Megjithë kundërshtitë e banorëve dhe premtimin se muri nuk do të prishet dhe hapësira e tyre publike nuk do të cënohet, kjo nuk ka ndodhur.
Por tallja me këta banorë arriti kulmin, kur kryeministri, zënien e rrugës dhe hapësirës publike për ndërtim pallati, e shet si aksion për lirim të hapësirës publike.
