Lajmidites.com

Tag: fatos

  • VIDEO e rrallë: Kur Fatos Nano kandidonte në Sarandë, takimi me kundërshtarin Edmond Gjoken, vizitat në portin e qytetit, dhe në spitalin “Petro Nako”

    VIDEO e rrallë: Kur Fatos Nano kandidonte në Sarandë, takimi me kundërshtarin Edmond Gjoken, vizitat në portin e qytetit, dhe në spitalin “Petro Nako”

    Nga Shpresa Dine dhe Vladimir Kodhelaj

    Qindra qytetarë shqiptarë dhe nga diaspora e mes tyre shumë nga Saranda përcollën pak ditë më parë për në banesën e fundit një prej figurave më të rëndësishme të politikës shqiptare pas viteve ’90 — lideri historik i së majtës, themeluesi dhe arkitekti i Partisë Socialiste të Shqipërisë, Fatos Nano.
    Veprimtaria e tij politike dhe drejtuese është ndjerë fuqishëm edhe në Sarandë, qyteti me të cilin Ai ka pasur lidhje të veçanta gjatë viteve të angazhimit të tij politik.
    Në zgjedhjet parlamentare të vitit 2005, Fatos Nano kandidoi për deputet në Sarandë, përfaqësues i Partisë Socialiste. Në programin e tij politik, ai përfshiu një sërë objektivash të rëndësishme për zhvillimin e qytetit bregdetar, me synimin për t’i dhënë një shtysë të re ekonomisë dhe turizmit. Me stilin e tij karakteristik dhe gjuhën e drejtpërdrejtë, Nano premtonte se do të luftonte “balozët e politikës”, siç shprehej shpesh në fjalimet e tij.
    Rezultatet e atyre zgjedhjeve e treguan mbështetjen e fortë që Ai gëzonte në Sarandë: me mbi 2000 vota më shumë se kundërshtari politik, qytetarët e zgjodhën Fatos Nanon si përfaqësuesin e tyre në Kuvendin e Shqipërisë.Duke shfrytëzuar arkivin e Studio “Kodhelaj”, po sjellim një montazh kujtimesh me disa nga momentet më të rëndësishme të pranisë së tij në Sarandë.
    Një prej vizitave më të veçanta ishte ajo e 15 shkurtit 2004, kur, në emër të Qeverisë së Shqipërisë, Fatos Nano, takoi kryetarin e sapozgjedhur të Bashkisë Sarandë nga radhët e opozitës, Edmond Gjoka. Gjatë këtij takimi, ai i dorëzoi zyrtarisht vendimin e qeverisë për kalimin e godinës së ish Shtëpisë së Oficerëve nga Ministria e Mbrojtjes në pronësi të Bashkisë Sarandë — një akt me rëndësi të madhe për jetën kulturore e qytetare të qytetit.
    Një moment tjetër është materiali nga inaugurimi i kantinës së verërave “Isak” në Vrion, si dhe pamje nga fushata elektorale e vitit 2005: vizitat në portin e qytetit, në spitalin “Petro Nako”, dhe në fund, takimi përmbyllës i fushatës, ku Fatos Nano mbajti fjalimin e tij përpara qytetarëve të Sarandës.
    Në kujtesën e shumë sarandiotëve, Fatos Nano do të mbetet politikani me vizion, energji dhe qartësi politike — një figurë që, pavarësisht debateve të kohës, la gjurmë në historinë e re të Shqipërisë dhe në zemrat e atyre që e ndoqën dhe e mbështetën.

  • Ndarja nga jeta e Fatos Nanos, deputetët e Kuvendit mbajnë një minutë heshtje

    Ndarja nga jeta e Fatos Nanos, deputetët e Kuvendit mbajnë një minutë heshtje

    Deputetët e Kuvendit të Shqipërisë ditën e sotme kanë nderuar figurën e ish-kryeministrit Fatos Nano, i cili ndërroi jetë në moshën 73-vjeçare më 31 tetor.
    Kryetari i Kuvendit, Niko Peleshi tha se Fatos Nano është një nga themeluesit e PS dhe do të kujtohet gjithmonë për kontributin e rëndësishëm që ka dhënë për demokratizimin e vendit.
    Niko Peleshi: Kuvendi shpreh sot ngushëllimet më të sinqerta për ndarjen nga jeta të ish-kryeministrit Fatos Nano. Nano ishte një nga themeluesit e PS dhe ka shërbyer disa herë si kryeministër duke dhënë një kontribut të rëndësishëm në demokratizimin e vendit. Nano do të kujtohet si një figurë me ndikim dhe me ide që la gjurmë në thella në historinë e kombit tonë. Ju ftoj të mbajmë një minutë heshtje.

  • Kuvendi mban 1 minutë heshtje për ish-kryeministrin Fatos Nano, Peleshi: Ka dhënë kontribut të rëndësishëm në demokratizimin e vendit

    Kuvendi mban 1 minutë heshtje për ish-kryeministrin Fatos Nano, Peleshi: Ka dhënë kontribut të rëndësishëm në demokratizimin e vendit

    Seanca e sotme plenare ka nisur me mbajtjen e një minute heshtje në nderim të ish-kryeministri Fatos Nano.

    Kërkesa u paraqit nga kreu i grupit parlamentar i PS, Taulant Balla.
    Kryetari i Kuvendit, Niko Peleshi, shprehu ngushëllimet duke thënë “Ishte një nga themeluesit e PS dhe ka shërbyer si kryeministër duke dhënë një kontribut të rëndësishëm në orientimin e Shqipërisë drejt integrimit europian. Ai do të kujtohet si një njeri që la gjurmë të thella në historinë e Shqipërisë“.

    Top Channel

  • Ftesë në 5/ Si u zbulua lidhja e Fatos Nanos me Xhoanën në vitin 2001?

    Ftesë në 5/ Si u zbulua lidhja e Fatos Nanos me Xhoanën në vitin 2001?

    Në “Ftesë në pesë” me Bieta Sulon, pasditen e sotme ishte i ftuar gazetari Neritan Alibali, kryeredaktor i gazetës “Republika” në vitet 2000.

    Asokohe kjo media e shkruar qe e para që publikoi lajmin për një lidhje të fshehtë të kryeministrit të atëhershëm Fatos Nano.
    Por si u zbulua e gjitha?
    Neritani tregoi se pasi u kishin rënë në vesh thashetheme për jetën private të liderit socialist, ai caktoi një gazetare, identitetin e së cilës nuk e zbulon, për të investiguar se çfarë po ndodhte në të vërtetë. Pas një muaj pune, doli në dritë historia e dashurisë së Fatos Nanos me një vajzë 22 vjet më të re e quajtur Xhoana.
    Lajmi u publikua menjëherë, por sipas Alibalit u bë një luftë e madhe më tej për të bindur Rexhinën, bashkëshorten për të qëndruar krahë Nanos gjatë fushatës.

    Top Channel

  • Çfarë është “SPOK”?/ Sëmundja e pashërueshme që i mori jetën ish-kryeministrit Fatos Nano

    Çfarë është “SPOK”?/ Sëmundja e pashërueshme që i mori jetën ish-kryeministrit Fatos Nano

    Ish-kryeministrit Fatos Nano, i cili u nda dje nga jeta vuante nga një problem kronik respirator. Në gjuhën mjekësore, njihet me emrin SPOK – Sëmundja Pulmonare Obstruktive Kronike.
    SPOK, (COPD) është një sëmundje (patologji) që prek mushkëritë dhe mund të parandalohet, por jo të shërohet. Karakterizohet nga një ngushtim (obstruksion) i parikthyeshëm ose pjesërisht i rikthyeshëm i rrugëve të.frymëmarrjes.
    Ky obstruksion zakonisht është progresiv dhe shoqërohet me një përgjigje inflamatore jo normale kronike të mushkërive kundrejt grimcave të pluhurit dhe/ose gazeve si psh: monoksidi i karbonit prezent në tymin e duhanit dhe dioksodi i karbonit që gjendet në ajrin e ndotur të ambientit që na rrethon.
    SPOK-u është shkaktari i tretë i vdekjeve në të gjithë botën dhe shkaktari i dytë për invaliditet të plotë të pacientëve. Në vitin 2010 janë raportuar mbi tre milionë vdekje nga kjo sëmundje në rang botëror. Në Shqipëri kjo patologji nuk njihet mirë dhe si rrjedhojë ngelet e padiagnostikuar dhe/ose e keqtrajtuar.
    Studimet tregojnë që vendi ynë ka një prevalencë të lartë të SPOK-ut, duke prekur përafërsisht 5-6% të popullatës. Duhanpirja është shkaku kryesor dhe më i zakonshëm.
    Njihen edhe faktorë të tjerë ndër të cilët përmenden: dieta ushqimore dhe aktiviteti i pakët fizik.
    Kolla kronike me sekrecione dhe vështirësia në frymëmarrje kryesisht gjatë ecjes, janë më të shpeshtat në këtë sëmundje. Preken më tepër meshkujt mbi 40 vjeç duhanpirës, por kohët e fundit po shtohet edhe numri i femrave me SPOK si rrjedhojë e duhanit.
    Mjekimi ka për qëllim frenimin sadopak të sëmundjes në stadin që diagnostikohet. Ndërlikimet e sëmundjes janë të shumta si psh: kardiake, endokrinologjike, muskulare, deri në invalidizim të plotë të pacientit.

  • “Nga 1997-ta, te Bamir Topi president”, Ilir Kulla: Fatos Nano shmangu shumë kriza, iku nga politika se nuk e shihte…

    “Nga 1997-ta, te Bamir Topi president”, Ilir Kulla: Fatos Nano shmangu shumë kriza, iku nga politika se nuk e shihte…

    Ilir Kulla një prej bashkëpunëtorëve të ngushtë të Fatos Nanos ndërton një profil të detajuar të ish-kryeministrit të ndjerë për të cilin thotë se ai nuk kishte ndonjë garë të hynte në histori pasi kishte bërë historinë. Zoti Kulla tregon se përse Fatos Nano demitizoi vetën, si e modernizoi sistemin politik shqiptarë e fali kundërshtarin politik që e burgosi. “Fatosi ishte nga ata njerëz që jepte besim, delegonte dhe kishte qejf gjithmonë të kishte njerëz të rinj. Ishte një njeri që e donte dhe e shijonte jetën dhe donte gjërat që të lëviznin. Njeri i veçantë për kohën që kemi jetuar bashkë. Fatosi ishte i parakohshëm për Shqipërinë e tranzicionit dhe në shumë gjëra ishte i pari. Fatkeqësisht edhe me ikjen nga kjo jetë ishte i pari në nivelin e politikanëve tanë. Sa më shumë do kalojë koha aq më shumë do të rritet figura e tij edhe sepse ata që kanë ngelur mbrapa janë komplet e kundërta e tij”, shprehet Kulla për “Top Channel”. Ky është vlerësimi Ilir Kullës për Fatos Nanon me të cilin bashkëpunoi ngushtësisht për një periudhë të gjatë. Ndarjen nga jeta të zotit Nano, Ilir Kulla e quan të trishtë.
    “Nga pikëpamja njerëzore e kam pritur shumë keq sepse ishte akoma i ri për të ikur nga kjo botë dhe ishte njeri që e meritonte të jetonte disa vite më shumë jetë sepse kishte bërë sakrifica. Mos të harrojmë se ishte politikani i vetëm në këtë vend që ka bërë katër vjet burg në kushte dhe rrethana si ato të fillim viteve 90-të që nuk ishin të thjeshta në Shqipëri”, tha Kulla. Ilir Kulla në këtë intervistë sjell disa detaje që nga largimi Nanos nga politika aktive dhe si ai e shpenzoi kohës larg asaj që mbase dinte të bënte më mirë duke lënë gjurmë jo vetëm në PS. “Shiko, Fatos Nano ishte njeriu që e demitizoi veten me qëllimin e vetëm që të jetonte si njeri normal. Të gjithë mendonin dhe mendojnë në politikë si ta mitizojnë veten. Atë e mitizoi historia e vet. Kishte si qëllim demitizimin e vetës e të qenurit njeri i lirë dhe njeri i thjeshtë e ta jetonte jetën si një njeri i tillë. Kështu e ka jetuar jetën”, shprehet ai. Por çfarë trashëgimie politike lë pas Fatos Nano? “Trashëgimia e tij është trashëgimi shumë e pasur. Është njeriu që modernizoi sistemin politik në Shqipëri. Liberalizoi mentalitetin politik shqiptarë.
    Është një njeri që i mësoi njerëzit që të mos urrejnë politikisht dhe mos të thonë kurrë fjalën e fundit në politikë. Është një njeri që diti të falë kundërshtarin që nuk është një gjë e lehtë në kushtet tona dhe kur kundërshtari nuk kishte qenë i butë me të. Përkundrazi kishte qenë mjaftueshmërisht i egër me të sepse pasi ishte një njeri që shikonte në të ardhmen”, thotë Kulla. Nga karriera e gjatë politike e Fatos Nanos zoti Kulla veçon. “Nëse Shqipëria mori anëtarësimin në NATO në 2008 ajo ndodhi për shkak se Fatos Nano arriti të bëj një marrëveshje me kundërshtarin e jetës së tij politike Sali Berishën për të shmangur krizën politike të 2007 kur u zgjodh president Bamir Topi. Pra, nëse 9 muaj më vonë Shqipëria ishte në NATO ishte meritë e madhe Fatos Nanos. Mos harroni që Fatos Nano është njeriu që administroi me rotacion të jashtëzakonshëm politik procesin e transferimit të pushtetit në 2005 dhe ishte Fatos Nano që në 1997 pas një lufte gati civile në Shqipëri kur mori pushtetin nuk u hakmor që të bënte ndarjen e pushteteve nga njëri tjetri, e modernizoi pushtetin politik e Shqipërisë”, tha Kulla.
    Ilir Kulla jep këtë koment për largimin e ish-kryeministrit socialist nga politika ndërkohë që kolegët e tij politik të kohës nga e djathta, janë ende aktiv ose në burg. “Sepse Fatos Nano nuk ishte president i federatës së shahut ose ndonjë federate tjetër sportive e politike që e shikonte vetën në përjetësi. Fatos Nano nuk kishte ndonjë garë të hynte në histori kishte bërë historinë. Të gjithë ata që sot që përmendët ju që bëjnë gjithçka për mos tu larguar nga politika e bëjnë se janë saktësisht e kundërta e Fatos Nanos. Ai ka atë batutën e famshme thënë në kongresin ne 2003-shit. Ka thënë: “Unë jam Fatos Nano dhe pas më vjen historia juaj”, tha ai.
     
     

  • “Fatos Nano nxori shtetin nga gërmadhat e ’97-ës”, Petro Koçi: U burgos nga babëzia politike e Berishës

    “Fatos Nano nxori shtetin nga gërmadhat e ’97-ës”, Petro Koçi: U burgos nga babëzia politike e Berishës

    Ish-deputeti Petro Koçi ka folur dje pas homazheve për ish-liderin historik të Partisë Socialiste Fatos Nano, i cili ditën e djeshme u përcoll për në banesën e fundit. Koçi tha se Fatos Nano është një arkitekt shtetëror, pasi sipas tij, ngriti shtetin nga ‘gërmadhat e 97’’, duke e kthyer në një shtet normal dhe qytetar. Ai e ka cilësuar Nanon si kampion të lirisë dhe demokracisë institucionale, teksa shtoi se kishte një shpirt sakrifice. “Është ndonjëherë e vështirë që të bësh një përkufizim të plotë, por mund të them pa diskutim se Fatos Nano ishte kampion i lirisë dhe demokracisë institucionale, një njeri me një intelekt të pakonkurrueshëm dhe më një shpirt sakrifice që e ka dalluar nga atë nga lidershipi me shumë të tjerë. Ju e dini që ai bëri një burg, gjë që s’ka ndodhur figura të tjera politike. Fatos Nano është një arkitekt shtetëror, sepse i takoi misioni që të ngrinte në konstruksion politik dhe shtetëror, së pari atë që mund të quajmë ‘gërmadhë e partisë së Punës’ dhe së bashku me të gjithë ne ngritëm një PS moderne dhe europiane, por edhe me përgjegjshmëri të madhe politike dhe nga ana tjetër mbi gërmadhat e 97’, i takoi të ngrinte një shtet normal dhe qytetar, të cilën e dorëzoi në 2005.
    Ndryshe e mori dhe ndryshe e la”, tha ai. Petro Koçi u shpreh gjithashtu Nano është burgosur nga epshi dhe babëzia politike e Sali Berishës. Por në dallim nga të tjerët, sipas Koçit, Nano nuk vuante nga obsesioni për pushtet. “Në lidhje me planin e brendshëm, e thashë që Fatosi ka qenë kampion i lirive dhe i demokracisë institucionale. Atë e kanë luftuar së brendshmi. Mbase nuk është dita sot, por edhe kur ai ishte në burg, pati një përpjekje brenda PS-së, për ta riburgosur politikisht, për ta rrëzuar nga pozita e kryetarit në kohën që ai ishte në burg nga epshi dhe babëzia politike e Sali Berishës. Por në dallim nga të tjerët, ai nuk vuante nga obsesioni për pushtet. Dhe kjo e dallon atë nga atyre që kanë pasur apo kanë pushtet në partira apo nivele shtetërore”, u shpreh Koçi për “Report Tv”. Ish-deputeti theksoi se ish-lideri historik i PS-së, nuk ishte xheloz kur dikush kishte pikë të larta në reputacion dhe vlera. Madje ai shpesh herë katapultonte në pushtet njerëz që e sulmonin, teksa këtu përmendi emrin e Ilir Metës.
    “Ky ishte misioni i tij, i duhej të ringrinte shtet dhe politikë mbi gërmadha. Në gjithë këtë mision të së majtës, ai krijonte energji me bashkëpunëtor nga më të shumtët dhe kishte një gjë Fatos Nano, nuk i druhej askujt nga pikëpamja e intelektit dhe e reputacionit. Nuk ishte xheloz kur dikush kishte pikë të larta në reputacion dhe në vlera. Sigurisht që ishte më shumë sportiv sesa duhet, këtë e kam thënë edhe kur e kam vizituar në burg, pasi ishte optimist. Dhe kur kam dalë nga burgu i bënçes, i kam thënë shokut tim, ky është më sportiv sesa duhet. Këta që thonë këta që ishte liberal, duhet parë, pasi ishte mungesa e obsesionit të tij për pushtet. Ne kemi pasur debate politike, por unë nuk e kam luftuar kurrë. Unë e kam kritikuar shumë dhe e kam dashur. Mendoj se kishte një gabim, njerëzit që e luftonin, problemi është shpesh herë i katapultonte duke i dhënë pushtet dhe ata e shfrytëzonin këtë për ta sulmuar, siç është rasti i Metës, të cilin e bëri kryetar partia edhe pa respektuar rregullat”, tha ish-deputeti Koçi.

  • “Hipokrit i pafytyrë”, Bardhi: Rama nuk ka lënë gjë pa thënë e pa bërë kundër Fatos Nanos!

    “Hipokrit i pafytyrë”, Bardhi: Rama nuk ka lënë gjë pa thënë e pa bërë kundër Fatos Nanos!

    Kreu i grupit parlamentar të Partisë Demokratike, Gazment Bardhi, ka reaguar ndaj kryeministrit Edi Rama, pas deklaratave të këtij të fundit gjatë ceremonisë mortore të Fatos Nanos.
    Në një postim në rrjetin social Facebook, Bardhi e akuzon Ramën për hipokrizi dhe mungesë dinjiteti, duke theksuar se “nuk ka asgjë më të ulët sesa përdorimi i një funerali për sulme politike ndaj kundërshtarëve”.
    Sipas tij, Rama, i cili dikur nuk ka lënë gjë pa thënë kundër ish-kryeministrit Nano, sot përpiqet të përfitojë politikisht edhe nga vdekja e tij, për të larë mëkatet e së shkuarës dhe për të ndërtuar një narrativë të rreme për veten.
    Postimi i plotë:
    Hipokrizia, dje dhe sot, me zë dhe me figurë!
    Edi Rama është aq i paftyrë sa përdori një funeral për sulm banal ndaj kundërshtarëve politik. I njëjti që ska lënë gjë pa thënë e pa bërë kundër Fatos Nanos!

  • Djali i Fatos Nanos: Babai im më mësoi demokracinë dhe forcën e ringritjes! Burrë i rrallë shteti

    Djali i Fatos Nanos: Babai im më mësoi demokracinë dhe forcën e ringritjes! Burrë i rrallë shteti

    Sokol Nano, djali i ish-kryeministrit Fatos Nano, mbajti një fjalë të shkurtër të ndjerë gjatë ceremonisë së lamtumirës për të atin.
    Ai tha se do ta kujtojnë si baba, por edhe si burrë të rrallë shteti që vuri atdheun para vetëvetes.
    “Të nderuar të pranishëm, familjarë, miq, shokë, jam thellësisht i prekur nga vëmendja dhe dashuria juaj që kam ndjerë për babain tim në këto ditë të vështira.
    Familjen time ka lodhur fati me popullin shqiptar, ne e kemi ndjerë dashurinë e njerëzve ndaj Fatosit. Sot është ditë ndryshe, ai ikën nga kjo botë, por vetëm fizikisht.
    Im at ishte i pari që më foli për demokracinë, nuk e kishte frikë humbjen se ishte kalorës. Më dha mësim me forcën e shembullit, më mësoi shumëçka, garën e vërtetë dhe ringritjen. Më foli për socialdemokracinë, për Shqipërinë europiane dhe distancimin nga frika.
    Besonte se politika shkonte përtej luftës personale. Mbolli ide, kulturë dhe qytetarë. Tolerant me gjithkënd që mendonte ndrysh. Sot i them lamtumirë tim eti, faleminderit kamion”-u shpreh Sokol Nano.

  • Ngjela: Turp kombëtar! Nano duhet të prehej në varrezat e personaliteteve të kombit, jo në Sharrë

    Ngjela: Turp kombëtar! Nano duhet të prehej në varrezat e personaliteteve të kombit, jo në Sharrë

    Këtë të diel iu dha lamtumira e fundit ish-kryeministrit Fatos Nano, i cili u nda nga jeta dy ditë më parë.

    Avokati Spartak Ngjela ka reaguar me tone të ashpra sa i përket vendit ku do të prehet përgjithmonë ish-kryeministri. Ai thotë se Nano duhet të prehet në varrezat e personaliteteve të kombit dhe jo në ato të zakonshme të Sharrës.
    Postimi i plotë i Spartak Ngjelës:
    Turp kombëtar dhe fyerje e personalitet të Republikës së Shqipërisë
    Sot në Tiranë, tre herë kryeministrin e Shqipërisë, shkëlqesinë e tij zotin Fatos Nano, po e varrosin në varrezat e zakonshme në Tiranë.
    Dhe kjo është një shkelje e rëndë kundër historisë së Shqipërisë dhe ndjenjës kombëtare, karakterit dhe personalitetit të Republikës së Shqipërisë dhe vetë shoqërisë shqiptare.
    Urgjentisht ky akt duhet të ndalohet sa më shpejt që të jetë e mundur, dhe shkëlqesia e tij, Fatos Nano, të vendoset në Varrezat e Personaliteteve të Kombit shqiptar.