Dy nga aplikacionet më të njohura të takimeve për persona gej në Kinë janë zhdukur nga dyqanet e aplikacioneve në vend, duke rritur frikën për një goditje të mëtejshme ndaj komuniteteve LGBT.
Që nga e marta, Blued dhe Finka nuk ishin të disponueshëm në dyqanin e aplikacioneve të Apple dhe në disa platforma Android. Përdoruesit që i kishin shkarkuar tashmë aplikacionet, duket se ende mund t’i përdorin ato.
Të dy aplikacionet ishin ende të disponueshme për shkarkim nga faqet e tyre zyrtare të internetit. Aplikacionet nuk kanë publikuar deklarata publike, në lidhje me heqjet.
Në një deklaratë për Wired, Apple tha: “Ne ndjekim ligjet në vendet ku operojmë. Bazuar në një urdhër nga Administrata e Hapësirës Kibernetike të Kinës, ne i kemi hequr këto dy aplikacione vetëm nga dyqani i Kinës.”
Në përputhje me ligjet e vendit, Apple operon një dyqan të veçantë aplikacionesh në Kinë. Disa aplikacione të njohura si Facebook, Instagram dhe platforma të tjera perëndimore të mediave sociale nuk janë të disponueshme për përdoruesit kinezë. Aplikacionet ndërkombëtare të takimeve si Grindr dhe Tinder janë gjithashtu të bllokuara.
I themeluar në vitin 2012 në Kinë, Blued është aplikacioni më i popullarizuar i takimeve për meshkuj gej në vend. Ka më shumë se 40 milionë përdorues të regjistruar në të gjithë botën. Në vitet e fundit, është diversifikuar në shërbime të tjera si transmetimi i drejtpërdrejtë, por ende konsiderohet kryesisht një aplikacion për meshkuj gej.
Në vitin 2020, kompania mëmë e Blued bleu Finka-n.
Homoseksualiteti është i ligjshëm në Kinë. Por pas dekadash hapjeje dhe liberalizimi, shfaqjet e hapura të identitetit LGBT janë shtyrë më tej në fshehtësi. Organizatat e shoqërisë civile LGBT janë detyruar të mbyllen dhe Shangai Pride, eventi më i madh i krenarisë në vend, u pezullua në vitin 2020. Në shtator, një film horror u ndryshua digjitalisht për ta kthyer një çift gej, në një çift heteroseksual për t’u shfaqur në Kinë.
Një themelues i një organizate të komunitetit LGBT, i cili kërkoi të mbetej anonim për shkak të frikës për sigurinë e tij, tha se ishte “jashtëzakonisht i tronditur”, kur pa Blued dhe Finka të hequr nga dyqanet e aplikacioneve.
“Hapësira e jetesës për pakicat seksuale është zvogëluar gjatë viteve të fundit… por kur dëgjova këtë lajm tani, më zuri në befasi fakti që edhe hapësirat online po zvogëlohen”, tha ai.
“A nuk kontribuojnë aplikacione si Blued në stabilitetin dhe harmoninë sociale? Pse t’i heqim ato nga dyqanet e aplikacioneve? E kam të vështirë të kuptoj mënyrën e tyre të të menduarit”, shtoi ai.
Nuk është e qartë pse u hoqën aplikacionet ose nëse do të jetë një zhvendosje e përhershme. Por përdoruesit e internetit shprehën menjëherë shqetësimin e tyre.
Një përdorues i WeChat shkroi se Blued “i bëri shumë njerëz të kuptonin për herë të parë se nuk ishin vetëm; bëri që një grup njerëzish nga margjinat të shiheshin”.
Administrata e Hapësirës Kibernetike e Kinës nuk mund të kontaktohej për koment./ The Guardian.
