Tag: hajdari

Si sot 27-vite më parë, u vra në një atentat Azem Hajdari, në atë kohë deputet i PD. Edhe sot e kësaj dite, kjo vrasje ka shumë mister brenda pasi nuk dihet se kush e porositi vrasjen e tij dhe cila ishte arsyeja e vërtetë. Ditën e ekzekutimit, Azem Hajdari ndodhej në qytetin e Fierit, ku edhe merrte pjesë në një miting të organizuar nga Partia Demokratike, më pas u ndal në Lushnje dhe pasdite mbërriti në Tiranë. Në mbrëmje ai njoftohet se dikush e priste poshtë, ku ishin Fatmir Haklaj dhe Jaho (Salihi) Mulosmani. Kjo është dhe pjesa më e debatueshme, pasi ka shumë nga ata që thonë se këtu ka gisht ish-kryeministri Berisha, i cili dyshohet se e nxori në pritë përmes ish-truprojës së tij Izet Haxhisë, i cili është dënuar me 21-vite burg si pjesëmarrës në krim.
Thuhet se dikush e telefonoi Hajdarin. Pasi u informua, Azem Hajdari me dy truprojat e tij, Zenel Nezën dhe Besim Çerjen zbresin dhe i drejtohen makinës që ishte poshtë, duke trokitur në xham. Në këtë moment  del nga mjeti Fatmir Haklaj dhe i afrohet me një kallashnikov në duar duke e qëlluar. Më pas, në të djathtë të tij supozohet të jetë afruar Jaho Mulosmani dhe në të majtë Naim Çangu, që të dy të armatosur. Në këto momente Besim Çerja, truproja i vendosur në anën e majtë të Azem Hajdarit bllokon armën e Fatmir Haklaj duke ia kapur fort me të dyja duart.
Drejtimi i tytës së kësaj arme shihte në krahun ku gjendej Zenel Neza dhe Naim Çangu dhe nga e djathta në të majtë të Fatmir Haklajt, kur sheh se Fatmirit i bllokohet arma, Jaho Salihi afrohet dhe pretendohet se ka qëlluar me një pistoletë 9 mm në kokë shokun e tij Besim Çerjen. Nga të shtënat vritet Azem Hajdari, ndërsa qëllohen Zenel Neza e Naim Çangu. Zenel Neza mbeti i plagosur dhe arriti të mbijetojë. Por kjo ngjarje ka shumë mistere. Vetë Berisha i drejtohej me një letër ambasadorit amerikan në atë kohë dhe akuzon truprojën e tij Izet Haxhinë si të përfshirë. Por që atëherë, ai kurrë nuk doli para drejtësisë qoftë dhe si dëshmitar. Kur u bë gjyqi për Jaho Mulosmanin dhe vëllezërit Haxhia, Berisha u thirr disa herë në gjykatë e prokurori si dëshmitar dhe kurrë nuk shkoi.
Zhdukja e provave
Shumë prova për vrasjen e Azem Hajdarit janë zhdukur. Prova më kryesore është një regjistrim i bërë ndaj Zenel Nezës. Pas atentatit, Zenel Neza mbeti i plagosur dhe shkoi në spital. Personi i parë që i shkoi në shtrat ishte Sali Berisha, i shoqëruar nga gazetari Ylli Rakipi. Ky i fundit kishte një diktofon në dorë dhe i marrin një dëshmi Zenel Nezës. Kjo dëshmi nuk u bë kurrë publike dhe kaseta u zhduk. Po ashtu Zenel Nezës ju dha pasaportë diplomatike dhe ai u largua jashtë vendit ku mori azil. Ai nuk dëshmoi kurrë qartë për ngjarjen. Po ashtu një tjetër provë e zhdukur është ditari i ish-ministrit të Brendshëm, Perikli Teta.
Në dosjen hetimore ndodhet një letër e Perikli Tetës, i cili tregon se gjatë hetimeve atij i është sekuestruar nga grupi hetimor një ditar, ku ai ka shkruar të gjitha ndodhitë për vrasjen e Hajdarit. Në atë ditar ka pasur të dhëna shumë interesante, ku flitej dhe me emra konkretë. Por ai ditar nuk është më në dosjen e prokurorisë. Kur nisi gjyqi i Haxhisë, kishte shpresa se do dilte Berisha para drejtësisë, por gjyqësori u tregua sërish i pafuqishëm. Por ka një shpresë në SPAK që mund të bëhet kthesa e madhe. Avokati i Izet Haxhisë, Idajet Beqiri zbuloi për gazetën “SOT” se SPAK ka regjistruar dosjen e akuzave të Haxhisë ndaj Berishës, ku një nga ato akuza është vrasja e Azem Hajdarit.  “Berisha ishte i informuar për ardhjen e Fatmirit në Tiranë që me 11 shtator dhe me stacionimin e tyre pranë PD që në momentin e parë.
Ai, i alarmuar thërret në zyrën e tij Hajdarin, i cili po hezitonte të dilte të takonte Fatmirin në atë vend që do komprometonte Hajdarin, ashtu të kompromentuar para syve të Berishës. Biseda e nervozuar që ka bërë Berisha me Hajdarin në ato momente (bisedë e dëgjuar vetëm nga Linda Ihsani më vonë e vdekur në mënyrë të “papritur” si shumë të tjerë afër Berishës) tregon se Hajdari është urdhëruar që të dalë e të largojë ata që kishte sjellë vetë aty, pra Haklajt. Vetë nxitimi i Hajdarit gjatë daljes se tij e tregon këtë kërcenim. Po përse Berisha nuk njoftoi organet shtetërore se PD ishte rrethuar nga kriminelët tuaj, por përdori Hajdarin për t’i larguar ata?”, është shprehur Izet Haxhia disa kohë më parë. Nuk dihet nëse SPAK do t’i shkojë deri në fund kësaj ngjarjeje të rëndë.
Deklaratat e forta
Gjithashtu edhe ish-truproja i Azem Hajdarit, Marjan Gryka, ka akuzuar Berishën si organizator i vrasjes së Azem Hajdarit. “Berisha për 8 vite nuk pati kurajon as të përmendë rihapjen e çështjes “Hajdari”, sepse siç e kemi deklaruar edhe si shoqatë, ai vetë është i përlyer në organizimin e kësaj vrasje, bashkë me mikun e tij të sotëm Fatos Nanon. Ka ardhur koha që Berisha të dalë para drejtësisë për shumë akuza të bëra ndaj tij nga ne, por edhe  nga ish opozita. Edi Rama si dhjetorist dhe si njeri me vlera nuk duhet t’i humbë shpresat e shqiptarëve se vrasësit e 21 Janarit do të arrestohen, edhe se shoqata “Azem Hajdari” pret që kryeministri i ri të japë sinjalin e rihapjes së dosjes. Sot Berisha kërkon që të fshijë gjurmët e tij në vrasjen e shekullit”, tha ai disa vite më parë.
Fshehja e vrasësve
Gryka akuzoi Sali Berishën për bllokimin e zbardhjes së vrasjes së Azem Hajdarit, pasi një gjë e tillë mund t’i krijonte shqetësime dhe mund të kompromentonte pozitat e tij. Gryka shprehet se Sali Berisha premtoi hapjen e dosjes së vrasjes së Azem Hajdarit, por gjatë tetë viteve në pushtet nuk tha asnjë fjalë për këtë çështje. “Berisha kishte premtuar se do të bënte të pamundurën sa të vinte në pushtet për rihapjen e zbardhjen e çështjes së ish deputetit Azem Hajdari. Por nuk e bëri dhe nuk po e bën e nuk dëshiron ta bëjë, mbasi hapja e dosjes “Hajdari” krijon shqetësime për Berishën. Kujtoj, që të njëjtën gjë kishte premtuar Sali Berisha dhe në vitin 1992, kur deklaroi se do të hapte gjoja hetimet për ngjarjen e 2 prillit në Shkodër, por nuk e bëri këtë akt”, theksoi ai. I pyetur për vrasësit, Gryka thekson se atentatorët i di vetëm Sali Berisha.
Ai tha se Berisha mori në gjirin e tij ish-ministrin e Brendshëm, Neritan Cekën, i cili i bëri 7 atentate Azem Hajdarit. “Këtë e di më mirë zoti Berisha. Të gjithë shqiptarët kujtojnë atë ditë të 14 shtatorit, kur Berisha dhe gjithë lakenjtë e tij u vunë mbas shtratit që mbante Azem Hajdarin dhe po thërriste se ‘Nano dhe Gjinushi janë ata që e kanë vrarë liderin e demokracisë’. Koha tregon se në asnjë moment nuk u vërtetua kjo dhe kurrë as vetë Sali Berisha nuk u ingranua në një hetim të tillë. Përkundrazi, kryeministri, ish-shefi i opozitës në atë kohë, si për “çudi” të të gjithëve nuk mori pjesë fare në procesin hetimor dhe gjyqësor për vrasjen e Azem Hajdarit, por akuzonte kryeprokurorët, herë Arben Rakipin e herë Dhori Sollakun dhe më pas “laviren e bulevardit” (kjo e thënë nga z. Berisha), ish Silvia Konti! Sot Berisha ka në gjirin e tij pikërisht Neritan Cekën, atë që kur gëzonte postin e ish ministrit të Brendshëm, i bëri atentat 7 herë Azem Hajdarit (si në ngjarjen e Milotit, etj)”, theksoi ai.
Faktet që implikojnë Sali Berishën
Sali Berisha nuk pranoi të dëshmonte për Azem HajdarinPërdori vrasjen e tij për të ardhur në pushtet me dhunë në ’98Truprojat e tij janë implikuar në vrasjen e Azem HajdaritPak para vrasjes, Azem Hajdari ka qenë në zyrë më BerishënSali Berisha nuk tentoi të hapte dosjen e vrasjes së Hajdarit gjatë 8 viteve në pushtetSali Berisha mori në gjirin e tij armiqtë e Azem HajdaritAzem Hajdari ishte rivali më i fortë i Berishës në PD
Biografia e Azem Hajdarit
– Azem Hajdari u lind më 11 mars 1963, në qytetin Bajram Curri;– I martuar, me tre fëmijë, Kirjaldi, Rudina dhe Azemi, i lindur katër muaj pas vdekjes së Azemit;– Më 1987, fiton të drejtën e studimit dhe regjistrohet në Universitetin e Tiranës, Fakulteti i Shkencave Politike e Juridike;– Në vitin 1993 diplomohet për filozofi, në Universitetin e Tiranës;– Në vitin 1995 diplomohet si jurist, në Universitetin e Tiranës;– Në vitet 1993-1994 ndjek kualifikim pasuniversitar në Shtetet e Bashkuara të Amerikës, për filozofi;– Më 1996 ndjek kualifikim për politikat e sigurisë e mbrojtjes, në kuadrin e NATO-s, në Garmisch-Pa rtenkirchen, në Gjermani;