Tag: boksi

Kryebashkiaku i Tiranës, Erion Veliaj ndodhet që prej shkurtit  në qeli, ndërsa hetimet ndaj tij kanë tronditur themelet e pushtetit vendor dhe mazhorancës qeverisëse. Por ndërsa mbrojtja kërkon lirimin e tij, fati i Veliajt është tashmë në duart e gjyqtares Albana Boksi, e njëjta gjyqtare që më parë refuzoi të lironte Ilir Metën. Në të njëjtën kohë, nga qelia ku mbahet në paraburgim në Durrës, Veliaj ka nisur të dërgojë “mesazhe të koduara”, duke shënjestruar atë që, sipas tij, qëndron pas arrestimit të tij.
Çfarë po ndodh me Veliajn?
Gjykata e Lartë ka bërë një hap të rëndësishëm në lidhje me çështjen e Veliajt. Institucioni ka caktuar gjyqtaren që do të marrë në shqyrtim rekursin e paraqitur nga mbrojtja e tij. Në faqen zyrtare të Gjykatës së Lartë është publikuar emri i gjyqtares relatore për këtë çështje, Albana Boksi. Deri më tani, nuk është përcaktuar ende një datë për seancën gjyqësore. Përveç Veliajt, rekurs kanë paraqitur edhe disa nga biznesmenët e përfshirë në të njëjtin hetim penal. Ndërkohë, bie në sy mungesa e emrit të bashkëshortes së Veliajt, Ajola Xoxa, në listën e rekursit. Kjo, pasi ndaj saj është vendosur masa më e lehtë “detyrim paraqitje”, një vendim që nuk është kundërshtuar nga SPAK, për shkak se ajo është nënë e një fëmije të mitur. Publikimi i emrit të gjyqtares Albana Boksi daton më 13 qershor.
Kush është Albana Boksi?
Gjyqtarja Boksi mësohet se ka qenë gjyqtarja që ka marrë vendimin ndaj Fatmir Mediut. Gjithashtu gjyqtarja Boksi ka lënë në qeli edhe Ilir Metën pas kërkesës së tij për lirim. Albana Boksi ka lindur në Shkodër në 7 tetor 1974. Në vitet 1993 – 1997 ka kryer studimet e larta në Fakultetin e Drejtësisë në Shkodër. Në vitet 1998 – 2001 ka kryer studimet në Shkollën e Magjistraturës, Tiranë, duke fituar titullin “Magjistrat Gjyqtar”. Në vitin 2000 është emëruar gjyqtare në Tiranë, ku ka kryer stazhin profesional. Në vitin 2001 është emëruar gjyqtare në Elbasan. Në vitin 2006 është emëruar gjyqtare pranë Gjykatës së Apelit për Krime të Rënda, Tiranë. Në vitin 2011 ka përfunduar studimet pranë Fakultetit të Drejtësisë Tiranë, në nivelin “Master shkencor në të drejtën penale”.
Prej muajit maj 2011 deri maj të vitit 2014, ka punuar si pedagoge e brendshme pranë Shkollës së Magjistraturës. Gjatë viteve 2014 – 2019 ka ushtruar sërish funksionin e Gjyqtares në Gjykatën e Apelit për Krime të Rënda, Tiranë. Në 5 prill 2019, Albana Boksi kaloi procesin e Vetingut pa probleme, duke u konfirmuar në detyrë. Në muajin dhjetor 2019 është caktuar në pozicionin e Gjyqtares në Gjykatën e Posaçme të Apelit për Korrupsionin dhe Krimin e Organizuar. Në mars 2021 është emëruar gjyqtare në Gjykatën e Lartë. Znj. Boksi ka një eksperiencë të pasur në fushën e mësimdhënies në disa universitete publike dhe private. Ajo ka marrë pjesë në shumë aktivitete kombëtare e ndërkombëtare në fushën e së drejtës. Është bashkëautore në disa botime e studime si; “Manual i Etikës Gjyqësore”, “E drejta për akses në gjykatë në çështjet civile”, etj., si edhe pjesë e grupit të ekspertëve në hartimin e Komentarit Elektronik të Kodit të Procedurës Penale.
Sinjalet nga Veliaj
Nga ana tjetër, Erion Veliaj, nga qelia e paraburgimit në Durrës, po vijon të japë “sinjale” të forta për ata “shokë” që sipas tij e kanë tradhtuar. Për të përcjellë këto “mesazhe të koduara” i pari i qytetit të Tiranës ka zgjedhur rrjetin social “TikTok”. Kësaj here ai ka postuar një video kur ka qenë në zyrën e tij të kryetarit, ndërkohë që e ka shoqëruar me një paralajmërim për ata që u “kënaqën” kur ai u arrestua dhe u përpoqën që ta poshtërojnë. “Të më arrestosh dhe të përpiqesh të më poshtërosh, e di që të ka bërë të ndihesh mirë. Por karma gjithmonë e gjen rrugën për t’u kthyer, edhe nëse vonohet. Shpresoj vetëm që ata të jenë aq të fortë sa isha unë”, shkruan Veliaj duke ngritur kështu një sërë pikëpyetjesh te qytetarët se vallë për kë i ka këto “kunja” dhe paralajmërime kryetari.