Tag: grabitjen

Një ngjarje e bujshme e regjistruar rreth 4-5 vite më parë në fshatin Dorëz të Librazhdit është zbuluar rastësisht nga përgjimet e Prokurorisë së Posaçme (SPAK). Bëhet fjalë për vjedhjen e 200 mijë eurove në një banesë dhe marrjen peng të një personi nga autorët, me qëllim që familjarët e tij të mos njoftonin Policinë. Kjo ngjarje është zbuluar gjatë përgjimeve të dosjes ku po hetohet kreu i Komisionit të Prokurimit Publik, Jonaid Myzyri, besniku i Belinda Ballukut, i cili është marrë i pandehur për veprën penale “Shkelja e barazisë së pjesëmarrësve në tendera apo ankande publike”.
Pre e grabitjes ka rënë familja e zyrtares së KPP-së Lindita Skeja, e cila po ashtu është marrë e pandehur për çështjen e Myzyrit, si anëtare e Komisionit të Vlerësimit të Ofertave. Gjatë përgjimeve, rezulton se Lindita Skeja bisedon me familjarët e saj për vjedhjen e 200 mijë eurove në banesën e tyre. Po ashtu, ajo shfaqet e shqetësuar edhe për pengmarrjen e vëllait të saj nga grabitësit e maskuar, të cilët u larguan së bashku me paratë dhe me familjarin në mënyrë që të mos njoftonin Policinë.
Detajet
Duket se kjo ngjarje është mbajtur e fshehtë si nga ana e familjes Skeja, e cila ra pre e grabitjes, po ashtu edhe nga Policia. Top Channel raporton se SPAK i është drejtuar me një shkresë Policisë lokale të Elbasanit dhe asaj të Librazhdit, ku i kërkon informacion nëse ka patur denoncim nga qytetarët për grabitjen në fjalë apo jo. Organi i akuzës ka ngritur dyshimin mbi burimin e parave të grabitura, teksa në dëshminë e dhënë për SPAK, zyrtarja e KPP-së ka deklaruar se paratë ishin të dërguara nga të afërmit që jetojnë në Greqi. Burime për mediat thanë se hetimet për grabitjen e 200 mijë eurove janë ndarë në një procedim penal më vete, teksa për dosjen e parë, e cila po hetohet nga prokurori Elvin Gokaj, janë marrë të pandehur 11 persona që dyshohen se shkelën barazinë në tendera.
Denoncimi i Berishës
Pavarësisht se kjo ngjarje u zbulua nga SPAK, ajo është denoncuar 4 vite më parë edhe nga kreu i PD-së, Sali Berisha. Në një postim në rrjetet sociale më 30 maj të vitit 2021, Berisha denonconte vjedhjen e miliona paundëve në familjen Skeja nga një bandë e armatosur me uniformë policie. Berisha e konsideronte familjen Skeja si miq të Taulant Ballës, teksa si autorë të grabitjes akuzonte të penduarin aktual të SPAK-ut, Nuredin Dumanin, dhe kreun e një prej bandave të Elbasanit, Suel Çelën. “Supergrabitje dhe pengmarrje në Librazhd! Qytetari dixhital denoncon: Bandë e armatosur dhe me uniformë policie e drejtuar nga Suel Çela grabit në një familje miliona paund. Ajo merr peng një anëtar të familjes së grabitur. Narkopolicia mban të fshehur ngjarjen. Lexoni mesazhin e tij: Përshëndetje doktor! Mora një informacion, të konfirmuar në 2 burime.
Në Librazhd është bërë një supergrabitje e frikshme duke u gdhirë e shtuna. Janë grabitur miliona paund te miqtë e Taulant Ballës me mbiemër Skeja. Ajo që e bën të frikshme grabitjen nuk është vetëm shuma jashtëzakonisht e madhe e parave të grabitura, por mënyra e grabitjes. Banda grabitëse jo vetëm ka qenë e armatosur, por ka qenë e veshur me uniformë policie dhe ka përdorur pajisje policie. Sipas informacioneve shumë të besueshme, grabitja është kryer nga banda e Rinasit në bashkëpunim me mikun tjetër të Taulant Ballës, kreun e bandës së Elbasanit, Suel Çela. Në krye të operacionit për grabitjen e miliona paundëve ishte krimineli gjoja në kërkim, Nuredin Dumani. Ajo që e bën edhe më të rëndë gjendjen është se policia, nën urdhrat e Suel Çelës, e ka fshehur këtë ngjarje, ku për të kryer grabitjen me uniformë policie, banda ka rrëmbyer një person të familjes Skeja. Me të tillë logjistikë dhe mbështetje nga shteti, banda është cenim për sigurinë kombëtare, pasi me veshjen dhe pajisjet e policisë, ata mund të rrëmbejnë këdo dhe kurdo”, shkruante Berisha në atë kohë.