Greqia dhe Italia i kanë bërë thirrje Izraelit të garantojë sigurinë e një flote ndihmash pro-palestineze në Gaza, të përbërë nga më shumë se 40 anije private, dhe t’u lejojë pjesëmarrësve qasje në mbështetje konsullore.
Apeli u bë në një deklaratë të përbashkët të lëshuar të mërkurën nga Ministri i Jashtëm Grek, Giorgos Gerapetritis, dhe Ministri i Jashtëm Italian, Antonio Tajani.
Ministrat iu drejtuan gjithashtu aktivistëve, duke i nxitur ata të pranonin një propozim nga Patriarkana Latine e Jerusalemit, që synonte zbutjen e tensioneve.
Patriarkana po ofrohet t’ua dorëzojë ndihmën banorëve të Gazës në emër të flotës, në vend të vetë aktivistëve në anije që e shpërndajnë ndihmën.
Aktivistët kishin refuzuar më parë një ofertë të ngjashme, të bërë nga kryeministrja italiane Giorgia Meloni.
Flota Globale Sumud përbëhet nga dhjetëra anije, që synojnë të dërgojnë ndihma në Gaza. Iniciativa të ngjashme në të kaluarën, kanë çuar vazhdimisht në tensione me Izraelin.
Të mërkurën pasdite, flota ishte pozicionuar pranë brigjeve të Egjiptit dhe po lëvizte drejt Rripit të Gazës së bllokuar./ DPA News.