Tag: çudira

Rigels Seliman
Njeriu që dikur e kallëzoi Ilir Metën në Prokurorinë e Posaçme (SPAK), juristi i njohur, Romeo Kara, ka shuar çdo shpresë të ish-presidentit për t’u liruar nga burgu. Kara, i cili e akuzoi Metën për aferën e bujshme “CEZ–DIA”, ka reaguar ashpër ndaj deklaratave të avokatit mbrojtës që paralajmëroi “çudira” dhe daljen e Metës nga qelia brenda këtij muaji. Sipas Karës, këto janë vetëm manovra për të rikthyer vëmendjen publike dhe për të ushqyer mitin e viktimës politike. “Drejtësia nuk funksionon me libra dhe deklarata, por me fakte dhe prova”, u shpreh ai me tone të forta gjatë një reagimi për gazetën “SOT”. Juristi theksoi se askush nuk do të dorëzohet përballë një “libri të nakatosur nga Meta”, duke ironizuar synimin e ish-presidentit për të botuar një rrëfim personal. Ai shtoi se “libri i fjalëve nuk mund të zhbëjë librin e veprave”, duke e cilësuar veprimet e Metës si pjesë të “librit të turpit”. Kara e mbylli me një ironi therëse, duke sugjeruar edhe titullin për librin e Metës: “Pordhësihanet e Baba Likes” apo “Aventurat e të Fortit të Pazarit të Ri”. Me këtë deklaratë, juristi që i hapi dosjen e parë në SPAK ish-presidentit, i ka dhënë fund çdo iluzioni për një rikthim të shpejtë të Ilir Metës në liri.
Ja reagimi i plotë i z. Romeo Kara për gazetën “SOT”
“Avokatët e kanë për detyrë të flasin për klientin e tyre, ndonjëherë edhe më shumë sesa duhet, sidomos për t’i dhënë oksigjen politik e mediatik një figure që po mbytet nga provat si dhe të intimidojnë opinionin dhe aktorët në proçes. Deklaratat e avokatëve janë pjesë e strategjisë mbrojtëse dhe shpesh kanë më shumë funksion publik sesa juridik.  Është e kuptueshme që Meta të kërkojë të krijojë perceptimin e një drejtësie të politizuar apo të një lirimi të tij të afërt, por drejtësia nuk funksionon me deklarata, por me fakte dhe prova. Deklaratat për ‘dalje nga burgu’ e libra që do të tronditin botën, janë pjesë e të njëjtës lojë, për të krijuar përshtypjen se, kemi të bëjmë me një viktimë të sistemit dhe jo me një njeri që po përballet me drejtësinë. Nëse ndaj tij ekzistojnë akuza të bazuara dhe prova të forta, asnjë libër dhe asnjë paralajmërim për çudira nuk do të ndryshojë rrjedhën e procesit. Nga ana tjetër, nëse akuzat janë të dobëta, atëherë rruga ligjore do ta çojë në lirimin e tij, por jo sepse e ka paralajmëruar vetë. Sa për librin që thuhet se po shkruan, më shumë sesa dokument historik apo politik, do ta quaja një përpjekje për të rishkruar realitetin dhe për të ushqyer mitin e viktimës. Drejtësia duhet të flasë me akte, jo me letra e deklarata.  Deri atëherë, çdo paralajmërim për çudira mbetet vetëm një frazë për titujt e mediave. Unë nuk besoj se jo vetëm drejtësia shqiptare, por askush nuk do të dorëzohet përballë një libri të nakatosur nga Meta. Libri i fjalëve që pritet të dalë prej tij, nuk mund ta zhbëjë librin e veprave të tij, librin e turpit të tij. Ligji nuk ka nevojë për letërsi, por për të vërtetën. Ligji ka nevojë për prova.  Dhe nëse Meta ka vendosur të shkruajë libër, le ta shkruajë dhe ndoshta për herë të parë do të na tregojë të vërtetën e asaj që ka ndodhur në këto 30 vite me pushtetin, paratë dhe shërbimet e tij. Por të mos e shesë si revolucion të ndërgjegjes dhe armë presioni, sepse askush nuk ka më as frikë e as emocion nga ai dhe për më tepër të  besojë në përralla me heronj të rremë. Sidoqoftë unë mund t’i sugjeroj titullin e librit. Librin mund ta titullojë: “Pordhsihanet e Baba Likes”, apo “Aventurat e të Fortit të Pazarit të Ri””, shprehet juristi i njohur, Romoe Kara për gazetën “SOT”.
Avokati: Ilir Meta del në tetor. Po shkruan libër, do shihni çudira
Ndërkohë kujtojmë se disa ditë më parë, Kujtim Cakrani, avokati i Ilir Metës, në një media deklaroi se ish-Presidenti do të dalë këtë muaj. “Zoti Meta do të dalë këtë muaj, së shpejti do ta keni në studio. Mund ta pyesni nga afër për të gjitha gjërat. Ai ka shumë gjëra për të thënë. Do të rrëfehet për shumë gjëra. Do të merreni gjatë me zotin Meta. Ai po shkruan edhe një libër dhe do të shikoni çudira”, deklaroi Cakrani.