Tag: evente

Flet Anyla Pula, themeluese e AP Connection Team Mbi 15 mijë persona morën pjesë në koncertin e Keinemusik në Tiranë, mes tyre rreth 7 mijë turistë nga rajoni dhe vende të tjera, duke e kthyer eventin në një nxitje konkrete për turizmin dhe ekonominë e kryeqytetit.“Ky sukses tregon se Shqipëria ka potencial për të organizuar evente të nivelit ndërkombëtar”, nënvizon Anyla Pula, nga AP Connection Team, një prej organizatoreve të koncertit. Si e vlerësoni organizimin e koncertit dhe sa ishte pjesëmarrja?Organizimi i eventit Keinemusik në Tiranë shkoi shumë mirë, madje përtej pritshmërive tona.Pavarësisht disa incidenteve të vogla logjistike – që janë të zakonshme në koncerte të mëdha me pjesëmarrje masive – gjithçka u menaxhua me kujdes dhe profesionalizëm.Për shembull, edhe në evente ndërkombëtare si Brunch Elektronik në Barcelonë apo Kappa Futur Festival në Torino, shpesh hasen sfida si vonesa në hyrje, ndërprerje të përkohshme të rrjetit apo probleme teknike me ndriçimin – të gjitha pjesë e natyrshme e organizimit të ngjarjeve në këtë shkallë.Në rastin tonë, morën pjesë mbi 15,000 persona dhe feedback-u nga audienca dhe artistët ishte jashtëzakonisht pozitiv.Ky sukses konfirmon, edhe një herë, se Shqipëria ka kapacitetin dhe potencialin për të organizuar evente të nivelit ndërkombëtar dhe për të mirëpritur DJ si Keinemusik me standardet më të larta të mundshme. A pati turistë apo pjesëmarrës nga jashtë vendit?Pjesëmarrja arriti në 15,000 persona, nga të cilët më shumë se 7,000 ishin të huaj – kryesisht nga Kosova, Mali i Zi, Maqedonia e Veriut, Serbia, Italia e Greqia, por edhe nga vende më të largëta si Arabia Saudite e Tunizia.Shumë prej tyre nuk udhëtuan vetëm për performancën e Keinemusik, por e panë këtë si një mundësi për të eksploruar Shqipërinë, e cila tashmë është shndërruar në një atraksion turistik rajonal.Falë linjave të rregullta ajrore me vendet fqinje, Shqipëria është më e lidhur se kurrë më parë me rajonin dhe Europën.Ky event solli ndikim konkret në turizëm dhe ekonomi: rritje të dukshme në rezervimet e hoteleve, fluks në restorante dhe lokale, si dhe aktivizim të shërbimeve të transportit dhe bizneseve lokale.Keinemusik në Tiranë shërbeu jo vetëm si një event kulturor dhe muzikor, por edhe si një promovim i drejtpërdrejtë i potencialit turistik dhe mikpritës të Shqipërisë. Cilat ishin sfidat kryesore të këtij eventi dhe si u menaxhuan?Edhe pse eventi Keinemusik në Tiranë ishte një sukses i madh, një organizim i kësaj shkalle natyrshëm sjell me vete edhe disa sfida:Fluksi i madh në hyrje – Një nga sfidat kryesore ishte vala e njerëzve në hyrje, sidomos në orët kyçe para performancës së artistëve kryesorë.Menaxhimi i një audience prej 15,000 personash kërkon koordinim shumë të kujdesshëm të sigurisë dhe fluksit.Falë stafit të trajnuar dhe komunikimit të vazhdueshëm me ekipet e sigurisë, situata u mbajt nën kontroll dhe hyrja u zhbllokua brenda pak minutash.Zbatimi i sistemit “cashless” – Për herë të parë në një event të këtij niveli në Shqipëri u implementua sistemi “cashless”, ku pagesat bëheshin përmes wristbands të mbushura paraprakisht.Kjo ishte një risi për tregun shqiptar, ku publiku nuk është ende i mësuar me këtë model.Në orët e para pati vonesa dhe radhë në pikat e mbushjes, por për të ardhmen parashikojmë më shumë pika top-up, staf i posaçëm për asistencë teknike dhe fushata paraprake informuese për publikun. A ka gjasa që Tirana të vazhdojë të presë koncerte të këtij niveli në të ardhmen?Po, Tirana ka potencial të madh për të vazhduar të presë evente të kësaj shkalle.Suksesi i Keinemusik tregoi jo vetëm interes të lartë nga publiku lokal dhe rajonal, por edhe kapacitet për organizim me standarde ndërkombëtare.Megjithatë, për të arritur një nivel të qëndrueshëm, nevojitet investim në infrastrukturë, edukim të publikut dhe mbështetje institucionale. Çfarë vëreni për sa u përket grupmoshave dhe sjelljes së audiencës?Në evente të mëdha si Keinemusik, dominoi grupmosha 18–24 vjeç, e njohur për energjinë dhe aktivitetin në rrjete sociale.Ata kërkojnë përvoja vizuale dhe dixhitale që ndahen lehtësisht në Instagram e TikTok. Sjellja e tyre karakterizohet nga entuziazëm, pjesëmarrje aktive dhe kërkesa për shërbim të shpejtë.Kjo tregon se Tirana ka një audiencë të re, dinamike dhe të gatshme për evente të këtij niveli.   Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.