Tag: durrsakët

Adriatik BALLA
Java e 13-të e “Abissnet Superiore” nisi ditën e djeshme me dy takimet e para të saj, ku padyshim fitorja e Teutës në Shkodër përballë Vllaznisë kryesuese ishte surpriza më e madhe jo vetëm e kësaj jave por ndoshta e këtyre xhirove të para të garës, duke befasuar jo vetëm vendasit por edhe opinionistët që nuk i jepnin shanse suksesi. Gjithsesi, durrsakët fitojnë 1-0 dhe sigurojnë tri pikë që i ngjisin për momentin në top-4 të renditjes, kurse Vllaznia, me humbjen e djeshme në shtëpi, zbret nga kryesimi dhe pëson një tronditje që mund të ndikojë në ecurinë e saj në garë. Teuta tregohet kështu e pashpirt ndaj saj, për më tepër durrsakët fitojnë në Shkodër pas 8 vjetësh. Ndeshja tjetër, ajo mes Elbasanit dhe Partizanit, u mbyll në barazim 0-0, një barazim që u dha të dy ekipeve nga një pikë por për Elbasanin mjaftoi që të marrë i vetëm kryesimin e Superiores.
Zhgënjen Vllaznia, shpërthen Teuta
Siç e theksuam më lart, Teuta u kthye të fitojë përsëri pas 8 vitesh në Shkodër ndaj Vllaznisë dhe e ka bërë këtë në një moment të rëndësishëm pasi kthen durrsakët fuqimisht në garë për vendin në katërshe, ndërsa i heq kreun shkodranëve. Në një ndeshje të luftuar, me pak raste për shënim e shumë ndalesa, diferencën e kanë bërë një gol në fund i Beshirajt. Por ka pasur edhe raste për diskutim dhe polemika të vazhdueshme për çdo faull, teksa është anuluar një gol që në start për durrsakët, ndërsa në fund kryesori iu nxori edhe një lojtar me të kuq para se të zëvendësohej.
Partizani dhe Elbasani vijojnë me barazimet
Nëse vëmendja dje ishte në Shkodër, ku surprizoi Teuta, dje duhej të ishte Elbasani që të fitonte në shtëpi përballë Partizanit, por kjo nuk ndodhi. Kjo jo vetëm për dobësinë e vendasve, por edhe për meritë të miqve. Tregues domethënës është se të dy ekipet janë “abonuar” me barazimet javët e fundit. Skuadrat prodhuan shumë pak raste flagrante për gol dhe nuk arritën ta gjejnë asnjëra. Ky është barazimi i dytë radhazi për Elbasanin pas asaj me Dinamon në javën e shkuar njësoj si për Partizanin i cili javën e kaluar ndali Vllazninë. Por barazimi ka mjaftuar për Elbasanin që të marrë kryesimin e Superiore si vetëm, të paktën përkohësisht. Sot do të luhen tri ndeshjet e tjera të javës së 13-të, që pritet të japin befasi në lojë e rezultat, por padyshim kryendeshja është ajo mes Tiranës dhe Egnatias, ku rrogozhinasit duan fitoren për të kapur kryesimin, kurse Tirana ndoshta ka shansin më ideal të bëjë kthesë e të marrë një fitore që mund të rriste moralin e grupit dhe t’i ikte sa është e mundur fundit ku ndodhet aktualisht.
Ndërpritet ndeshja në Korçë, shkak tifozi i sëmurë
Dueli i Kategorisë së Parë mes Skënderbeut dhe Lushnjës është ndërprerë për disa minuta. Arsyeja ishte gjendja shëndetësore e një tifozi, i cili u ndje keq në shkallët e stadiumit. Ekipet mjekësore ndërhynë menjëherë për t’i dhënë atij ndihmën e parë dhe e transportuan me urgjencë për në spital.