Deputeti i Partisë Demokratike, Eno Bozdo, i ftuar në emisionin ‘Ora 19’ në SYRI TV me moderatoren Armela Ferko, ka akuzuar qeverinë e Edi Ramës se projektligji për ‘paqen fiskale’ është një skemë e rrezikshme që krijon terren për pastrim parash dhe jo një mekanizëm real për ndihmën e biznesit.
Bozdo theksoi se paketa fiskale përfshin dy ligje, faljen e detyrimeve dhe amnistinë fiskale, duke krijuar, sipas tij, një mozaik masash që e bëjnë procesin të paqartë, të rrezikshëm dhe potencialisht abuziv.
‘PD ka kërkuar që të gjithë ata që ndryshojnë bilancet, gjendjen e cash-it, asetet, borxhet apo kapitalet, deri në tre vitet e fundit, të kalojnë për verifikim të detyrueshëm nga organet e inteligjencës financiare. Kjo do të frenonte çdo tentativë për pastrim parash,’ u shpreh Bozdo.
Ai shtoi se Partia Demokratike propozoi përjashtimin e sektorit të ndërtimit nga falja e detyrimeve, duke e cilësuar atë sektorin më të rrezikshëm për pastrim parash sipas Agjencisë së Inteligjencës Financiare.
‘Tani, kuptoni që kemi të bëjmë jo me një ligj, por me dy ligje, pra është dhe falja e shuarjes së detyrimeve dhe paqja fiskale. Pyetja juaj specifikisht për pastrimin e parave, por unë do të thoja, janë një sërë masash, pra është një mozaik masash të cilat ndoshta mund ta sillnin në formë të votueshme le të themi, ndoshta mund ta sillnin në formë të votueshme.
E para është propozimi i Partisë Demokratike që për të gjithë ata që ndryshojnë bilancet, pra atje ku është autostrada sot, gjendjen e keshit, asetet, borxhet, kapitalet e veta, në mënyrë retroaktive, pra deri në tre vite, të gjitha këto të jenë subjekt rast pas rasti i ëh çuarjes së emrit të personave në organet e inteligjencës për pastrimin e parave.
Kjo sigurisht, ky detyrim për ta çuar atje dhe detyrimi i organeve për ta shqyrtuar rastet emër për emër, do të ishte një fren jo pak e konsiderueshme për të gjithë ata që duan t’i hyjnë një një rruge të tillë.
E dyta, është propozimi i Partisë Demokratike që sektori i ndërtimit, që konsiderohet nga Agjencia e Inteligjencës Financiare si sektori me riskun më të lartë dhe ku praktikisht sot ëh është lavatriçja më e madhe. Për hir të vërtetës, ky sektor në të gjithë botën, po këtu është në një nivel të tillë që është e jashtëzakonshme. Pra, në qoftë se euro ka vajtur në këtë nivel ka vajtur, kjo është rezultat i pastrimit të parave në sektorin e ndërtimit.
Propozimi i Partisë Demokratike që ky sektor të përjashtohet fare nga falja e detyrimeve dhe kjo nuk u mor parasysh. Propozimi tjetër për rritje të transparencës edhe besueshmërisë. Çfarë thamë ne? Falja i shërben 80.000 bizneseve aktiv. Ne nuk kërkuam 80.000 emra, sepse ndoshta do të ishte e tepërt, por unë kam kërkuar 3.000 emrat më të mëdhenj që kanë përfituar nga falja, ose të gjithë ata të cilët u janë falur një shumë prej 5 milionë lekësh, ndryshe 50.000 euro e sipër.
Pse? Duam të kuptojmë kujt ia kemi falur. Duhet të kuptojmë, me kë janë të lidhura këto kompani. Dhe këtë ia detyrojmë vetes si ligjvënës, por dhe komunitetit të ndershëm të biznesit, edhe ata duhet të dinë se çfarë bëjmë ne. Dhe në qoftë se vërtet këtu ka një problem, atëherë ata duhet të jenë në gjendje ta identifikojnë nga ka ardhur problemi. Dhe komunikata e Bashkimit Europian thotë pikërisht këtë, besimin e tatimpaguesve, sepse me këtë model që i sillet përpara biznesit shqiptar, i thuhet, kush është ai që ndoshta thotë e di si është puna, unë po rri ca vite pa pa paguar TVSH-në, detyrimet doganore, tatimore se ndoshta vjen amnistia e radhës.
Ne kërkuam dhe diçka tjetër. Ne thamë, në qoftë se një individ apo grup individësh kanë pronësi dy apo tre kompani, nga e cila një kompani ka borxhe, po kompania e dytë, qoftë edhe e tretë, performon mirë, është në rregull, i ka bilancet pozitive, ose merr para nga buxheti i shtetit, këta individë duhet të përjashtohen nga nga fshirja e detyrimeve. Ti nuk mund dhe ta vjedhësh shtetin edhe të marrësh nga shteti. Edhe shteti do t’i falë’, tha ndër të tjera deputeti Eno Bozdo në SYRI TV.
