PAMJE NGA VENDNGJARJA
TIRANË-Shqipëria vijon të jetë i përfshirë nga moti i keq, me reshje të herëpashershme shiu e shtrëngata. Reshjet e shiut kanë shkaktuar përmbytje masive në toka e banesa nga veriu në jug të vendit. Situata paraqitet më e qetë sot, ku fatmirësisht lumi Vjosë ka filluar të tërhiqet nga tokat bujqësore në Kashisht dhe Kafaraj. Sa i përket lumit Seman, niveli ka filluar të ulet, por përsëri është në kuota të larta. Uji ka dalë nga shtrati, por mbetet brenda argjinaturës.
Në veri dhe juglindje të vendit është regjistruar dëbora e parë, ku trashësia e reshjeve të dëborës në aksin Bogë-Theth ka arritur 4 centimetra. Ndërkohë edhe në aksin Hani Hotit – Dogana Vermosh ka pasur reshje dëbore gjatë natës në lartësi mbi 1000 m. Dy borëpastruese ndodhen në terren, teksa nuk problem me qarkullimin.
Edhe qarku i Korçës ka regjistruar sot reshjet e para të borës në zonat malore, duke përfshirë Dardhën, Vithkuqin dhe Shtyllën në lartësinë 1000 metra mbi nivelin e detit. Në Dardhë borë ka filluar nga Km 9, ndërsa kontraktorët janë duke punuar për mirëmbajtjen e rrugës. Aktualisht, reshjet janë të lehta dhe qarkullimi i automjeteve zhvillohet normalisht, pa probleme të raportuara.
Reshjet e para të borës kanë mbërritur këtë mëngjes edhe në zonat malore të Librazhdit. Raportohet se fshatrat Stëblev, Qarrishtë dhe Marat janë mbuluar nga nga një shtresë e lehtë dëbore, ndërsa temperaturat janë ulur ndjeshëm.
Lezha ashtu si pjesa tjetër e vendit vazhdon të jetë nën ndikimin e reshjeve të shiut. Në zonën e Spitenit, Treshit dhe Zejmenit shumë toka, vreshta dhe stalla ndodhen nën ujë.
Kujtojmë se të shtunën autoritetet gjetën trupin e pajetë të një 76-vjeçare e cila ishte mbytur si pasojë e vërshimit të lumit në Devoll duke shënuar viktimën e parë të motit të keq në vendin tonë./ZËRI
