Presidenti Donald Trump vizitoi Teksasin e shkatërruar nga stuhia të premten, ndërsa fati i agjencisë më të lartë federale të katastrofave në vend mbetet i pasigurt. Guvernatori i Teksasit, Greg Abbott, dhe udhëheqës të tjerë vendorë e vlerësuan presidentin për një reagim të shpejtë dhe për nënshkrimin e një deklarate të zgjeruar të emergjencës për zonën e prekur, pasi përmbytjet vranë më shumë se 100 persona, me shumë të tjerë që ende rezultojnë të zhdukur.
Trump dhe Zonja e Parë Melania Trump u takuan me zyrtarë shtetërorë dhe lokalë, ekipet e ndihmës së shpejtë, si dhe familjet e viktimave në Kerrville.
“Si komb, ne vajtojmë për çdo jetë që u rrëmbye nga përmbytjet dhe lutemi për familjet që kanë mbetur pas. Është e mahnitshme, fryma e jashtëzakonshme e atyre familjeve. Nuk e di, as nuk e di se si e bëjnë këtë”, tha Trump në një tryezë të rrumbullakët pas takimit me familjet.
Zonja e parë tha se kombi po vajton me to. Ajo tha se ato u lutën, u përqafuan dhe u mbajtën për dore, ndërsa ndanin histori. Ajo tha se iu dha një byzylyk, të cilin e mbajti në tryezën e rrumbullakët, “në nder të të gjitha vajzave të vogla që … humbën jetën” në Kampin Mystic.
Melania Trump tha se premtoi të kthehej.
Në sfondin e kësaj skene emocionale kishte pyetje rreth asaj se sa të përgatitura janë komunitetet e Teksasit për përmbytjet, nëse sistemet e paralajmërimit mund të kishin qenë më të mira – dhe si planifikon qeveria federale t’i qaset katastrofave në të ardhmen.
Gjatë tryezës së rrumbullakët, Trump e shpërfilli një pyetje nga një gazetar i Teksasit në lidhje me faktin nëse vendasit ishin njoftuar siç duhet përpara përmbytjeve. Kur u pyet nëse kishte një mesazh për familjet që ishin të shqetësuara për sistemin e alarmit, Trump tha se mendonte se “të gjithë bënë një punë të jashtëzakonshme në ato rrethana. Vetëm një person shumë i lig do të bënte një pyetje të tillë”.
Ndërsa vlerësoi reagimin në Teksas, Trump nuk foli drejtpërdrejt për vizionin e tij më të gjerë për Agjencinë Federale të Menaxhimit të Emergjencave. Menjëherë pas fillimit të mandatit të tij të dytë, Trump tha se donte të rishikonte FEMA-n dhe t’u jepte më shumë përgjegjësi shteteve për reagimin ndaj emergjencave.
Sekretarja e Sigurisë Kombëtare, Kristi Noem, mbikëqyr FEMA-n dhe theksoi në tryezën e rrumbullakët të së premtes se qeveria federale po luante një rol mbështetës në këtë përpjekje.
Noem tha se administrata po “po i fuqizon zyrtarët shtetërorë dhe vendorë që të marrin vendimet më të mira për njerëzit e tyre, sepse ata i njohin njerëzit e tyre, ata e njohin komunitetin e tyre dhe kur ata kërkojnë, atëherë ne vijmë dhe i mbështesim ata”.
Abbott dhe përfaqësuesi i SHBA-së, Chip Roy, republikan nga Teksasi, theksuan gjithashtu mënyrat se si shteti dhe komunitetet lokale po udhëheqin përpjekjet e shpëtimit dhe rimëkëmbjes. Abbott vuri në dukje gjithashtu se do të ketë seanca me komunitetin për të shqyrtuar zgjidhjet për të ecur përpara, duke përfshirë sisteme të ndryshme alarmi për përmbytjet e ardhshme.
“Do të punojmë për çdo zgjidhje të vetme për t’u siguruar që gjëra të tilla të mos ndodhin përsëri, jo vetëm në këtë komunitet, por edhe në pellgje të tjera lumenjsh në të gjithë shtetin. Pra, do të punojmë për ta bërë siç duhet”, tha Abbott.
Roy iu referua një fondacioni të Hill Country që kishte mbledhur 30 milionë dollarë. Ai kritikoi një pyetje nëse sistemi i alarmit dështoi si një fajësim i panevojshëm.
«Njerëzit në këtë komunitet u mblodhën për të ndihmuar njerëzit. Dhe ky është imazhi i qëndrueshëm – ato vajza të vogla nga Kampi Mystic që këndonin himne ndërsa shikonin dëmet ndërsa largoheshin nga ai kamp duke dalë që andej. Dhe këta janë njerëzit e Teksasit,” tha Roy.
Trump tha se qeveria federale do të vazhdojë ta mbështesë Teksasin me çfarëdo që i nevojitet.
“Miliardat dollarë që ky vend jep për gjëra që nuk duhet t’i bëjnë, dhe këto nuk janë miliarda dollarë”, tha ai në një intervistë për Fox News ndërsa po largohej nga shteti.
“Kjo është një sasi relativisht e vogël parash, por është është shumë dashuri, është shumë dashuri dhe shumë zemër. Dhe kështu ne do të qëndrojmë të përfshirë.”
Administrata nuk ka thënë drejtpërdrejt nëse do të ndjekë planet për të eliminuar FEMA-n në formën e saj aktuale që në dhjetor 2025, siç sugjeroi dikur Trump. Një këshill i ngarkuar me rekomandimin e ndryshimeve për agjencinë, i cili përfshin anëtarë të kabinetit, guvernatorë – përfshirë Abbott, dhe ekspertë të menaxhimit të emergjencave – ishte planifikuar të jepte rekomandime deri në mesin e nëntorit dhe të përfundonte punën e tij deri në maj 2026.
FEMA jep miliarda dollarë ndihmë për komunitetet e goditura nga fatkeqësitë, por shpesh përballet me kritika për ngadalësinë në shpërndarjen e ndihmës dhe mungesën e efikasitetit. Shumë ekspertë të menaxhimit të emergjencave thonë se FEMA luan një rol vendimtar në reagimin ndaj fatkeqësive që janë shumë të mëdha dhe kërkojnë shumë burime për t’u përballuar nga një shtet.
