Tag: doshi

Elmas Bogdani
Pas një periudhe të gjatë hetimesh intensive, lëvizjet e fundit të Prokurorisë së Posaçme (SPAK) po japin sinjale të qarta se institucioni është pranë të disa goditjeve të madha të pushtetarëve të korruptuar. Arrestimi më i bujshëm i muajve të fundit nga SPAK ka qenë ai i kryetarit të Bashkisë së Tiranës, Erion Veliaj, i cili u ndalua në zyrën e tij në shkurt, duke shkaktuar tronditje politike në vend. Pas këtij zhvillimi, Prokuroria e Posaçme është fokusuar kryesisht në hetimet për krimet zgjedhore, si dhe në dosjet që lidhen me krimin e organizuar.
Por  së fundmi, SPAK ka vijuar me një ritëm të lartë veprimesh hetimore, duke kryer kontroll në zyra dhe banesa të zyrtarëve, biznesmenëve dhe personave të lidhur me pushtetin politik. Janë sekuestruar telefona, kompjutera dhe dokumente që lidhen me disa dosje të rëndësishme që janë drejt finalizimit. Në dyert e SPAK kemi parë këto ditë emra të rëndësishëm. Disa prej tyre janë pyetur në cilësinë e personit nën hetim, ndërsa të tjerë janë përfshirë në veprime procedurale që sinjalizojnë afrimin e fazës së akuzave zyrtare.
Goditja ndaj Ballukut
Zhvillimet më të forta në SPAK për nga jehona dhe zhurma që kanë krijuar ende pa dalë me njoftim zyrtar Prokuroria e Posaçme kanë të bëjnë me ministren Belinda Balluku. Një biletë avioni drejt Rumanisë, takimi rutinë me homologun në Bukuresht dhe një mbledhje e lajmëruar më parë e shpëtuan Belinda Ballukut nga paraqitja në SPAK. Të paktën për këtë të hënë. Prokurori i çështjes, Dritan Prençi, ka vendosur të rinisë procedurën ligjore, duke i dërguar një tjetër fletë-thirrje zyrtare. Asaj i kërkohet të paraqitet më 31 tetor  në orën 15 dhe të jetë e shoqëruar nga përfaqësuesi i saj ligjor. Prokuroria e posaçme ka paralajmëruar se, në rast të mungesës së pajustifikuar, ata do t’i shkojnë kudo që të jetë ministrja.
Nëse Balluku do të refuzojë që të paraqitet në SPAK, ligji e përcakton se duhet të thirret me forcë, përmes futjes në lojë të policisë. Balluku është nën hetim për akuzën e “Shkeljes së barazisë në tenderat publikë”, ndërsa në ditët në vijim pritet t’i komunikohet formalisht kjo akuzë. Ky zhvillim vjen në kuadër të hetimeve të nisura nga SPAK mbi procedurat e tenderimeve në institucionet që ajo ka drejtuar, pas arrestimit të disa ish-vartësve të saj në Ministri dhe në Entin Kombëtar të Rrugëve. Si pjesë e këtij hetimi, SPAK ka ushtruar kontrolle në banesat e disa zyrtarëve të afërt me Ballukun, përfshirë Sekretaren e Përgjithshme të Ministrisë, Viola Haxhiademi, dhe Drejtoreshën e Financave, Evis Mamaj.
Gjatë këtyre kontrolleve, janë sekuestruar telefonat personalë të të dyja zyrtareve, të cilat konsiderohen personat më të afërt dhe më të besuar të Ballukut në strukturën e ministrisë. Gjithashtu gazetarja Klodiana Lala zbuloi se të hënën është kontrolluar dhe telefoni i bashkëshortit të vartëses së Ballukut, edhe pse ai nuk ka lidhje direkt me ministren e Energjisë. Ajo shtoi se ndryshe nga e shkuara, është rasti i parë që nuk është përfshirë policia e shtetit, për të shmangur rrjedhjen e informacioneve.
Kush janë emrat e tjerë?
Gjithashtu këto ditë në SPAK ka ndodhur edhe një zhvillim interesant. Salarjon Totaj, bashkëshorti i ministres së Jashtme Elisa Spiropali, ka hyrë në godinën e institucionit të drejtësisë speciale. Arsyet e paraqitjes së tij në SPAK mbeten ende të paqarta. Deri më tani, nuk ka një komunikatë zyrtare nga prokuroria për natyrën e thirrjes apo ndonjë procedim konkret ku mund të jetë përfshirë. Totaj, bashkëshorti i ish-kryetares së Kuvendit dhe aktualisht ministres së Jashtme, është një figurë që rrallë shfaqet publikisht, çka e bën edhe më domethënëse praninë e tij në institucionin e hetimeve të posaçme. Disa ditë më parë u paraqit në SPAK edhe  Kreu i Partisë Socialdemokrate Tom Doshi. Pas rreth 50 minutash në ambientet e SPAK, ai tha se ishte thirrur për një çështje që nuk ka lidhje me të, ndërsa nuk kurseu as ironitë. “U pyeta për një çështje që nuk kishte lidhje me mua, ashtu siç ka thënë Erjoni (Veliaj): kolegët të thërrasin edhe për çështje që nuk kanë lidhje me ty”, tha Doshi. Kjo është hera e dytë që Doshi paraqitet në SPAK.
Herën e parë ishte më 24 shkurt të këtij viti, ku u pyet për rreth 90 minuta. Atëherë Doshi tha se u pyet për zgjedhjet në Rrogozhinë në 2023, duke shpjeguar se një nga personat që ka takuar gjatë një takimi elektoral ka qenë në përgjim nga SPAK. I pyetur nga gazetarët nëse bëhet fjalë për çështjen e kryetarit Bashkisë së Rrogozhinës, Edison Memolla, Tom Doshi e pohoi. Në SPAK këto ditë shkoi dhe deputeti i PD-së, Bledion Nallbati. Në fjalën e tij para gazetarëve pasi doli nga Prokuroria e Posaçme, Nallbati u shpreh se u thirr si person në dijeni. “U thirra për konfliktin e stisur në fushatë nga Niko dhe çerrat e tij për të cënuar imazhin tim dhe procesin zgjedhor. U thirra si person në dijeni”, u shpreh ai. Gjithashtu së fundmi Prokuroria e Posaçme dhe Byroja Kombëtare e Hetimit kontrolluan  bizneset e Artan Dulakut. Ky kontroll u ushtrua dhe në banesën e Dulakut dhe bizneseve të një shtetasi me iniciale G.K.
Po ashtu bëhet me dije se SPAK ka sekuestruar telefonin e biznesmenit Dulaku. Janë ushtruar kontrolle dhe ndaj  zyrtarëve të tjerë të përfshirë në këtë hetim. Ky operacion i SPAK po udhëhiqet nga prokurorja Manjola Kajana.  Mësohet se këto kontrolle lidhjen me një hetim që SPAK ka nisur për privatizimin e “Portit të Limionit” në Sarandë, me qëllim zhvillimi për biznes. Kujtojmë gjithashtu se këto ditë Prokuroria e Posaçme përfundoi hetimet dhe dërgoi për gjykim kryetarin e Bashkisë së Vaut të Dejës, Kristian Shkreli, i akuzuar për veprën penale të “korrupsionit aktiv në zgjedhje”, parashikuar nga neni 328 i Kodit Penal. 20 ditë pas komunikimit të akuzës, SPAK mbylli hetimet dhe bëri kërkesë në Gjykatën e Posaçme Kundër Korrupsionit dhe Krimit të Organizuar (GJKKO) për kalimin e dosjes në proces gjyqësor. Situata brenda SPAK është e nxehtë dhe këtë fakt e konfirmoi Altin Dumani dy ditë më parë në mes të Kuvendit ku tha se ndaj Prokurorisë së Posaçme po ushtrohen presione të forta. “Ndaj SPAK vijon një presion i jashtëm nga aktorë politikë, mediatik dhe të krimit të organizuar që rrezikon integritetin institucional dhe të prokurorëve. Ky shqetësim kërkon reagim të koordinuar institucional për mbrojtjen e pavarësisë kushtetuese të SPAK”, theksoi Dumani. Sinjalet janë se do të kemi goditje të mëdha në vijim.