Lajmidites.com

Tag: basketbollit

  • “Vdekje për shqiptarët”, thirrje antishqiptare në ndeshjen e basketbollit Maqedoni-Rumani, në sallë i pranishëm edhe Kryeministri Mickoski

    “Vdekje për shqiptarët”, thirrje antishqiptare në ndeshjen e basketbollit Maqedoni-Rumani, në sallë i pranishëm edhe Kryeministri Mickoski

    Gjatë ndeshjes së basketbollit të luajtur të shtunën mes Maqedonisë së Veriut dhe Rumanisë, një pjesë e tifozëve të pranishëm në sallë shpërthyen me kore antishqiptare.

    Në thirrjet e tifozëve dëgjohet të thuhet: “Le ta kuptojnë shqiptarët e mallkuar, emri maqedonas nuk do të zhduket, Maqedoni e pastër, e pastër, e pastër”.
    Ky ishte refreni i thirrjeve që u dëgjuan qartë nga një pjesë e tifozëve në tribunë, ndërsa autoritetet e pranishme nuk ndërmorën asnjë veprim për të ndaluar gjuhën e urrejtjes.

    Koret vazhduan pavarësisht pranisë në sallë të kryeministrit Hristijan Mickoski, kryetarit të Kumanovës Maksim Dimitrievski, ministrit të Punëve të Jashtme Panço Toshkovski, zëvendëskryeministrit Ivan Stoilkoviç dhe zyrtarëve të tjerë të lartë shtetërorë. Ky nuk ishte momenti i vetëm provokues gjatë ndeshjes.
    Përgjatë zhvillimit të saj, u dëgjuan edhe thirrje të tjera, si parulla famëkeqe “Shqiptari i mirë është shqiptari i vdekur”, si dhe “Dhoma të gazit për shqiptarët”, që përkujtojnë retorikën më të errët të historisë evropiane.
    Pas përfundimit të ndeshjes, nuk pati asnjë reagim zyrtar, distancim publik apo kërkim falje nga organizatorët apo përfaqësuesit institucionalë për incidentin.
    Ndaj këtyre thirrjeve, ka reaguar ashpër Zëvendëskryeministri i parë i Maqedonisë së Veriut, Izet Mexhiti.
    “Dënoj ashpër thirrjet raciste dhe anti-shqiptare të dëgjuara gjatë ndeshjes së basketbollit. Fjalët fyese dhe këngët që nxisin urrejtje, nuk kanë vend në shtetin dhe shoqërinë tonë”, shkroi Mexhiti në reagimin e tij publik.
    Ai shtoi se këto veprime përbëjnë një sulm të drejtpërdrejtë ndaj bashkëjetesës dhe barazisë që, sipas tij, e bëjnë Maqedoninë e Veriut një shtet unik.

  • Thirrjet kundër shqiptarëve në Kumanovë, reagon Federata e Basketbollit të Maqedonisë së Veriut: Sloganet…

    Thirrjet kundër shqiptarëve në Kumanovë, reagon Federata e Basketbollit të Maqedonisë së Veriut: Sloganet…

    Pas gjuhës së urrejtjes dhe fyerjeve në ndeshjen e basketbollit në Kumanovë, Federata e Basketbollit të Maqedonisë së Veriut tha se distancohet dhe dënon sjelljen jo të hijshme “të një pjese të vogël të tifozëve në ndeshjen Maqedoni – Rumani”.

    Sipas Federatës së Basketbollit, veprime të tilla nuk përfaqësojnë frymën, vlerat dhe identitetin e federatës, as nuk pasqyrojnë shumicën e tifozëve, të cilët do të jenë gjithmonë shembull i kulturës dhe mbështetjes sportive.
    “Sloganet nacionaliste, gjuha e urrejtjes dhe nxitja e intolerancës nuk kanë vend në tribuna, as në sport në përgjithësi. Federata u bën thirrje të gjithë tifozëve të përmbahen nga veprime të ngjashme në të ardhmen dhe të kontribuojnë në krijimin e një atmosfere pozitive, të sigurt dhe gjithëpërfshirëse në stadiume dhe salla”.
    Gjatë ndeshjes së basketbollit mes Maqedonisë së Veriut dhe Rumanisë u dëgjuan thirrje me gjuhë urrejtjeje dhe raciste kundër popullit shqiptar shqiptarëve.
    “Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër”, thërrisnin një pjesë e tifozëve në tribunë.
    Të pranishëm ishin personalitete të larta shtetërore, përfshirë kryeministrin Hristijan Mickoski, kryetarin e Kumanovës Maksim Dimitrievski, ministrin e Punëve të Jashtme Panço Toshkovski dhe zëvendëskryeministrin Ivan Stoilkoviq.

  • Skandaloze në Kumanovë/ Kore raciste dhe antishqiptare në ndeshjen e basketbollit Maqedoni e Veriut-Rumani (VIDEO)

    Skandaloze në Kumanovë/ Kore raciste dhe antishqiptare në ndeshjen e basketbollit Maqedoni e Veriut-Rumani (VIDEO)

    Ngjarjet shqetësuese janë përsëritur sërish në palestrën e sportit në Kumanovë, ku gjatë ndeshjes së basketbollit mes Maqedonisë së Veriut dhe Rumanisë u dëgjuan kore me gjuhë urrejtjeje, raciste dhe ksenofobe kundër shqiptarëve.
    Një pjesë e tifozëve në tribunë brohorisnin refrene urrejtjeje si: “Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër.”

    Pavarësisht se këto thirrje dëgjoheshin qartë, asnjë prej autoriteteve të pranishme në sallë nuk ndërhyri për t’i ndalur.

    Në tribunat e palestrës ndodheshin personalitete të larta shtetërore, përfshirë kryeministrin Hristijan Mickoski, kryetarin e Kumanovës Maksim Dimitrievski, ministrin e Punëve të Jashtme Panço Toshkovski dhe zëvendëskryeministrin Ivan Stoilkoviq. Por, prania e tyre nuk shërbeu si pengesë për vazhdimin e gjuhës së urrejtjes.
    Incidenti nuk u kufizua vetëm në një moment të izoluar. Gjatë gjithë ndeshjes, u dëgjuan parulla edhe më ekstreme, përfshirë fraza tronditëse si:“Shqiptari i mirë është shqiptari i vdekur” dhe “Dhoma e gazit për shqiptarët”, duke sjellë në vëmendje retorika të errëta të historisë evropiane që përfaqësojnë kulmin e racizmit dhe dhunës etnike.
    Pas përfundimit të ndeshjes, nuk ka pasur asnjë reagim zyrtar, distancim publik apo kërkim faljeje nga organizatorët, federata apo institucionet shtetërore, ndonëse incidenti ka ngjallur indinjatë të thellë në opinionin publik dhe komunitetet shqiptare në rajon.

  • Skandal në Kumanovë! Kore anti-shqiptare gjatë ndeshjes së basketbollit, i pranishëm edhe Mickoski

    Skandal në Kumanovë! Kore anti-shqiptare gjatë ndeshjes së basketbollit, i pranishëm edhe Mickoski

    Një incident i rëndë me tone nacionaliste dhe gjuhë të urrejtjes ndaj shqiptarëve ka ndodhur gjatë ndeshjes së parakualifikimeve për Kampionatin Botëror të basketbollit mes Maqedonisë së Veriut dhe Rumanisë, e zhvilluar në qytetin e Kumanovës.
    Në prani të drejtuesve më të lartë të shtetit – përfshirë kryeministrin Hristijan Mickoski, kryetarin e Kumanovës Maksim Dimitrievski, ministrin e Jashtëm Panço Toshkovski dhe zëvendëskryeministrin Ivan Stoilkoviç – një pjesë e tifozëve në tribunë lëshuan thirrje të hapura anti-shqiptare, pa asnjë ndërhyrje nga autoritetet.
    “Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër” – ishte një nga refrenët që u dëgjua qartë gjatë sfidës, sipas raportimeve nga media lokale.
    Skandali nuk përfundoi aty. Gjatë lojës, u dëgjuan edhe thirrje më të rënda si “Shqiptari i mirë është shqiptari i vdekur” dhe “Dhoma e gazit për shqiptarët”, duke rikthyer në kujtesë retorika të errëta dhe të rrezikshme nga historia e Evropës.
    Incidenti ka nxitur reagime të forta në rrjetet sociale, ndërsa pritet që komuniteti shqiptar në Maqedoni dhe faktorë ndërkombëtarë të kërkojnë sqarime dhe masa konkrete ndaj tolerimit të gjuhës së urrejtjes në një aktivitet zyrtar sportiv.

  • Guler bën kosh me këmbë, videoja bëhet virale

    Guler bën kosh me këmbë, videoja bëhet virale

    3 Gusht 2025

    9:36

    Telesport

    Ylli i Real Madrid, Arda Guler, ka treguar aftësitë e tij teknike, teksa ka realizuar një kosh me një goditje mbresëlënëse.
    Los Blancos ende nuk kanë filluar siç duhet stërvitjen parasezonale për sezonin e ardhshëm, dhe mesfushori ka shijuar pak kohë në Turqi me të dashurën e tij Duru Nayman, e cila është një lojtare profesioniste e basketbollit.
    Guler i tregoi Nayman se nuk është e vetmja që e njeh mirë fushën e basketbollit, pasi lojtari turk e futi topin në rrjetë pa e goditur tabelën.
    Ai njihet për pasimet e tij të sakta në fushën e futbollit, dhe tregoi se teknika e tij është mjaft e mirë për çdo lloj topi.

    Arda Güler, ayağıyla basket attı. pic.twitter.com/yaPF1XCd5D
    — BPT (@bpthaber) August 2, 2025

  • Basketbolli digjet, Federata krihet!

    Basketbolli digjet, Federata krihet!

    Adriatik BALLA
    Kanë kaluar tashmë dy javë nga kërkesa e 10 shoqatave anëtare të Federatës Shqiptare të Basketbollit (FSHB), drejtuar Presidentit të saj, dhe ende nuk ka asnjë përgjigje zyrtare apo thirrje për Asamble për të diskutuar problematika mjaft serioze dhe të rënda që po dekompozojnë basketbollin shqiptar. Për ironi, presidenti i federatës Avni Ponari vazhdon të bëjë komente mbi marrëdhëniet e anëtarëve midis njeri-tjetrit, ndërkohë që shmang përgjigjen ndaj kërkesave urgjente të komunitetit sportiv. “Sjellje e papërgjegjshme, aspak serioze dhe krejtësisht e papranueshme për një drejtues federate në një vend europian”, thonë në gjirin e komunitetit të basketbollit. Fatkeqësisht, nuk është hera e parë që FSHB hesht. Edhe kërkesa e Kamza Basket, dërguar më 17 prill për një vendim arbitrar dhe të paligjshëm të Sekretarit të Përgjithshëm, u injorua. Rasti tashmë është në ndjekje ligjore dhe është vetëm një nga shumë të tjera që tregojnë qartë krizën e thellë të institucionit që menaxhon basketbollin në vend.
    Çfarë nëse anëtarët reagojnë njësoj?
    Çfarë ndodh nëse një ditë, anëtarët vendosin të reagojnë me të njëjtën arrogancë dhe indiferencë, madje të refuzojnë të marrin pjesë në veprimtaritë e një federate që nuk praktikon “fair play”? Kjo nuk do të ishte befasi. Federata tashmë ka humbur legjitimitetin dhe integritetin, e drejtohet nga persona të paaftë, të paarsimuar dhe pa asnjë standard etik apo profesional.
    Kërkesat janë të qarta:

    Thirrje për Asamble për të diskutuar mbi financat, tarifat dhe rregulloren e sezonit të ardhshëm.
    Transparencë dhe llogaridhënie.
    Sqarim mbi statusin ligjor të vetë Federatës.

    Dikur, faqja zyrtare e FSHB-së publikonte vendimet e gjykatave, buletinet dhe arkivat e aktiviteteve. Sot, gjithçka është fshirë. Pse? Sepse historia e vërtetë nuk i shërben interesave të personave të emëruar në mënyrë të paligjshme e të padenjë për postet që mbajnë. Për ta, historia e basketbollit shqiptar fillon vetëm kur ata erdhën në pushtet.
    Rastet flagrante po shtohen – askush nuk reagon
    Rastet e abuzimeve në ekipet kombëtare të moshave po shtohen dita-ditës. Nga mesazhe denoncuese të prindërve të shqetësuar, deri te paditë zyrtare në gjykatë, tabloja është e qartë: zyrat e Federatës nuk ofrojnë asnjë zgjidhje. Aty gjen vetëm konfuzion, përçarje dhe arrogancë të institucionalizuar. Çdo ditë, prindërit e sportistëve të ekipeve U16 dhe U18 në vend që të mbështesin fëmijët e tyre në ëndrrën përfaqësuese vrapojnë në korridoret e ministrive, zyrave shtetërore dhe gjykatave, në përpjekje për të zbardhur të vërtetën dhe për të kërkuar të drejtën. Ndërkohë, nga zyrat e Federatës nuk prodhohet asgjë përveç shkeljeve të njëpasnjëshme, nepotizmit të hapur dhe vendimeve të cilat shpesh bien ndesh me rregullat që vetë anëtarët kanë miratuar. E vërteta është e thjeshtë: kjo federatë nuk është në gjendje të funksionojë pa mbështetjen e anëtarëve të saj, dhe megjithatë, i shkel dhe i injoron sistematikisht, për hir të rehatisë dhe privilegjeve të zyrtarëve që janë kthyer në turistë luksozë në kurriz të komunitetit.
    Kryesia e FSHB – një kukull në shërbim të një urdhërdhënësi
    Kryesia e Federatës është kthyer në një organ fiktiv, pa zë, pa rol, pa mision. Ajo nuk përfaqëson më as komunitetin, as anëtarët. Ajo thjesht bindet verbërisht ndaj udhëheqjes dhe interesave personale të presidentit.
    Sekretari i Përgjithshëm në qendër të arrogancës dhe përfoljeve
    Emri i Sekretarit të Përgjithshëm, Franko Bushati, përmendet çdo ditë në komunitetin sportiv me akuza të rënda. Përflitet për deklarata nën efektin e alkoolit, për arrogancë në vendimmarrje, për kapërcim të kompetencave dhe për përzgjedhje të ekipeve apo trajnerëve sipas preferencave personale.
    Deklarata të tilla si: “Sa të jem unë në këtë post, bëhet si dua unë” nuk janë thjesht të papërgjegjshme. Ato përbëjnë abuzim me detyrën dhe shpërdorim autoriteti. A është i vetëdijshëm z. Bushati për kompetencat që i njeh apo i ndalon statuti i FSHB-së? Deri tani, duket se jo.
    Basketbollit i duhet vizion – jo sundim
    Basketbolli shqiptar është kthyer në pasqyrë të krizës së madhe në sportin shqiptar: mungesë transparence, mungesë ligjshmërie, mungesë llogaridhënieje, mungesë etike. Nëse drejtuesit nuk janë të gatshëm të japin llogari, të respektojnë statutin dhe të përballen me të vërtetat – atëherë është koha për ndryshim.
    NJË PËRMBLEDHJE E DËSHTIMEVE TË FSHB NË DY SEZONET E FUNDIT
    Më poshtë jepet një pasqyrë e përmbledhur e dështimeve të federatës dhe natyrisht disa konkluz9ione që dalin natyrshëm nga leximi i ngjarjeve në FSHB dhe të mbledhura nga diskutimet e bëra brenda komunitetit të basketbollit.

    FSHB është ilegjitime, me një Sekretar të Përgjithshëm të pazgjedhur nga komuniteti dhe ende të panjohur nga gjykata.
    Një sekretar që firmos letra pa pasur as kompetencë ligjore, as njohje statutore. I paarsimuar, arrogant dhe në kundërshtim flagrant me statutin.
    Një kryesi e paligjshme, ende e panjohur nga gjykata, që firmos për të mbrojtur interesat e shefit.
    Një kryesi “sahanlëpirëse” që vepron vetëm me urdhër.
    FSHB që nuk zbaton rregulloret e veta dhe statutin. Në çdo vend tjetër të Europës, komuniteti sportiv do të protestonte fuqishëm.
    Në janar 2025, pas vendimeve arbitrare dhe selektive, FSHB njoftoi organizimin e seminareve për “integritet në sport”. Pyetja është: ku është SPOKU i shumëpërfolur? Kush do flasë për integritet në një federatë që e ka braktisur këtë parim?
    Dështoi edhe me organizimin e kampeve të verës në Përmet, për shkak të mungesës së besimit të komunitetit ndaj propagandës “hajde paguaj, se bëj ç’të dua”.
    Kombëtarja është kthyer në treg të zi – përzgjedhjet e trajnerëve bëhen mbi bazën e bindjes dhe jo meritës, ndërsa talentet lihen jashtë për të bërë “qoka”.
    FSHB vazhdon të paraqesë dështimet si suksese. Medaljet e vendeve të dyta dhe të treta në divizionet C quhen “arritje”. Skandaloze! Liga C është ligë e dorës së fundit, e skuadrave nga mikroshtetet.

  • FOTO – Kampionati Europian i Basketbollit U-16 në Shkodër, punime për kushte optimale në “Qazim Dervishi”

    FOTO – Kampionati Europian i Basketbollit U-16 në Shkodër, punime për kushte optimale në “Qazim Dervishi”

    Në prag të Kampionatit Europian të Basketbollit U16 që do të zhvillohet në Shkodër, në Pallatin e Sportit “Qazim Dervishi” po kryhen punime për të garantuar kushte optimale për të gjithë sportistët pjesëmarrës.
    Punonjësit e Drejtorisë së Menaxhimit të Objekteve Publike po punojnë intensivisht për përmirësimin e elementeve kyçe sportive, parketi i fushës së lojës, rinovimi i dhomave të zhveshjes dhe po vihet në funksion sistemi i kondicionimit të ajrit në të gjithë ambientin e pallatit.
    Përveç këtyre, do të bëhet rishikimi i ndriçimit sportiv dhe sinjalistikës brenda sallës, për të garantuar standardet që kërkon një aktivitet i nivelit europian. /Publikuar në Facebook, në faqen zyrtare të kryetarit të Bashkisë Shkodër, Benet Beci/

    Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin! Bashkohu me kanalin e SHKODRAWEB në Whatsapp, mjafton të klikoni Kontaktoni për lajmet më të fundit direkt në celularin tënd.
    Ju mirëpresim!

  • Skandali në Federatën Shqiptare të Basketbollit thellohet, trajnerët shqiptarë të injoruar ndërsa Kosova ecën përpara

    Skandali në Federatën Shqiptare të Basketbollit thellohet, trajnerët shqiptarë të injoruar ndërsa Kosova ecën përpara

    Adriatik BALLA
    Skandali në Federatën Shqiptare të Basketbollit vazhdon, ndërsa trajnerët shqiptarë vijojnë të injorohen sistematikisht, pa asnjë mundësi zhvillimi profesional dhe pa përfshirje në evente ndërkombëtare. Rasti më i fundit vjen nga European Mini Basketball Convention, mbajtur në datat 5-8 qershor 2025 në Luksemburg, një ngjarje prestigjioze e organizuar nga FIBA, ku federatat kombëtare ftohen të nominojnë trajnerët më të përgatitur të minibasketbollit për të marrë pjesë në trajnime dhe leksione. Ndërkohë që Kosova përfaqësohej denjësisht nga dy trajnerë të përzgjedhur, nga Shqipëria asnjë trajner nuk u dërgua, as nuk u informua. Kjo mungesë nuk është thjesht një harresë, por një pasqyrim i qartë i indiferencës dhe përbuzjes që kjo federatë tregon për zhvillimin real të basketbollit dhe për vetë njerëzit që e ndërtojnë atë çdo ditë.
    Mesa duket, Federata Shqiptare e Basketbollit është më e zënë me organizimin e udhëtimeve në male dhe kampeve të dyshimta që shërbejnë për interesa personale, sesa të kryejë misionin e saj bazë: të zhvillojë trajnerët, lojtarët dhe sistemin sportiv shqiptar. Në vend që të shfrytëzojë mundësitë që ofron FIBA për zhvillimin e stafit teknik, ajo preferon të zhytet në rrethin e saj të mbyllur, duke favorizuar individë të përzgjedhur sipas interesave të brendshme. Në qendër të këtij rrjeti të mbyllur qëndrojnë Sekretari i Përgjithshëm dhe Presidenti i federatës Shqiptare të Basketbollit, dy figura që me veprimet e tyre (të paktën deri tani) kanë dëshmuar se nuk kanë interes as për rritjen e basketbollit shqiptar dhe as për transparencën institucionale. Franko Bushati vazhdon të përfitojë maksimalisht nga pozicioni i tij, me sa kuptohet, me qëllim për të siguruar një vend pune në Itali dhe për tu “zhdukur” sa më shpejt. Ndërsa presidenti Avni Ponari me sa duket nuk e kupton (ose bën sikur nuk e kupton) këtë skemë të ulët.
    Kush është Franko Bushati dhe pse nuk e meriton postin që mban?
    Si është e mundur që Franko Bushati të jetë ende Sekretar i Përgjithshëm i kësaj federate? Referuar disa informacioneve jo zyrtare, në kohën që ishte lojtar i Kombëtares Shqiptare ka qëlluar me këpucë trajnerin e tij, gjithashtu është përjashtuar disa herë nga ekipi kombëtar për sjellje të papërshtatshme. Kritikët thonë se si ka mundësi që ky njeri jep mend për basketbollin shqiptar dhe mban një nga postet më të larta në sportin tonë? Në çdo vend normal, do të ishte larguar, por në FSHB këta individë vlerësohen dhe promovohen. Sot ai është në krye të kësaj federate, i emëruar dhe mbështetur nga presidenti Avni Ponari, i cili, gjithnjë sipas kritikëve, ose nuk e kupton se çfarë po ndodh në federatën që drejton, ose e mbështet këtë model që po e fundos sportin. A është ky standardi i lidershipit që meritojnë trajnerët, lojtarët dhe klubet shqiptare? Nëse ecim në këtë linjë të analizës, Federata është shndërruar në një institucion ilegjitim, ku për t’u bërë sekretar nuk kërkohen diploma apo përvojë, por “kualifikime” si: arrogant, i pashkollë, pse jo edhe pijedashës e sherrxhi në pallatet e sportit.

    FSHB mbyll “qepenin”, një federatë pa plan, pa strategji dhe pa transparencë
    Ndërkohë që trajnerët injorohen dhe standardet bien çdo ditë, federata nuk ka publikuar ende asnjë plan për sezonin e ri, ndonëse jemi në fund të qershorit dhe kampionati pritet të nisë në shtator. Klubet që kanë investuar miliona lekë ndodhen sot në ajër, pa asnjë udhëzim, pa e ditur se çfarë merkatoje të bëjnë, pa e ditur nëse duhet të nisin përgatitjet apo të presin sinjalin e radhës nga “kupola” e federatës. Ndërkohë federata dërgon një email për propozime, një skemë e përsëritur dhe vitin e kaluar, ku morën propozimet e shoqatave për pjesën e lojtareve të huaj nëse ishte më mirë me 3 apo 4 dhe në fund vendosën sipas qejfit të tyre pa limit lojtarësh të huaj. Sepse kjo u interesoi për të mbushur xhepat e tyre. Kjo është një papërgjegjshmëri totale ndaj klubeve, sponsorëve, trajnerëve dhe vetë lojtarëve, të cilët nuk dinë as ku janë dhe as ku po shkojnë. Kjo thirrje e federatës nuk ka marrë përgjigje pikërisht prej trajtimit dhe injorimit që ato u bëjnë propozimeve të shoqatave, mbase kjo është arsyeja pse është shtyrë dhe afati i dërgimit të tyre, nga data 15 qershor me 22 qershor. Të shohim se çdo ndodhë edhe kësaj here.
    Injorimi që federata bëri për kampingun e trajnerit Spiro Leka.
    Sikur të mos mjaftonin të gjitha këto, FSHB ka injoruar edhe kampin e organizuar nga trajneri Spiro Leka, një prej shqiptarëve më të suksesshëm në Europë dhe një nga 35 trajnerët më të vlerësuar në Itali. Leka organizoi një kamp të hapur për zhvillimin e cilësisë individuale të lojtarëve, një mundësi fantastike për të rinjtë dhe për trajnerët që duan të mësojnë. Madje, edhe pse Sekretari i Përgjithshëm vetë ishte i pranishëm në këtë kamp, nuk mori mundimin të njoftojë asnjë trajner tjetër që mund të ishte i interesuar të mësonte e të përfitonte. Pse? Sepse nuk kishte interes personal, dhe aty ku nuk ka interes për individët në krye të federatës, gjithçka tjetër është e pavlerë.
    E ardhmja në pikëpyetje
    Nga analiza e mësipërme dalim në konkluzionin që: Nëse nuk do të ndryshojë qasja, nëse nuk do të ketë transparencë dhe përgjegjësi, atëherë asnjë shpresë reale nuk mbetet për zhvillimin e këtij sporti në Shqipëri. Ka ardhur koha që kjo federatë të zhvishet nga arroganca dhe të kthehet në duart e atyre që e duan vërtet basketbollin, jo në duart e atyre që e përdorin atë për përfitime të errëta.

  • FSHB E SKANDALEVE: TRAJTIMI POSHTËRUES I KOMBËTARES DHE JO VETËM          

    FSHB E SKANDALEVE: TRAJTIMI POSHTËRUES I KOMBËTARES DHE JO VETËM          

    Ky është “ushqimi sportiv” që u është shërbyer lojtarëve të Kombëtares U20 gjatë një grumbullimi zyrtar të mbështetur nga Federata Shqiptare e Basketbollit. Një ushqim që jo vetëm është i papërshtatshëm për sportistë elitarë, por edhe fyes për dinjitetin e atyre që përfaqësojnë ngjyrat kuqezi. Ky episod nuk është thjesht një incident i izoluar, por reflektim i qartë i një strukture të kalbur, ku Federata Shqiptare e Basketbollit, është shndërruar në një rrjet të mbyllur interesash personale, ku përzgjedhja e trajnerëve, grumbullimet dhe aktivitetet kombëtare varen nga interesa financiarë dhe jo profesionalë.
    FANELLA KOMBËTARE SI OBJEKT PAZARI
    Kombëtarja shqiptare është kthyer në një plaçkë tregu që jepet me qira për interesa personale e politike. Emërimet e trajnerëve në ekipet kombëtare nuk bazohen më në meritokraci apo përgatitje profesionale, por në afërsinë me drejtuesit e federatës dhe gatishmërinë për të vetëfinancuar aktivitetet që duhej të mbuloheshin nga vetë FSHB. Trajnerët detyrohen të “gjejnë para” për të organizuar grumbullime dhe turne, sepse në të kundërt, nuk përfshihen fare në planet e federatës. Kush nuk pranon të bëhet pjesë e këtij mekanizmi të pistë, përjashtohet nga skena kombëtare. Në vend që të vlerësohen për aftësitë e tyre në fushën e lojës, ata testohen për aftësitë e tyre për të kërkuar sponsorizime dhe për të mbushur boshllëqet e një federate që nuk kryen funksionin e saj bazë. Në artikujt e ardhshëm, pas një analize të emërimeve të trajnerëve do t’ju zbardhim kualifikimet dhe kontributet e secilit trajner.
    KLAUDIO NDOJA – SIMBOLI I KAPJES SË SISTEMIT
    Një ndër figurat në këtë vatër korrupsioni është Klaudio Ndoja, aktualisht drejtor i garave, trajner i Kombëtares U18 dhe anëtar i Komisionit të Disiplinës — një përqendrim funksionesh në një dorë të vetme, në kundërshtim me çdo rregull etik dhe organizativ. Emërimi i tij është bërë jashtë çdo procesi të hapur apo konkurrues, në mënyrë të drejtpërdrejtë nga Presidenti Avni Ponari, duke anashkaluar procedurat që garantojnë transparencë dhe profesionalizëm. Nga burimet tona mësojmë se paradoksi me i madh është se Kombëtarja U18 nuk ka mundësi të grumbullohet në Tiranë, ku do të mbahet Kampionati Europian, dhe për këtë arsye trajneri Klaudio Ndoja po kërkon lëmoshë nëpër biznesmenë dhe pushtetarë në Shkodër që të financojnë grumbullimin në qytetin e tij.
    Ndërkohë, Kombëtarja U16, që do të zhvillojë Europianin në Shkodër, është duke u grumbulluar në Tiranë. Kjo lëvizje absurde dhe e paarsyetuar nga ana teknike apo logjistike tregon mungesën e plotë të planifikimit dhe seriozitetit. E gjitha kjo bëhet për interesa personale, me qëllim që ky trajner (Klaudio Ndoja) i lidhur me drejtuesit e federatës, të realizojnë “grumbullimin” të paguar nga të tretë dhe të promovohet më pas nëpër media si “shpëtimtar” i basketbollit shqiptar, me synimin final për të shfrytëzuar titullin “trajner i ekipit kombëtar” për t’u sistemuar në ndonjë klub italian dhe që mezi pret të kthehet për të gjetur një vend si trajner, ndryshe nuk e pranon askush në stolat e trajningut, sepse kjo punë do eksperiencë dhe kualifikime.
    SHKELJET FLAGRANTE TË STATUTIT JANË MENUJA E DITËS SË FSHB
    Po kryesia e kësaj federate, ku është, për çfarë ekziston, apo shërben vetëm për firma për vendime arbitrare që i vihen në tavolinë ???? Pse kryesia është inekzistente? Kjo përbën një shkelje të hapur të funksionimit dhe zbatimit të statutit të vetë federatës, i cili parashikon mbledhjet e kryesisë dhe komisioneve për çdo problematikë si edhe asamblesë të paktën një herë në 6 muaj.
    Kjo federate që asamble quan drekat dhe darkat e fundvitit ku nuk diskutohet por serviren dekorata. Kjo heshtje e institucionit më të lartë drejtues është dëshmi e një federate që operon pa kontroll, pa transparencë dhe jashtë çdo standardi institucional duket shkatërruar basketbollin shqiptar dhe ku llogaridhënia bëhet nëpër rrjete sociale, pasi në tavolina pune, prej kohësh në FSHB nuk afrohet askush, për t’i dhënë një mesazh kësaj federate, që puna e shtrënguar në një dorë të mbyllur dhe të errët nuk i intereson.
    KU KA HUMBUR SEKRETARI I PËRGJITHSHËM, FRANKO BUSHATI?
    Në të gjithë këtë situatë skandaloze, Sekretari i Përgjithshëm i Federatës, Franko Bushati, nuk ka dhënë asnjë shenjë jete, me sa duket vetëm firmos pagën e vet dhe kaq mjafton për të. Të tjerat ka kush e bën protagonistin. Nuk ka dalë me asnjë deklaratë publike, rrjete sociale, nuk është parë në ndonjë aktivitet zyrtar dhe nuk figuron në asnjë dokument të publikuar nga FSHB në muajt e fundit. Heshtja e tij është bashkëfajësi dhe mungesa e tij e thekson më tej idenë se federata funksionon me autopilot për interesat e një grupi shumë të vogël individësh.
    PËRFUNDIM
    Federata Shqiptare e Basketbollit ndodhet në kolaps institucional, moral dhe funksional. Nga mënyra si trajtohen sportistët e ekipeve kombëtarë, tek mënyra si përzgjidhen trajnerët, deri tek mënyra si mbahen (ose më saktë nuk mbahen) mbledhjet e asamblesë, mbledhjet e kryesisë,— gjithçka është një rrëmujë e planifikuar për të ruajtur pushtetin e një grushti njerëzish që e shohin këtë sport si një mënyrë përfitimi personal dhe pronë private me një pronar të vetëm. Është koha që strukturat përkatëse, përfshirë Ministrinë e Arsimit dhe Sportit, si dhe të gjithë aktorët seriozë të sportit shqiptar, të ndërhyjnë me urgjencë. Sepse ajo që po ndodh në Federatën e Basketbollit nuk është vetëm një krizë sportive — është një krizë morali, drejtësie dhe dinjiteti kombëtar.

  • Frikë nga përplasjet, qeveria greke anulon finalen e basketbollit Panathinaikos-Olimpiakos

    Frikë nga përplasjet, qeveria greke anulon finalen e basketbollit Panathinaikos-Olimpiakos

    Adriatik BALLA
    Qeveria greke ka urdhëruar pezullimin e përkohshëm të ndeshjeve finale të ligës greke të basketbollit mes Panathinaikos dhe Olimpiakos, pas incidenteve të ndodhura në pallatin e sportit në Pire, para dhe pas ndeshjes së fundit. Kësaj here, incidentet kanë në qendër vetë pronarët e dy ekipeve kryesuese në këtë ligë. Seria e të ashtuquajturave “play-off”-s është aktualisht në rezultatin 1-1 dhe ndeshja e tretë, e planifikuar për të mërkurën, është shtyrë. Presidentët, njëkohësisht pronarë të dy klubeve të njohura, janë thirrur për t’u takuar me ministrin e Sportit të vendit deri të mërkurën në orën 15:00. Në postime online, në fillim përjashtuan mundësinë e pjesëmarrjes në këtë takim, duke lënë në dyshim fatin e ultimatumit qeveritar, ndërsa sot presidenti i Panathinaikos është pozicionuar pozitivisht.
    “Thirren për një takim me Zëvendësministrin e Sportit, Jianis Vroutsis, pronarët e dy klubeve të basketbollit në Ministrinë e Arsimit, Fesë dhe Sportit, me qëllim që të jepen garanci të qarta se kjo situatë do të marrë fund. Në të kundërt, kampionati i këtij viti do të ndërpritet përfundimisht”, u shpreh zëdhënësi i qeverisë, Pavlos Marinakis. Presidenti dhe pronari i ekipit Panathinaikos, Dhimitrios Janakopulos, është parë të hyjë me forcë bashkë me truprojat e tij në ambientet e pallatit të sportit para fillimit të ndeshjes së dytë dhe më pas në terrenin sportiv, duke kërcënuar gjyqtarët që të ndërprisnin ndeshjen sepse tifozët e Olimpiakosit hidhnin sharje dhe kërcënime ndaj familjes së tij. Shumë video në mediat sociale pasqyrojnë këto çaste, por edhe sharjet e tij ndaj tifozëve kundërshtarë dhe kërcënimet ndaj dy vëllezërve presidentë të ekipit kundërshtar, Olimpiakosit.
    Të dy klubet e Athinës kanë një rivalitet të gjatë dhe shpesh të dhunshëm, që shtrihet në basketboll, futboll dhe sporte të tjera. Trazirat e fundit ndodhën pavarësisht përpjekjeve të qeverisë për të frenuar dhunën e lidhur me sportin, ku shpesh ka pasur edhe viktima – përfshirë sistemet e mbikëqyrjes në stadiume dhe biletimin e detyrueshëm të lidhur me kartat e identitetit. Olimpiakos dhe Panathinaikos morën pjesë muajin e kaluar në Final Four të EuroLeague në Abu Dhabi, duke u renditur përkatësisht në vendin e tretë dhe të katërt, ndërsa prej vitesh janë në majën e basketbollit europian. Organet greke kanë frikë se tensioni i krijuar mes presidentëve të ekipeve mund të shkaktojë incidente të dhunshme mes tifozëve fanatikë.