Tag: botëror

Adriatik BALLA
Trajneri i Kombëtares shqiptare, Silvinjo, u shpreh i lumtur për tri pikët ndaj Letonisë. Ndër të tjera braziliani theksoi se do të punojnë fort për ndeshjen e tetorit kundër Serbisë. “Do të punohet patjetër dhe për ta fituar ndeshjen e radhës, por është një ekip i vështirë. Është një lexim i saktë i lojës nga ana jonë, kjo është puna, t’i dërgojmë lojtarët në 30 metrat e fundit, por më pas varet edhe nga cilësitë individuale të lojtarit. Në futbollin e sotëm modern përgjithësisht mbrohen mirë dhe është bërë akoma më e vështirë për të shënuar, mendoj që kemi bërë një ndeshje të mirë, mendoj se kishim disa situata ku mund ta mbyllnim ndeshjen më shpejt, por kishim një kundërshtar relativisht të vështirë. I patëm parë ata dhe në ndeshjen kundër Serbisë ku një episod mund të kishte ndryshuar lojën, janë një skuadër e mirë, fizikisht e fortë dhe të krijon një situatë të vështirë sepse luftojnë deri në fund për rezultatin. Kemi bërë një hap të rëndësishëm përpara sepse është ndeshja e parë që ne e fitojmë, e thash dhe dy ditë më parë që kjo është ndeshje kyçe për rrugëtimin në Botëror, e kemi merituar, kemi fituar 3 pikët, jemi ende në garë. Të kualifikohesh në Europian është e vështirë por për një Botëror është akoma më shumë dhe ju e dini shumë mirë këtë gjë, por e rëndësishme është që kemi ardhur në tetor dhe jemi ende në garë, do ti shijojmë pak ditët në vijim dhe më pas do të fillojmë punën. Është shumë herët për të folur për ndeshjen me Serbinë, sepse sapo kemi mbaruar një ndeshje. Ne na duhet të menaxhojmë lojtarët tanë, kemi akoma përpara një muaj ku duhet të përgatitemi shumë fort dhe do të provojmë të japim një ndeshje shumë të mirë. Unë besoj që duhet të flasë fusha për 90 minuta”, nënvizoi Silvinjo.
Elseid Hysaj ëndërron Botërorin 2026: Me shpresë deri në fund
Ai ishte një nga më të mirët në fushën e lojës në duelin kundër Letonisë të luajtur mbrëmjen e së martës në stadiumin “Arena Kombëtare” të Tiranës, duke ndihmuar mjaft skuadrën si në fazën mbrojtëse ashtu dhe në atë sulmuese, ku bashkë me Brojën krijojnë një dyshe depërtuese në krahun e djathtë. Bëhet fjalë për Elseid Hysajn, mbrojtësin e Kombëtares kuqezi, i cili deklaroi se do të besojë deri në fund për kualifikimin në Botëror pasi shpresa vdes e fundit. “Kemi pasur raste pozitive për të shënuar golin e dytë dhe tretë, por ja që nuk i shfrytëzuam mirë. Duhet të jemi të qetë dhe kënaqur nga kjo ndeshje sepse me të vërtetë ishte e rëndësishme, e fortë dhe që kemi harxhuar shumë lodhje fizike sepse duhej të fitonim me patjetër. Gjithmonë po flasim edhe ne me veten, po i japim presion vetes, por kësaj herë duhet të gëzojmë të gjithë si çuna dhe të mendojmë për ndeshjen tjetër. Unë besoj se deri kur të thotë matematika që nuk mundemi të kalojmë me, aty besoj që duhet ta ndal besimin, sepse ne me të vërtetë kemi treguar edhe me skuadra të mëdha, që dimë të luajmë, të bëjmë gjëra të bukura, kështu që shpresa vdes e fundit. Unë i falënderoj gjithmonë tifozët, shpresoj që gjithmonë të jenë këtu në stadium”, tha Hysaj.