Lajmidites.com

Tag: fajtor

  • Atentati i dytë ndaj Trump/ Ryan Routh shpallet fajtor, dënohet me burgim të përjetshëm

    Atentati i dytë ndaj Trump/ Ryan Routh shpallet fajtor, dënohet me burgim të përjetshëm

    Një juri në Fort Pierce, Florida, shpalli fajtor Ryan Routh, 59 vjeç, për tentativë vrasjeje të presidentit amerikan Donald Trump, ngjarje që ndodhi në shtator 2024 në fushën e golfit të Trump në West Palm Beach.

    Routh akuzohej për pesë akuza penale, përfshirë tentativën për vrasje të një kandidati për president, armëmbajtje pa leje në kryerje të një akti dhune dhe sulm ndaj një agjenti të Shërbimit Sekret.

    Ngjarja ndodhi më 15 shtator 2024, kur Routh u kap me pushkë në shkurre, ndërsa Trump dhe grupi i tij po i afroheshin vendit të ngjarjes. Pas një periudhe të shkurtër diskutimesh, juria e shpalli fajtor për të gjitha akuzat. Ai tani përballet me dënimin me burgim të përjetshëm.

    Prokurorët deklaruan se Routh kishte blerë një armë të klasit ushtarak, kishte ndjekur lëvizjet e Trump dhe kishte përdorur mbi 12 telefona të përkohshëm në përpjekje për të realizuar atentatin.

    Ngjarja ndodhi vetëm nëntë javë pas një tjetër tentative për vrasje ndaj Trump gjatë një mitingu në Butler, Pennsylvania, ku Trump mbeti i lënduar lehtë pas një goditjeje me plumb në vesh.

    Routh zgjodhi të përfaqësonte vetveten në gjyq, ndonëse nuk kishte asnjë përvojë juridike. Sjellja e tij gjatë procesit shpesh kërcënonte të dëmtonte ecurinë e gjyqit.

    Gjyqtarja Aileen Cannon, e njohur për hedhjen poshtë të një çështjeje të mëparshme ndaj Trump, e paralajmëroi disa herë Routh për komentet e tij të pastrukturuara, si kur tha: ‘Gjyqet moderne duket se kanë eliminuar gjithçka që është njerëzore.’

    Sipas prokurorisë, Routh kishte bërë 17 vizita në fushën e golfit të Trump për ta vëzhguar, ndërsa në të kaluarën ishte përpjekur të rekrutonte luftëtarë nga Afganistani, Moldavia dhe Tajvani për të luftuar në Ukrainë kundër forcave ruse. Dikur punonjës ndërtimi në Karolinën e Veriut, ai më pas ishte zhvendosur në Hawaii dhe vetëshpallej si udhëheqës ushtarak.

    Në gjyq, dy dëshmitarë treguan se Routh u kishte dërguar një kuti pesë muaj para ngjarjes, e mbushur me tela, fishekë dhe një letër 12-faqëshe ku thuhej:

     ‘Kjo ishte një tentativë për të vrarë Donald Trump, por dështova. Dhurova gjithçka që kisha. Tani është radha juaj për të përfunduar punën.’

    Routh u pa nga një agjent i Shërbimit Sekret teksa fshihej në shkurre me pushkë në dorë. Ai u qëllua nga agjentët dhe u largua, por më vonë u arrestua në një automjet pas një denoncimi nga një dëshmitar që kishte regjistruar targën e makinës ku Routh ishte futur.

    Në vend që të dëshmonte vetë, Routh thirri tre dëshmitarë për të folur për karakterin e tij. Njëri prej tyre, një mik i vjetër, e përshkroi si njeri ‘paqësor dhe jo të dhunshëm.’ Një tjetër dëshmitar, ekspert i forcave të armatosura, deklaroi se arma e përdorur nga Routh (një version kinez i AK-47) ishte jofunksionale dhe e modifikuar në mënyrë amatore me ngjitës dhe shirita.

    Gjatë pyetjeve, Routh e pyeti dëshmitarin nëse një person pa përkushtim të plotë ndaj një ‘misioni’ ka nevojë për një ‘plan arratisjeje’, duke shtuar një notë filozofike që çorientoi sallën e gjyqit.

  • Dënohet me 27 vite e tre muaj burg ish-presidenti i Brazilit

    Dënohet me 27 vite e tre muaj burg ish-presidenti i Brazilit

    Jair Bolsonaro

    BRAZIL-Ish-presidenti i Brazilit, Jair Bolsonaro është dënuar me 27 vjet e tre muaj burgim, pasi u shpall fajtor për komplot për grusht shteti ushtarak. BBC shkruan se trupa gjykuese e përbërë nga 5 gjygjtarë e shpalli fajtor për udhëheqjen e një komploti që synonte ta mbante në pushtet pasi humbi zgjedhjet e vitit 2022 ndaj rivalit të tij të krahut të majtë, Luiz Inácio Lula da Silva.
    Avokatët e Bolsonaros e kanë quajtur dënimin “absurd dhe të tepruar” dhe kanë thënë se do të paraqesin “ankesat e duhura”. Paneli i Gjykatës së Lartë gjithashtu e ndaloi atë të kandidonte për poste publike deri në vitin 2033.
    Bolsonaro, i cili u vu në arrest shtëpiak pasi u konsiderua si rrezik për t’u arratisur, nuk mori pjesë personalisht në gjykatë. Në deklaratat e para ish-presidenti është shprehur se e gjitha kjo ishte hartuar për ta penguar atë të kandidonte në zgjedhjet presidenciale të vitit 2026 edhe pse atij i ishte ndaluar tashmë të ushtronte detyrë publike për akuza të veçanta. Ai e ka quajtur çështjen një “gjueti shtrigash”.

    Fjalët e tij janë përsëritur më parë nga Presidenti i SHBA-së, Donald Trump, i cili vendosi tarifa prej 50% për mallrat braziliane, duke i cilësuar ato si hakmarrje për ndjekjen penale të Bolsonaros./ZËRI

  • Bolsonaro shpallet fajtor për komplot grushti shteti në Brazil

    Bolsonaro shpallet fajtor për komplot grushti shteti në Brazil

    Brazil, 12 shtator 2025 – Gjykata e Lartë e Brazilit shpalli fajtor ish-presidentin Jair Bolsonaro për komplot grushti shteti, duke e akuzuar se u përpoq të qëndronte në pushtet edhe pas humbjes në zgjedhjet presidenciale të vitit 2022.

     

    Sipas vendimit, Bolsonaro u shpall fajtor për disa akuza të rënda, përfshirë pjesëmarrjen në një organizatë kriminale të armatosur, tentativën për të përmbysur rendin demokratik, organizimin e grushtit të shtetit dhe dëmtimin e institucioneve shtetërore dhe pronës së mbrojtur kulturore. Vendimi u mor nga shumica e trupës gjyqësore, me katër nga pesë gjyqtarë që votuan për fajësi.

     

    Pasojat

     

    Ish-presidenti rrezikon një dënim që mund të arrijë deri në 40 vjet burg, si dhe është zyrtarisht i penguar të kandidojë për poste publike deri në vitin 2030. Nga ana e tij, Bolsonaro i ka mohuar akuzat, ndërsa avokatët e tij pretendojnë se procesi është politik dhe se nuk janë paraqitur prova të mjaftueshme.

     

    Reagimet e mëhershme të Trump
     

    Vendimi ka ngjallur reagime të forta edhe jashtë Brazilit. Presidenti amerikan Donald Trump e ka cilësuar procesin si një “gjueti shtrigash” dhe ka kërkuar që autoritetet braziliane “ta lënë Bolsonaron në paqe”. Ai shtoi se lideri brazilian “nuk është fajtor për asgjë, përveçse ka luftuar për popullin”, duke e krahasuar situatën e tij me sfidat e veta ligjore.

  • Ish-presidenti i Brazilit shpallet fajtor për komplot për grushti shteti

    Ish-presidenti i Brazilit shpallet fajtor për komplot për grushti shteti

    Ish-presidenti i Brazilit, Jair Bolsonaro, është shpallur fajtor nga Gjykata Supreme për komplot për grusht shtet, me qëllim që të mbetej në pushtet pas humbjes në zgjedhjet e vitit 2022. Kjo nënkupton se me shumë gjasa Bolsonaro do të dënohet me një burgim të gjatë.
    Ky vendim erdhi pasi tre nga pesë gjyqtarët e Supremes kanë votuar për ta shpallur atë fajtor.
    Gjykatësja Carmen Lucia ishte vota e tretë, që mundësoi arritjen e shumicës nga pesë gjykatësit që e gjeti udhëheqësin e krahut të djathtë fajtor për komplot për grusht shtet, pasi ai humbi zgjedhjet ndaj Luiz Inacio Lula Da Silvas.

    Megjithatë, vendimi ndaj Bolsonaros, 70 vjeç, do të bëhet përfundimtar, vetëm atëherë kur edhe gjyqtari i pestë të japë mendimin e tij.
    Ish-kapiteni i ushtrisë mund të përballet me një dënim me burgim me më shumë se 40 vjet nëse gjendet fajtor për pesë akuzat, përfshirë udhëheqjen e një “organizate kriminale” si dhe për komplot për rrëzimin e presidentit aktual, Lula.
    Gjyqtarja Lucia votoi për ta dënuar Bolsonaron për akuzën e krimit të organizuar, por ende nuk ka votuar edhe për katër akuzat e tjera.
    Bolsonaro pretendon se ai është viktimë e përndjekjes politike.
    Aleati i tij, presidenti amerikan, Donald Trump, e ka cilësuar gjykimin ndaj Bolsonaros si “gjeti shtrigash” dhe ka vendosur tarifë prej 50 për qind ndaj një sërë importesh të Brazilit në shenjë hakmarrjeje./REL

  • Ish-presidenti i Brazilit shpallet fajtor për grusht shteti, rrezikon deri në 43 vjet burg

    Ish-presidenti i Brazilit shpallet fajtor për grusht shteti, rrezikon deri në 43 vjet burg

    Ish-presidenti brazilian Jair Bolsonaro u shpall fajtor për komplot për një grusht shteti ushtarak të enjten, pas një vendimi me shumicë votash nga Gjykata Supreme.
    Sipas Guardian, gjyqtarja Carmen Lucia Antunes Rocha vendosi të enjten se Bolsonaro – i cili u zgjodh president në vitin 2018 – ishte fajtor për përpjekjen për të qëndruar me dhunë në pushtet pas humbjes së tij në zgjedhjet e vitit 2022.
    Duke njoftuar vendimin e saj, Rocha e quajti atë një “përpjekje nga (Bolsonaro) për të mbjellë farën keqdashëse të antidemokracisë” në Brazil, por vlerësoi mënyrën se si institucionet e vendit mbijetuan dhe luftuan.
    “Demokracia braziliane nuk është tronditur”, i tha Rocha një gjykate në kryeqytetin Brasilia, duke paralajmëruar për përhapjen e “virusit të autoritarizmit”.
    Fajësia e tij u vendos nga shumica e gjyqtarëve – me 3 nga 5 që votuan në favor të dënimit të tij.
    Dënimi i Bolsonaros pritet të jepet të premten, pasi gjyqtari i fundit të hedhë votën e tij.
    Në Brazil, dënimet për krime të tilla si organizimi i një grushti shteti dhe përpjekja e dhunshme për të përmbysur demokracinë në Brazil mund të arrijnë në 43 vjet.
    Vërehet se Jair Bolsonaro nuk u paraqit në gjykatë këtë javë, pasi është nën arrest shtëpiak dhe ruhet vazhdimisht nga policia.
    Akuzat dhe tarifat e Trump për gjyqin e Bolsonaros
    Jair Bolsonaro u akuzua në shkurt për mbikëqyrjen e një skeme masive për të minuar besimin e kombit të tij në zgjedhjet e vitit 2022 dhe më pas për të përmbysur atë votim – edhe kur aleatët e tij nuk mundën të gjenin prova për mashtrim.
    Prokurori i përgjithshëm i Brazilit, Paulo Gonçalves Banco, pretendoi në atë kohë se Bolsonaro dhe 33 të tjerë ishin të përfshirë në një seri krimesh kundër demokracisë braziliane dhe një komploti për grusht shteti për të qëndruar në pushtet pavarësisht humbjes.
    Akuzat kundër Bolsonaros kanë tërhequr vëmendjen edhe të qeverisë amerikane. Veçanërisht, në fund të gushtit, viza amerikane e Ministrit Brazilian të Drejtësisë Ricardo Lewandowski u revokua.
    Për më tepër, Presidenti i SHBA-së Donald Trump kishte vendosur një tarifë prej 50% për një pjesë të eksporteve braziliane në SHBA – duke theksuar se çështja ka të bëjë me një “gjueti shtrigash” viktimë e të cilës është edhe ish-presidenti i ekstremit të djathtë të vendit të Amerikës Latine, Bolsonaro.
    Administrata Trump kishte vendosur gjithashtu sanksione ndaj gjyqtarit Alexandre de Moraes, i cili po kryeson gjyqin e Bolsonaros për akuzat për tentativë grushti shteti, duke i revokuar vizën.

  • Ish-presidenti i Brazilit, Bolsonaro, shpallet fajtor për komplot për grusht shteti

    Ish-presidenti i Brazilit, Bolsonaro, shpallet fajtor për komplot për grusht shteti

    Jair Bolsonaro

    BRAZIL- Ish-presidenti brazilian Jair Bolsonaro u dënua me shumicë votash nga Gjykata Supreme të enjten për komplotimin e një grushti shteti për të mbetur në pushtet pas humbjes së zgjedhjeve të vitit 2022, një goditje e fuqishme për lëvizjen populiste të ekstremit të djathtë që ai krijoi. Vendimi i Gjykatës Supreme të Brazilit e bën Bolsonaron ish-presidentin e parë në historinë e vendit që dënohet për sulm ndaj demokracisë.
    Tre nga pesë gjyqtarë të Gjykatës së Lartë e shpallën 70-vjeçarin fajtor për udhëheqjen e një komploti që synonte ta mbante në pushtet, pasi humbi zgjedhjet e vitit 2022 ndaj rivalit të tij të krahut të majtë, Luiz Inácio Lula da Silva. Ndërsa komploti nuk arriti të siguronte mbështetje të mjaftueshme nga ushtria për të vazhduar, ai kulmoi me sulmin ndaj ndërtesave qeveritare nga mbështetësit e Bolsonaros më 8 janar 2023, zbuluan gjyqtarët.
    Një gjyqtar e liroi Bolsonaron dhe një gjyqtar i fundit ende nuk ka votuar, por shumica e thjeshtë është e mjaftueshme për të dënuar ish-presidentin, i cili tani mund të përballet me dekada burg. 
    Fati i ish-presidentes u vulos të enjten kur gjyqtarja Carmén Lúcia hodhi votën e saj. Ajo e shpalli atë fajtor për të pesë akuzat: përpjekje për të organizuar një grusht shteti, drejtim të një organizate të armatosur kriminale, përpjekje për heqjen me dhunë të sundimit demokratik të ligjit dhe dy akuza të tjera që lidhen me dëmtimin e pronës gjatë sulmit me forcë ndaj ndërtesave në Brasília më 8 janar 2023.
    Një gjyqtar i katërt, Luiz Fux, votoi për të liruar Bolsonaron nga akuzat të mërkurën, duke pretenduar se nuk kishte “absolutisht asnjë provë” që ish-presidenti kishte qenë në dijeni ose pjesë e një komploti të dyshuar për të vrarë Lulën dhe Moraes në fund të vitit 2022, ose kishte tentuar të organizonte një grusht shteti.
    Fux e quajti kryengritjen e 8 janarit 2023 – kur Bolsonaristët e zjarrtë plaçkitën gjykatën supreme, pallatin presidencial dhe kongresin – një “akt barbar” që kishte shkaktuar “dëme në shkallë amazoniane”. Por gjyqtari, i cili gjithashtu argumentoi në mënyrë kontraverse se gjykata nuk kishte juridiksion mbi çështjen, pretendoi se nuk kishte prova që Bolsonaro ishte fajtor për nxitjen e trazirave.
    Megjithatë, Fux votoi për të dënuar dy nga aleatët më të ngushtë të Bolsonaros – ish-ministrin e tij të mbrojtjes, gjeneralin Walter Braga Netto, dhe ish-ndihmësin e tij, nënkolonel Mauro Cid – për krimin e përpjekjes së dhunshme për të shfuqizuar demokracinë braziliane. Gjykatësi arriti në përfundimin se dyshja kishte ndihmuar në planifikimin dhe financimin e një komploti për të vrarë Moraes me qëllim gjenerimin e kaosit shoqëror që ata shpresonin se do të shkaktonte një ndërhyrje ushtarake.
    Dënimi i Bolsonaros pritet të caktohet të premten, pasi gjyqtari i mbetur, Cristiano Zanin, të ketë hedhur votën e tij. Ekspertët thonë se dënimi për krime, përfshirë organizimin e një grushti shteti dhe përpjekjen e dhunshme për të shfuqizuar demokracinë e Brazilit, mund të jetë deri në 43 vjet. Ish-presidenti nuk mori pjesë në gjykatë këtë javë, duke qëndruar në rezidencën e tij aty pranë, ku është nën arrest shtëpiak dhe ku oficerët e policisë janë vendosur për t’u siguruar që ai të mos ikë në njërën nga ambasadat e huaja të Brazilias./ZËRI

  • Hakeri 33-vjeçar nga Kosova deklarohet fajtor, rrezikon 10 vite burg federal në SHBA (Emri)

    Hakeri 33-vjeçar nga Kosova deklarohet fajtor, rrezikon 10 vite burg federal në SHBA (Emri)

    Liridon Masurica, 33-vjeçar nga Gjilani, është deklaruar fajtor për komplot dhe mashtrim me akses në pajisje në SHBA.
    Ai ishte administratori kryesor i faqes kriminale BlackDB.cc, e cila operonte ilegalisht nga viti 2018 deri në 2025. Përmes kësaj platforme, janë shitur kredenciale të vjedhura, informacione të kartave të kreditit dhe të dhëna personale. Këto të dhëna janë përdorur për aktivitete të paligjshme si mashtrim tatimor dhe vjedhje identiteti.
    Masurica u arrestua në Kosovë më 12 dhjetor 2024 dhe u ekstradua në SHBA. Ai përballet me një dënim maksimal prej 10 vitesh burg federal. Hetimet janë kryer nga FBI në bashkëpunim me Policinë e Kosovës dhe institucione të tjera ndërkombëtare. Rasti po ndiqet nga Prokurori amerikan Carlton C. Gammons.

  • “Nuk ndihem fajtor për largimin e Adrian Bajramit, ndodhte dhe në Brazil”! Silvinjo flet edhe për gjendjen e Armando Brojës

    “Nuk ndihem fajtor për largimin e Adrian Bajramit, ndodhte dhe në Brazil”! Silvinjo flet edhe për gjendjen e Armando Brojës

    Trajneri i Shqipërisë, Silvinjo, ka dalë në konferencën për shtyp para ndeshjes me Gjibraltarin. Silvinjo foli sa i përket largimit të Adrian Bajramit dhe njëkohësisht tregoi edhe gjendjen e Armando Brojës.
    “Pas konferencës për shtyp në datën 29 kur doli lista nuk pati ndryshim dhe një ditë më pas dikush nga Federata më tha që Bajrami ndërroi Kombëtare. Fola më pas me të në telefon për 30 minuta, por situata ishte shumë e qartë, suksese lojtarit. Kjo ka ndodhur edhe kur isha te Brazili, lojtarët që bënin lëvizje të tilla Brazil-Itali, por kjo ishte zgjedhja e tij dhe i uroj shumë fat.
    Unë nuk ndihem fajtor, kam folur me të shumë herë, nuk ka luajtur te Benfika, i kam thënë të shijoj Kombëtaren dhe i kam treguar se ku duhet të përmirësohet. Por mbetet cdo bisedë mes nesh private, i urojmë suksese këtij futbollisti. Broja? është shumë mirë, fizikisht shumë mirë, asnjë lloj problemi, tani i duhet që të luajë futboll te Burnley. Luajti shumë minuta ndaj Derby, nuk ishte ndeshja më e mirë e Brojës, por i nevojiten minutat dhe të futet në ritëm për të luajtur më shumë dhe për të fituar më shumë eksperiencë”, tha Silvinjo. /Sport Ekspres/

  • Sylvinho reagon për “tradhtinë” e Bajramit: E kam ndihmuar, por nuk ndihem fajtor pse iku

    Sylvinho reagon për “tradhtinë” e Bajramit: E kam ndihmuar, por nuk ndihem fajtor pse iku

    Trajneri i Kombëtares shqiptare, Sylvinho, ka folur gjatë në konferencën e sotme për shtyp, një ditë para miqësores ndaj Gjibraltarit. Sigurisht që tema kryesore ishte “tradhtia” e Adrian Bajramit, i cili në mënyrë të befasishme la Shqipërinë dhe zgjodhi Zvicrën.
    “Ai kishte shumë probleme te Benfica, nuk luante, por ne e afruam në kombëtare. Të shtunën kam folur 30 minuta me të në telefon, por përmbajtja e bisedës mbetet mes meje dhe tij.
    Nuk ndihem fajtor në asnjë mënyrë për largimin e tij, nuk ka shans. I uroj më të mirën Bajramit, këto janë gjëra që ndodhin kudo. Mbaj mend që ka ndodhur edhe te Brazili, ku kishte lojtarë që ishin në dilemë të zgjidhnin Brazilin apo Italinë. E përsëris, i uroj më të mirën”, tha Sylvinho.
    Më pas Sylvinho, u ndal edhe te çështje të tjera si ndeshja me Letoninë dhe te Armando Broja.
    “Nëse nuk fitojmë me Letoninë, e dimë që nuk kemi më shanse për Botërorin. Është kundërshtar i vështirë, skuadër fizike dhe shumë e organizuar. Por, nuk jemi në presion. Jemi mësuar me situata të tilla dhe do ta përgatisim ndeshjen shumë mirë”, u shpreh Sylvinho.
    “Broja është mirë, nuk ka probleme. Ai e di që është e rëndësishme për të që duhet të vazhdojë të luajë. Është një lojtar i ri dhe është e rëndësishme që të futet në fushë, të luajë, të ndihmojë skuadrën, të fitojë sa më shumë eksperiencë”, shtoi Sylvinho.

  • Lifestyle Fajtor për një skemë mashtrimi në bashkëpunim me nënën e tij, dënohet me burg reperi i njohur amerikan

    Lifestyle Fajtor për një skemë mashtrimi në bashkëpunim me nënën e tij, dënohet me burg reperi i njohur amerikan