Foto ilustruese-parkimi dysh
TIRANË- Vendimi i Drejtorit të Përgjithshëm të Policisë së Shtetit në Shqipëri, Ilir Proda, mbi marrjen e masave ndaj parkimeve të gabuara, si parkimi i dyfishtë në rrugë, ka ngjallur shqetësim te qytetarët. Këta të fundit, të shqetësuar nga gjoba drastike dënim deri në 3 vite burg, duhet të dinë se në fakt se jo çdo situatë parkimi pranë një automjeti mund të çojë në ndjekje penale.
Situatat më të zakonshme janë ato të parkimit apo ndalimit të një automjeti pranë një automjeti tjetër që tashmë është i parkuar, por jo vetëm ky rast. Parkimi i dyfishtë konsiderohet vepër penale nëse bllokon qartazi automjetet e emergjencës apo policisë, kur bllokon tërësisht rrugën për automjetet e tjera apo kur bllokon rrugën për këmbësorët.
Megjithatë, çdo rast do të vlerësohet në mënyrë të veçantë, që vendimi për ndjekje penale të mbështet në prova dhe rrethana konkrete.
Kur parkimi dysh kthehet në vepër penale?
Sipas burimeve nga Policia e Shtetit, parkimi i dyfishtë do të konsiderohet vepër penale vetëm në raste specifike dhe të mirëpërcaktuara, kur ai:
-Pengon qartazi dhe në mënyrë të drejtpërdrejtë lëvizjen e automjeteve të emergjencës si ambulanca, zjarrfikëse, mjetet e policisë apo shërbime të tjera të institucioneve.
-Bllokon tërësisht rrugën, duke e bërë të pamundur kalimin e mjeteve të tjera.
-Shkakton bllokim total të rrugës për këmbësorët, duke u bërë pengesë serioze për sigurinë publike.
Në këto raste të rënda, policia nuk do të mjaftohet me vendosjen e një gjobe administrative, por do të nisë procedurat për ndjekje penale, sipas nenit 293 të Kodit Penal, që parashikon: “Pengimi i qarkullimit të mjeteve të transportit, vënia e pengesave dhe ndalimi me çdo mjet e mënyrë i qarkullimit të mjeteve të transportit automobilistik, hekurudhor, ujor apo ajror, dënohet me gjobë ose me burgim deri në tre vjet.”
Çfarë ndodh pas konstatimit nga policia?
Nëse një efektiv i qarkullimit rrugor konstaton një rast që përputhet me kriteret e mësipërme, ai nuk do të marrë vetë vendimin për ndjekje penale, por do ta referojë rastin në prokurori. Organet e akuzës, pas shqyrtimit të pamjeve filmike, dëshmive dhe çdo prove tjetër të mbledhur, do të vendosin nëse drejtuesi i mjetit duhet të ndiqet penalisht.
Kjo do të thotë se çdo rast do të vlerësohet në mënyrë të veçantë, dhe vendimi për të ngritur një akuzë penale nuk është automatik, por i mbështetur në prova dhe rrethana konkrete.
Çfarë ndodh në rastet e zakonshme?
Në pjesën më të madhe të rasteve të parkimeve dysh, pra kur nuk ka pasoja të rënda për qarkullimin apo sigurinë, policia do të vijojë me masat administrative, ashtu si deri më sot, duke vendosur gjobë sipas Kodit Rrugor nga 1 mijë deri në 3 mijë. Kjo përfshin edhe vendosjen e bllokuesve të gomave dhe heqjen me karrotrec./ZËRI/
