Tag: gjyqtarja

Rigels Seliman
Gjykata e Posaçme kundër Korrupsionit dhe Krimit të Organizuar nuk ka ndryshuar masën e sigurisë “arrest në burg” për Ilir Metën. Ish-Presidenti do të vijojë të qëndrojë në qelinë e paraburgimit. Për rreth 90 minuta, gjyqtarja Irena Gjoka dëgjoi argumentet e avokatëve të Metës që kërkuan lirimin me pretendimin se tashmë dosja ka kaluar për gjykim dhe nuk përbën rrezik për prishjen e provave dhe të prokurorëve që e kundërshtuan dhe kërkuan të ngelet në fuqi masa e arrestit me burg. Gjyqtarja pasi u tërhoq në Dhomë Këshillimi, vendosi rrëzimin e kërkesës, vendim, i cili për avokatët e Metës është arsye për të kërkuar largimin e saj. Megjithatë vetë gjyqtarja Gjoka e kishte dhënë vetë dorëheqjen nga dosja si gjyqtare e seancës paraprake, por nuk iu pranua nga kryetari në detyrë i GJKKO, Erjon Bani.
Reagon avokati Cakrani
Ndërkohë menjëherë pas vendimit të dhënë nga gjyqtarja politike e GJKKO, Irena Gjoka, e cila la në fuqi masën e sigurisë “arrest në burg” për Presidentin e PL, Ilir Meta, avokati mbrojtës, Kujtim Cakrani u shpreh se nuk kishte asnjë pritshmëri se gjyqtarja Gjoka do të jepte një masë lehtësuese apo të pranonte kërkesën. Pas përfundimit të seancës gjyqësore për revokimin e masës së sigurisë, avokati Cakrani tha para gazetarëve se kreut të PL, Ilir Meta i janë shkelur të gjitha të drejtat politike, madje duke mos pranuar që të bënte fushatë qoftë dhe në paraburgim, për zgjedhjet parlamentare të 11 majit. Për Cakranin, vendimi i kësaj të premteje, ishte politik, duke shtuar se të gjitha dosjet e liderëve të opozitës për çudi i bien vetëm gjyqtares së GJKKO, Irena Gjoka. Sipas avokatit, beteja do të vijojë në shkallën tjetër ë gjyqësorit, Apelin e GJKKO. Në kërkesën tonë kemi parashtruar disa vendime të gjykatës evropiane. Të gjithë liderët e opozitës i bien për shqyrtim gjyqtares Irena Gjoka, e prisja këtë dhe e dija që do ta rrëzonte kërkesën. I janë shkelur të drejtat politike, s’i është lejuar të bëjë fushatë edhe në ambientet e paraburgimit. Gjyqtarja s’dëgjon. Ne do vazhdojmë në Apelin e  GJKKO, shpresojmë që kjo gjykatë të ngrihet në lartësinë e duhur. Ne do i shterojmë të gjitha gjykatat. Gjykata e Lartë është inekzistente në Republikën e Shqipërisë. S’ka dhenë asnjë vendim, as shqyrtim, vetëm mospranim rekursi”, deklaroi Cakrani.
Çfarë ka ndodhur?
Kujtojmë që Ilir Meta ndodhet i arrestuar që prej 21 tetorit 2024. Ish-Presidenti Meta ka bërë rekurs edhe në Gjykatën e Lartë dhe kërkesa e tij do të shqyrtohet më 9 tetor. Ai ka bërë ankimim për masën arrest në burg, të caktuar prej rreth 1 viti nga GJKKO dhe të lënë në fuqi nga Apeli. Ndërkohë që, Irena Gjoka do të jetë edhe gjyqtarja e seancës paraprake më 25 shtator në ngarkim të Ilir Metës, Monika Kryemadhit, Fatime Kryemadhit, Ema Çokut dhe Pirro Xhixhos, që janë marrë të pandehur nga SPAK. SPAK mbylli hetimet për dosjen ‘Meta’ më 28 korrik, ndërsa e kaloi për gjykim në fund të gushtit, e cila përfshiu tre hetime në një; aferën CEZ-DIA, lobimin e LSI në SHBA dhe hetimin pasuror. Meta dhe Kryemadhi akuzohen për korrupsion pasiv, pastrim parash dhe mosdeklarim pasurie. Pirro Xhixho akuzohet për korrupsion pasiv të funksionarëve të lartë të kryer në bashkëpunim. Ndërsa Fatime Kryemadhi akuzohet për pastrim parash, së bashku me Ema Çokun.