Tag: edicion

Nga Julia Vrapi
Filma shqiptarë që janë realizuar nga regjisorë të njohur, fotografi nga sheshet e xhirimit para viteve 1990 apo dhe konkurse janë pjesë e programit këtë vit në aktivitetin “Open Cinema”. Filmat shqiptarë kanë qenë pjesë e rëndësishme e këtij aktiviteti që në fillime të tij, por edhe këtë vit që do të jetë edicioni i nëntë nga organizatorët është menduar një program i pasur artistik. Producenti dhe kineasti Skënder Jaçe thotë se edicioni i nëntë i aktivitetit “Open Cinema” për të cilin tashmë kanë nisur dhe përgatitjet pritet, që të nisë nga fundi i muajit qershor apo fillimi i muajt korrik. “Me aktivitetin “Open Cinema” është risi këtë vit, sepse do të kemi pranë ekranit ekspozitë nga sheshet e xhirimet me regjisorët dhe aktorët të filmit shqiptar, si dhe posterat e filmave më të mirë shqiptarë ndër vite. Këtë edicion do të kemi edhe një minikonkurs me publikun për batutat e filmit shqiptar, i cili do të shpërblehet me një vlerësim”, shprehet producenti dhe kineasti Skënder Jaçe.
“Open Cinema 2025” kinemaja shëtitëse në Shqipëri organizohet nga shtëpia kinematografike “Production Cinemania” dhe filma të regjisorëve Gëzim Erebara, Piro Milkani, Dhimitër Anagnosti, Muharrem Fejzo, Fehmi Hoshfi dhe të tjerë kineastëve janë pjesë e programit këtë edicion të nëntë, që do të nisë në sezonin veror. Por kineasti dhe producenti Skënder Jaçe thotë se bashkëpunimi me Arkivin e Filmit do të jetë dhe për shfaqjen e filmit të huaj këtë edicion. “Në këtë sezon të ri turistik pjesë të programit do të jetë dhe kopjo e restauruar e filmit “Ngadhënjim mbi vdekjen” me regji nga Gëzim Erebara dhe Piro Milkani, po ashtu do shfaqet edhe filmi “Kapedani” apo “Guna mbi tela” e filma të tjerë. Sigurisht do të ketë edhe filma të huaj. Për këtë edicion kemi bashkëpunim me Ambasadën Spanjolle në vendin tonë, si dhe filmi i huaj arkivor nga Arkivi Qëndror Shtetëror i Filmit”, tregon kineasti Jaçe.
Nisja këtë vit e “Open Cinema”
Aktiviteti “Open Cinema” ashtu si çdo vit edhe këtë edicion do të vijë me filma, të ftuar të ndryshëm që janë të fushës së kinematografisë dhe më gjerë. Por producenti Skënder Jaçe bën me dije se në këtë edicion do të ketë dhe homazh për aktoren e madhe Margarita Xhepa. “I pari qytet këtë vit me “Open Cinema” do të jetë Gramshi për të vijuar dhe në qytete të tjerë. Prioritet sivjet do ti jepet prezantimit të kineastëve të rinj, si dhe një homazh për Margarita Xhepën”, tregon Jaçe. Ky aktivitet me filma ka vite që po zhvillohet në vendin tonë, por dhe vështirësitë nuk kanë munguar. Kineasti Jaçe thotë se vështirësia më e madhe mbetet buxheti. “I vështirë është buxheti, jo vazhdimësia e aktivitetit, se vetë jeta është dinamikë e cila duhet të pasqyrohet”, thotë Jaçe. “Open Cinema” me filmat një vit më parë nisi nga bregdeti i Golemit. Një vit më parë filmat u shfaqën në Golem, Kukës, Kuçovë, Maliq, Devoll, Ersekë, Leskovik, Pukë, etj.