Ben Blushi është rikthyer sërish në qendër të debatit publik me librin e tij të ri “Jam Mysliman”. Autori që prej vitesh përdor provokimin si mjet publiciteti, ka zgjedhur të prekë këtë herë temën më të ndjeshme të shoqërisë shqiptare, fenë për të rikthyer emrin e vet në qendër të vëmendjes. Pas publikimit të librit, rrjetet sociale janë mbushur me reagime të forta, nga përgëzime e kureshtje, deri te kritika dhe mallkime. Por Blushi vetë e ushqen këtë valë reagimesh, duke publikuar me kujdes çdo mesazh që ndez më shumë diskutim. Qëllimi është i qartë.
Sa më shumë polemikë, aq më shumë shitje. Për të, feja nuk është reflektim shpirtëror, por një temë që prodhon debat, vëmendje dhe përfitim tregtar. Në këtë logjikë, Blushi ka zgjedhur të bëjë publik një mesazh ku një person e fton në debat për Islamin, me kushte të pazakonta që përfshijnë edhe mësimin përmendësh të 33 ajeteve të Kuranit. “Kam marrë një ftesë të çuditshme për debat. Nga mijëra mesazhe, urime, ledhatime, dëshpërime dhe mallkime që kam marrë në Facebook për romanin Jam Mysliman më i çuditshmi dhe më i paprituri ishte njëri që më ftonte në një debat publik për Kuranin dhe Islamin duke vendosur 10 kushte. 9 kushte edhe mund ti përmbush por njëri ishte pak i vështirë dhe më ka vënë në mendime. Ky person që nuk e njoh por duket shumë kompetent dhe i vendosur më kërkon të mësoj përmendesh 33 ajete të Kuranit. Ndryshe ai nuk del në debat me mua. Unë nuk e di a e kam këtë aftësi. A jam unë kaq i aftë? Nuk jam i bindur.
Edhe në shkollë nuk mësoja dot asgjë përmendesh dhe nuk di të recitoj. Për më tepër e di që do humb. Megjithatë më poshtë po postoj kërkesat e tij për debat publik. Ndoshta ai mi lehtëson pak kushtet”, shkruan Blushi duke postuar dhe ftesën, ku Dario Haruni i shkruan: “Ben Blushi të ftoj në debat publik. Kushtet që kam janë:
1. Të qëndrojmë brenda temës specifike të debatit pa kaluar në degëzime të papërshtatshme.
2. Të përdorim argumente të mbështetura me referenca.
3. Të moderohet nga një palë e tretë e drejtë dhe asnjëanëse, që të sigurohet për barazi në kohën e marrë për përgjigjet.
4. Të zhvillohet pasi unë të kem lexuar librin tënd, të cilin nuk dua ta blej, por e dua dhuratë nga ti, kurse ti të kesh lexuar të paktën 33 ajete/vargje rresht nga Kurani, me përkthim dhe interpretim akademik (sugjerime: The Study Qur’an nga Seyyed Hossein Nasr që është përkthim + përpilim komentimesh klasike të shkollave të ndryshme islame, ose Kurani i Oksfordit nga M.A.S. Abdal Haleem, i cili është vetëm përkthim). Këto t’i dërgoj në pdf nqs nuk i ke.
5. Salla të ketë mjaftueshëm përfaqësues nga të gjitha kategoritë; idealisht 25% jobesimtarë (ateistë, agnostikë, apateistë), 25% monoteistë afetarë (ata që besojnë vetëm Një Zot por nuk praktikojnë asnjë fe), 25% muslimanë (sunitë, shiitë, reformistë) dhe 25% të krishterë (katolikë, ortodoksë, ungjillorë).
6. Pjesëmarrja me biletë me çmim modest. Nevojtarët, pensionistët, personat me aftësi të kufizuara – falas.
7. Verdikti i fitores së debatit të arrihet përmes votimit nga salla.
8. Hiq shpenzimet organizative, nëse mbeten para nga biletat, të dhurohen për bamirësi në një institucion të besueshëm (ndoshta shkollë, kopsht, qendër kursesh etj).
9. Të mos lejohen fyerjet dhe shpërthimet emocionale nga debatuesit apo nga pjesëmarrësit.
10. Të këndohet himni kombëtar para se të nisë debati. Temën mund ta diskutojmë, por ja disa që më vijnë në mendje: a) Kurani si model udhërrëfyes i Drejtësisë Shoqërore vs. [Alternativa jote mbi Drejtësinë Shoqërore] b) Religjioni: i nevojshëm apo i panevojshëm për reformimin social-kulturor të Shqipërisë. c) Islami: i përputhshëm apo i papërputhshëm me Vlerat Europiane”, thuhet në reagim.
