Banorët e Çërravës në Pogradec ngritën sërish sot një protestë në mbështetje të Kevi Muçollarit, i cili u arrestua një ditë më parë nga policia me akuzën e “goditjes për shkak të detyrës”.
Raportohet se banorët kërkojnë lirimin e bashkëfshatarit të tyre, duke thënë se ai është provokuar dhe se është goditur nga këshilltari Engjëll Shyti.
Ndër të tjera, banorët vijojnë të protestojnë edhe kundër vendimit të miratuar në mbledhjen e këshillit bashkiak, e cila u zhvillua mesditën e djeshme.
Banorët thonë se arrestimi i Kevi Muçollarit ishte politik dhe i padrejtë, pasi ai mbrojti dje sipas tyre të drejtat e banorëve.
“Unë kam qenë prezent në mbledhjen e bashkisë dhe reagimi i këshilltarit ishte i padrejtë. Nuk ishte ofendim se “legen” e themi gjithë ditën dhe s’ishte ofezë që këshilltari të reagonte në atë mënyrë. I kërkojmë prokurorit të çështjes që ta lirojë sa më shpejt të jetë e mundur Kevin. Kevi ishte në mbështetje të banorëve dhe për mendimin tim arrestimi ishte politik. S’ka të bëjë farë reagimi që tha “jeni legena”. Përderisa voton pro, ashtu je. Reagoi keq këshilltari duke u ngritur. Këshilltarët e tjerë nuk u ngritën, e pranuan ofezën. Nëse ai s’do ngrihej, nuk do ndodhte incidenti”, tha njëri nga protestuesit.
Kujtojmë se gjatë një mbledhjeje të Këshillit Bashkiak me prezencë të qytetarëve, Kevi Muçollari sulmoi fizikisht një prej anëtarëve të këshillit.
Sherri mes tyre nisi pas miratimit të listës së sipërfaqes së tokës prej 34.660 hektarësh në Çërravë, që mund të jepen me qira. Sipas dëshmitarëve, këshilltari Engjëll Shyti është ngritur nga tavolina dhe është konfrontuar fizikisht me Kevi Muçllarin, një prej përfaqësuesve të banorëve të Çërravës.
Pas incidentit, Kevi Muçllari foli për mediat, duke sqaruar se momenti i acarimit erdhi pas miratimit të vendimit dhe se ata u kërcënuan nga këshilltari Engjëll Shyti.
“Siç e patë edhe vetë pati një moment tensioni sepse Engjëll Shyti, këshilltar u ngrit dhe na kërcënoi për shkak të asaj që thashë unë, moment acarimi, tensioni. Kuptohet pas miratimit të vendimit që ne ishim totalisht kundër”, tha ai, ndërsa shtoi se situata ishte e qetë deri në momentin që kryetari i bashkisë i cilësoi kundërshtimet si “teka”.
Muçllari u shpreh se banorët dhe përfaqësuesit e tyre nuk do ta lënë çështjen me kaq, duke paralajmëruar ndjekje ligjore.
Çfarë deklaruan protestuesit
“Unë po protestoj sot si të gjithë shokët për të mbrojtur fshatin, mos venë panele diellore. Po i vunë ato, s’kemi ku vemë, mbaron fshati. Kevin ta lëshoni se ne do vazhdojmë të rrimë këtu, do shkojmë të protestojmë edhe në Pogradec.”
“Filli i kësaj proteste sot është për lirimin e djalit të fshatit tonë. Ai është arrestuar pa të drejtë. Kam qenë vetë prezent në këshillin bashkiak dhe ai është provokuar nga një këshilltar i bashkisë sepse në atë mbledhje u votua pro për çështjen e tokave të fshatit Çërravë që është çështje e stërzgjatur. Ne u acaruam por provokimi ishte nga vetë këshilltari i bashkisë. Këshilltari bëri të fortin e bashkisë duke u ngritur kundra nesh sepse ai është prej atyre të bashkisë, i paguar, i punësuar, kjo është e gjitha.”
Arbër Male, këshilltar i pavarur: “Sot bashkë me banorët e fshatit Çëravë po protestojmë për lirimin e Kevi Muçllarit i cili dje ishte në mbrojtje të të drejtës së pronave të aktiviteteve ekonomike të këtyre banorëve. Edhe pse ka qenë i provokuar nga një këshilltar pasi ka qenë duke ikur, arrestohet me urdhër politik. I bëj thirrje organeve ligjzbatuese të lirojnë menjëherë Kevi Muçllarin në të kundërt ne si anëtarë të KB dhe banorët do të jemi në mbrojtje të të drejtës së Kevit dhe të banorëve të Çëravës.”
