Lajmidites.com

Tag: eposi

  • “Eposi shqiptar”, interpretimi i ri në skenë i “Lahutës së Malcisë” së At Gjergj Fishtës

    “Eposi shqiptar”, interpretimi i ri në skenë i “Lahutës së Malcisë” së At Gjergj Fishtës

    Në Pallatin e Kulturës në Lezhë u ngjit në skenë shfaqja “Eposi Shqiptar”, një interpretim i ri i “Lahutës së Malcis” së At Gjergj Fishtës.

    Përmes një gërshetimi mjeshtëror të aktrimit, muzikës tradicionale dhe skenografisë simbolike, publiku përjetoi një mënyrë të re e të ndjerë për të njohur kryeveprën e poetit kombëtar.
    Dramatizimi dhe regjia nga Kol Kunora, ndërsa të rinjtë nga Lezha sollën aktrimin e tyre përmes kësaj vepre të madhe. Tingujt e lahutës u përcollën me mjeshtëri nga Pretash Nilaj, i shpallur “Mjeshtër i Madh”, duke sjellë në sallë frymën autentike të epikës shqiptare.
    Sipas regjisorit Kunora, kjo shfaqje është vetëm hapi i parë i një cikli artistik që do të sjellë “Lahutën e Malcis” në forma të reja interpretimi, duke e afruar edhe më shumë me publikun e sotëm.
    Edhe për aktorët, përballja me gjuhën, emocionin dhe dimensionin filozofik të veprës ishte një sfidë e bukur që kërkonte përkushtim dhe ndjeshmëri.
    Ky projekt kulturor, pjesë e Tetorit Fishtjan, synon të ruajë e përcjellë trashëgiminë e At Fishtës në një formë bashkëkohore, që e bën artin e tij të gjallë në skenën e sotme.
     
     

    Top Channel

  • Shfaqet dramatizimi “Eposi shqiptar”, “Lahuta e Malcis” merr formë të re në skenën e Lezhës

    Shfaqet dramatizimi “Eposi shqiptar”, “Lahuta e Malcis” merr formë të re në skenën e Lezhës

    Në Pallatin e Kulturës në Lezhë u shfaq dramatizimi “Eposi Shqiptar”, një formë e re artistike për të prezantuar “Lahutën e Malcis” të At Gjergj Fishtës. Përmes ndërthurjes së aktrimit, muzikës, kostumografisë tradicionale dhe skenografisë simbolike, krijuesit sollën në skenë një mënyrë ndryshe për ta përjetuar veprën madhore të poetit.
    Shfaqja, me dramatizim dhe regji të Kol Kunorës, u realizua me interpretimin e aktorëve Mark Hilaj, Mario Paloka, Keslin Perdoda, Alesia Alcani dhe Gerald Ndreca, ndërsa Pretash Nilaj (Mjeshtër i Madh) përcolli tingujt autentikë të lahutës.
    Regjisori Kol Kunora u shpreh se ky koncept është vetëm fillimi i një cikli të ri prezantimesh të “Lahutës së Malcis”.

    “E kam pasur detyrim prej kohësh që ‘Lahutën e Malcis’ ta sillja në skenë në një formë më të plotë. Ajo është shumë e gjatë, dhe jemi munduar të ndërthurim ngjarjet më pikante që lidhen me Lezhën. Mendova ta krijoja me dramatizimin e pesë personazheve bashkë” , shprehet regjisori Kol Kunora
    Edhe për aktorët, interpretimi i kësaj vepre mbetet një sfidë për nga thellësia e gjuhës dhe emocionit që kërkon, por një mënyrë e denjë për ta ringjallur Fishtën në skenë.
    “Ishte diçka interesante dhe e veçantë në krahasim me herët e tjera. Gjatë kohës që kam bërë provat me regjisorin ose kam marrë pjesë në këtë projekt, kuptova sa pak e njoh Fishtën.”“Realisht, Fishta ka qenë një autor që e kam pasur shumë për zemër, dhe kur mu dha mundësia isha shumë e lumtur. Është një autor shumë i vështirë për t’u interpretuar nga të rinjtë.”
    Sipas aktorëve, kjo mund të jetë hera e parë në vitet e fundit që dramatizohet një vepër e Fishtës. Ky projekt kulturor, pjesë e Tetorit Fishtjan dhe i mbështetur nga Bashkia Lezhë, synon të sjellë trashëgiminë e poetit kombëtar në një formë bashkëkohore dhe të ndjeshme për publikun.
    /vizionplus.tv