Koreja e Veriut ka filluar çmontimin e altoparlantëve të saj të propagandës përgjatë kufirit me Korenë e Jugut, në një lëvizje që shihet si një sinjal pozitiv ndaj thirrjeve të presidentit të ri jugkorean, Lee Jae Myung, për përmirësimin e marrëdhënieve ndërkoreane.
Sipas një deklarate nga ushtria e Koresë së Jugut, trupa të Veriut janë parë duke hequr pajisje në disa pika kufitare që nga mëngjesi i së shtunës. Megjithatë, mbetet për t’u konfirmuar nëse çmontimi ka ndodhur në të gjitha zonat përgjatë vijës ndarëse.
Ky zhvillim vjen pasi Koreja e Jugut ndaloi transmetimet e veta të propagandës dhe filloi të çmontojë altoparlantët në fillim të javës, menjëherë pas marrjes së detyrës nga presidenti i ri, Lee, në qershor. Gjatë fushatës, ai ishte zotuar për një qasje më të moderuar ndaj Veriut, në kontrast me paraardhësin e tij, Yoon Suk Yeol, i cili ishte më konfrontues.
Altoparlantët e të dy vendeve kishin rifilluar funksionimin në qershor 2024, pas një pauze gjashtëvjeçare, si përgjigje ndaj fushatës së Veriut për të dërguar balona me mbeturina drejt Jugut – një lëvizje që përshkallëzoi tensionet në zonën e demilitarizuar (DMZ).
Transmetimet e Jugut shpesh përfshinin këngë K-pop dhe lajme ndërkombëtare, ndërsa ato të Veriut përfshinin tinguj shqetësues si ulërima kafshësh. Banorët pranë kufirit ishin ankuar se jeta e tyre ishte ndërprerë nga zhurma e pandërprerë, e cila shpesh dëgjohej deri në 24 km larg gjatë natës.
Top Channel
