Adriatik BALLA
Armando Broja duket se ishte me fat këtë herën e fundit kur u dëmtua, pasi, edhe pse në pamje të parë u duk se pati një dëmtim të rëndë, ai nuk ka një shkallë dëmtimi të tillë që shfaq rrezik dhe brenda pak ditëve do të jetë në fushë për të luajtur. Ka qenë një ndrydhje e lehtë e kyçit, por është diçka kalimtare dhe këtë e konfirmoi vetë trajneri i Bërnlit në Angli, Skot Parker. Nga ana tjetër, duhet thënë se rikuperimi në kohë i Brojës mund të ndihmojë Silvinjon në planet e tij afatgjata për muajin mars, ku kemi në short Poloninë dhe nëse e kalojmë atë më 26 mars, në ndeshjen e dytë, atë të 31marsit do të ndeshemi me fituesin e çiftit Ukrainë-Suedi. Broja është i fuqishëm në sulm, ka teknikë të lartë dhe fuqi fizike si dhe vjen nga një shkollë futbolli e zhvilluar që di të dallojë pozicionin e tij taktik në fushë. Ndaj rikuperimi i tij është me rëndësi për Bërnlin, skuadrën e tij angleze, por edhe për përfaqësuesen kuqezi. Lojtari ka marrë mbështetje nga klubi i tij në këtë periudhë, por edhe nga anëtarët e FSHF-së dhe të Kombëtares kuqezi.
Situata në Angli me Brojën
Armando Broja ia ka hedhur paq këtë radhë pas dëmtimit që pësoi në ndeshjen kundër Anglisë, ku ai ndrydhi kaviljen dhe doli nga fusha në lot me barelë. Sulmuesi i Kombëtares shqiptare, jo vetëm që ka rikuperuar nga dëmtimi i tij, por siç zbuloi trajneri i Bërnlit, Skot Parker, mund të jetë gati të luajë ndeshjen e fundjavës kundër Çelsit në kampionat. Broja qëndroi pak minuta në fushë dhe pas një rrëzimi ndrydhi kaviljen e tij, duke alarmuar këdo, pasi mendohej se mund të kishte pësuar një tjetër dëmtim të rëndë, siç ka ndodhur shpesh për fat të keq në vitet e fundit. Por trajneri Parker ka zbuluar se lojtari është stërvitur rregullisht këto ditë. “Ai është në rregull. Nuk është aq keq sa padyshim dukej apo siç ishte kur e pashë unë dhe duket mirë të them të drejtën. Unë shpresoj që Armando të jetë i gatshëm për fundjavën, ndaj gjithçka duket pozitive. Ai u stërvit në fushë të mërkurën dhe sot. Të shohim si do të reagojë nesër por për momentin që flasim, gjërat duken mirë”, tha Parker para mediave.
Shkalla e dëmtimit
Më tej ai dha detaje për shkallën e dëmtimit dhe vendin në këmbë ku sulmuesi kishte pësuar dëmtim. Natyrisht, me një frikë jo të vogël nga lojtari vetë e nga stafi, por Parker ishte i sinqertë në rrëfimin e tij. “Ishte kyçi i këmbës, mendoj se ndoshta për shkak të mekanizmit të dëmtimit, kishte një element tronditje për të dhe padyshim edhe pak frikë pasi u duke se ai ndrydhi kyçin dhe e ndjeu që ishte te i njëjti ku kishte pësuar një dëmtim të rëndë gjithashtu. Jam i sigurt se kishte një element të tipit “ok, kam pësuar diçka shumë serioze tani”. Por teksa kishte dhimbje në fillim, tani duket se situata është qetësuar shumë, shumë shpejt. Ka dëmtim, por është shumë, shumë, shumë minimal ndaj duket sikur ia hodhëm paq”, ishte pohimi i sinqertë i Parker, i cili ashtu si të tjerët te Bërnli kishin menduar se Brojën do të vazhdonte ta ndiqte mungesa e fatit me dëmtimet.
