TIRANË- Një stuhi e fortë ere, shoqëruar me reshje të dendura shiu përfshiu mesditën e djeshme vendin tonë, duke shkaktuar probleme dhe dëme të mëdha në disa qytete. Përmbytje rrugësh, pemë të thyera, bllokim i lundrimit në det në të gjitha portet dhe anulim fluturimesh, ky është bilanci paraprak i shkaktuar nga stuhia ‘e çmendur’.
Era e fortë preku Tiranën, duke marrë çdo gjë para, ndërsa në disa zona të kryeqytetit u shkaktua kaos në trafik për shkak të përmbytjeve të rrugëve por edhe nga rrëzimi i pemëve. U dëmtuan disa automjete të parkuara në rrugë. Ndërkohë objekte në ambientet e jashtme si çadra, karrige dhe të tjera janë rrëzuar. Gjithashtu u regjistruan edhe raste plagosjeje, ku mbi 20 qytetarë pësuan lëndime nga xhamat e thyer apo objekte të rëna. 10 prej tyre po marrin trajtimin mjeksor të veçantë.
Moti i keq shakktoi probleme dhe në qytetin bregdetar të Durrësit, ku ka pasur dëmtimë të linjës së energjisë elektrike, përmbytje dhe trafik. Rrugët e qytetit u përmbytën duke vështirësuar ndjeshëm qarkullimin e automjeteve dhe këmbësorëve. Probleme u regjistruan edhe në port, ku era e fortë shkaktoi shkëputjen nga litarët lidhës me kalatën të tragetit të linjës Durrës–Bari, duke e spostuar atë. U pezullua gjithashtu lundrimi i anijeve të vogla dhe i mjeteve të peshkimit, deri në përmirësimin e situatës.
Edhe qyteti bregdetar i Vlorës u ‘pushtua’ nga stuhia e fortë. Rrugët e qytetit u përmbytën brenda pak minutash nga reshjet e dendura, duke krijuar trafik të rënduar në akset hyrëse dhe dalëse. Uji ka shpërthyer nga rrugët dhe ka depërtuar brenda shtëpive, duke krijuar një situatë të vështirë për banorët. Situata ka qenë kritike në fshatin Xhyherinë të Vlorës, ku shirat çanë kanalin dhe rrezikojnë dy banesa dhe një pulari.
Reshjet e rrëmbyeshme në mesditë përmbytën edhe rrugët kryesore të Lezhës. Përmbytjet prekën disa zona kryesore, mes tyre bulevardin “Gjergj Fishta” dhe bllokun e banimit “11 Janari” në lagjen Besëlidhja. Situata e rënduar nga moti i keq ka sjellë edhe ndërprerje të furnizimit me energji elektrike në Shëngjin. Trafiku drejt Shëngjinit u paralizua, pasi shumë pushues u larguan drejt shtëpive të tyre.
Edhe Lushnja nuk i shpëtoi pasojave të stuhisë. Rrugët u përmbytën në qendër të qytetit dhe në zonën e gjimnazit “18 Tetori”. Edhe qyteti i Beratit është goditur nga një stuhi e fortë ere dhe reshje shiu. Era e fortë ka ngritur pluhurin ë qytetit në ajër ndërsa mjegulla ka mbuluar vendin.
Reshje të dendura dhe era e fortë, përfshinë qytetin e Fierit. Era e fortë shkaktoi rënie pemësh në aksin Fier–Cakran dhe ndërprerje të energjisë elektrike në disa zona të Patosit, Divjakës, Levanit dhe Cakranit. Ndërkohë në qytetin bregdetar të Sarandës u ndalua dalja në det e mjeteve turistike dhe peshkarexhave për shkak të erërave të forta. Në plazhe janë ngritur flamujt e kuq si paralajmërim për pushuesit qe te mos futen ne det.
Ndryshimi i motit solli disa problematika edhe në aeroportin e Rinasit, ku u regjistruan vonesa dhe anullime fluturimesh. Aeroporti Ndërkombëtar i Tiranës bëri me dije se pezulloi për 30 minuta operacionet në pistë, ndësa situata aktualisht vijon normalisht. Pati vonesa me 14 fluturime në mbërritje dhe 7 në nisje. Ndërsa 4 fluturime të tjera u anuluan: Tiranë-Torino, Verona-Tiranë, Pescara-Tiranë, Hamburg-Tiranë.
Pas stuhisë tropikale të pazakontë, pritet një përmisim i kushteve të motit. Sipas sinoptikantëve, priten reshje shiu por me intensitet të ulët në pjesën më të madhe të vendit. Moti parashikohet me alternime vranësirash mesatare deri të dendura e kthjellimesh kryesisht pas orëve të mesditës./ZËRI
