Disa persona janë arrestuar mëngjesin e 30 qershorit, teksa policia serbe hoqi të gjitha bllokadat e vendosura në rrugët në Beograd, njoftoi Ministria për Punë të Brendshme e Serbisë.
Policia po ashtu tha se po heq barrikadat e vendosura në qytet tjera, të cilat u vendosën nga protestuesit në dhjetëra lokacione një natë më parë si formë e “mosbindjes civile”, pas protestës së madhe studentore në Beograd.
Në këtë protestë, ku u arrestuan dhjetëra persona, vlerësohet se morën pjesë 140.000 protestues.
Në njoftimin e policisë serbe nuk u specifikua numri i personave të arrestuar pas heqjes së bllokadave.
Studentët që po bllokojnë fakultetet në Beograd kanë publikuar video të arrestimeve në rrjetet sociale, duke thënë se “të arrestuarit u rrahën dhe u privuan nga liria”.
Pamje të arrestimeve, ku shihet përdorimi i forcës nga policia, u publikuan nga bllokadat në afërsi të Fakultetit Juridik në qendër të Beogradit, por edhe në lokacione të tjera në kryeqytetin serb.
Ministria e Brendshme serbe, ndërkaq vlerësoi se policia veproi “në mënyrë shumë profesionale”.
Ajo pretendoi se policia arrestoi protestuesit për shkak të sulmeve dhe fyerjeve ndaj policëve dhe për prishje të rendit publik.
Trafiku në Beograd, sipas policisë, është kthyer në “normalitet”.
Vendosja e barrikadave në dhjetëra lokacione në mbarë Serbinë nisi pasditen e 29 qershorit.
Protestat po organizohen nga qytetarët, me ftesën e studentëve, të cilët që shtatë muaj po bllokojnë dhjetëra fakultete në mbarë Serbinë.
Protestuesit kanë paraqitur tri kërkesa për Qeverinë serbe. Ata po kërkojnë shpalljen e zgjedhjeve të parakohshme, lirimin e të gjithë të arrestuarve pas protestës së 28 qershorit, si dhe po kërkojnë heqjen e kampit të ngritur në qendër të Beogradit, ku për disa muaj po qëndrojnë kundërshtarët e studentëve protestues.
Studentët protestues kanë bërë thirrje për protesta të reja në kuadër të “mosbindjes civile”, por po ashtu u kanë bërë thirrje qytetarëve që të largohen nga barrikadat “me qetësi dhe pa panik” në rast se policia shkon me pajisje për të shpërndarë protestën. Më pas, sipas tyre, protestuesit mund të rigrupohen.
Në një ueb-faqe të krijuar më herët nga studentët u publikuan rreth 50 lokacione ku ishin vendosur bllokadat një natë më parë – përfshirë në rrugët dhe urat në Beograd.
Në listë ishin përfshirë edhe 20 qytete të tjera në mbarë Serbinë ku u ngritën barrikada – nga Subotica, në Novi Sadi, Zranjanini, Çaçaku, Uzhice, Kragujevci dhe Nishi.
Protestuesit vendosën kosha të mbeturinave, goma, barrikada metalike në rrugë apo parkuan veturat e tyre.
Në tetë muajt e fundit, mijëra serbë, shpesh të udhëhequr nga grupe studentore, të cilëve gjithnjë e më shumë po u bashkohen qytetarë të tjerë, kanë protestuar kundër presidentit serb, Aleksandar Vuçiq, dhe Qeverisë së tij.
Protestat u nxitën pasi 16 persona vdiqën kur u shemb një strehë betoni në Stacionin Hekurudhor në Novi Sad më 1 nëntor 2024.
Protestuesit thanë se tragjedia u shkaktua nga korrupsioni dhe paaftësia e autoriteteve dhe protestat shpejt u shpërndan shpejt, duke reflektuar një zemërim më të gjerë ndaj Vuçiqit, mandati pesëvjeçar i të cilit pritet të përfundojë më 2027.
Vuçiq është president i Serbisë që nga viti 2017 dhe paraprakisht për tre vjet kishte qenë kryeministër.
Zgjedhjet parlamentare në Serbi pritet të mbahen në fund të vitit të ardhshëm.
Vuçiq dhe Qeveria e tij kanë mohuar akuzat për korrupsion dhe kanë deklaruar se janë duke hetuar tragjedinë në Novi Sad, ku dhjetëra zyrtarë janë arrestuar në kuadër të hetimeve për këtë ngjarje.
Gjatë fundjavës, grupe më të vogla të mbështetësve të Qeverisë po ashtu kanë protestuar në Beograd.
Vuçiq, i cili po përpiqet të balancojë lidhjet me aleaten tradicionale Rusinë dhe Perëndimin – duke synuar që shteti i tij të bëhet anëtar i Bashkimit Evropian – ka akuzuar “fuqitë e huaja” – duke mos treguar se për kë e ka fjalën – si nxitëse të protestave të fundit.
“Shteti do të mbrohet dhe banditët do të përballen me drejtësinë”, u tha ai gazetarëve pas natës së parë të protestave./rel
