Sektori bankar ka vijuar rritjen me ritme të qëndrueshme edhe në tremujorin e tretë të vitit.
Të dhënat e paaudituara nga Shoqata Shqiptare e Bankave, mbështetur në Standardet Ndërkombëtare të Raportimit Financiar (IFRS), tregojnë se totali i aktiveve të sektorit në fund të muajit shtator arriti në afërsisht 2.222 trilionë lekë, në rritje me 60 miliardë lekë krahasuar me tremujorin e dytë.
Rritja vjetore e aktiveve të sektorit bankar ka vijuar me ritme të përafërta edhe gjatë tremujorit të tretë. Me bazë vjetore, totali i aktiveve të sektorit është në rritje me 8%.
Rritja e aktiveve krahasuar me një vit më parë është e përqendruar kryesisht në segmentin e huadhënies. Vlera neto e portofolit të kredisë kishte ishte rreth 881 miliardë lekë, në rritje me 11.9% krahasuar me të njëjtën periudhë të një viti më parë.
Megjithatë, të paktën në raportimin sipas IFRS, investimet në tituj janë bërë përsëri grupi i më i madh i aktiveve. Vlera e tyre në fund të shtatorit arriti në 886 miliardë lekë, në rritje me 7.4% krahasuar me një vit më parë.
Rritja e aktiveve vazhdon të mbështetet në rritjen me ritme me ritme të kënaqshme të depozitave të publikut. Në fund të shtatorit, depozitat arritën vlerën e 1.85 trilionë lekëve, në rritje vjetore me 9%.
Mbështetur në të dhënat paraprake të Shoqatës së Bankave, gjatë 12 muajve të fundit bankat me kapital vendas kanë vazhduar të zgjerojnë pjesën e tyre të tregut.
Pesë bankat me kapital shqiptar në fund të shtatorit zotëronin 37.6% të tregut, nga 36.6% që mbanin një vit më parë. Kontributin kryesor në zgjerimin e pjesës së tregut të bankave vendase e kanë dhënë Tirana Bank dhe Credins Bank.
Në nivel të bankave të veçanta, pjesa e tregut e bankës më të madhe në treg, Banka Kombëtare Tregtare (BKT), vazhdon të jetë në rënie. Në fund të tremujorit të tretë, BKT mbante 23.9% të tregut, nga 24.6% që zotëronte një vit më parë.
Credins Bank është vetmja mes pesë bankave më të mëdha që ka shënuar rritje të pjesës së tregut, në 16.6%, nga 16.2%, një vit më parë.
Pjesa e tregut të Raiffeisen Bank Albania ka ngelur e pandryshuar në 14.4%, po aq sa një vit më parë.
Edhe Intesa Sanpaolo ka zbritur në 9.8% të aktiveve të tregut, nga 10.2% një vit më parë.
OTP Albania ka rënë në 8.8%, nga 9% që zotëronte në të njëjtën periudhë të vitit 2024.
Pjesa e përbashkët e tregut e pesë bankave më të mëdha ka rënë në 73.5%, nga 74.4% që ishte një vit më parë.
Banka e gjashtë më e madhe renditet Tirana Bank, që është rritur në 7.9% (nga 7.2% një vit më parë). Vijon Banka Amerikane e Investimeve (ABI Bank), që mban 6.9% të tregut (nga 7% një vit më parë), Union Bank zotëron 5.1% të tregut, po aq sa një vit më parë, ndërsa Banka e Parë e Investimeve (Fibank) është rritur në 3.2% (nga 2.9% një vit më parë). ProCredit Bank Shqipëri është rritur në 2.4% të aktiveve të tregut (nga 2.3% që mbante një vit më parë, ndërsa Banka e Bashkuar e Shqipërisë (UBA) zotëron 1.1% të aktiveve të sektorit, po aq sa një vit më parë.
Tag: banka
-
Sektori bankar në rritje me 8%, bankat shqiptare zgjerojnë përsëri pjesën e tregut
-
“Skema e pensioneve në rrezik”, Banka Botërore: Ndikojnë emigrimi dhe nëndeklarimi i pagave! Deficiti do të rritet, investoni tek të rinjtë
Reformimi i skemës së pensioneve e cila po sfidohet nga numri i ulët i kontribuuesve, rënia e lindjeve dhe emigrimi, ishte në fokus të konferencës së Bankës Botërore mbi ‘Rishikimin e Politikave Fiskale’.
“Zgjedhjet që do të bëjë Shqipëria në ditën e sotme do të formësojnë të ardhmen e brezave të ardhshëm”, tha Massimiliano Paolucci, shefi i Bankës Botërore në Shqipëri.
Përveç numrit të ulët të punonjësve për të cilët paguhen sigurime, Banka Botërore ngre si shqetësim nëndeklarimin e pagave.
“Kur bëhet fjalë për tatimin e të ardhura personale, Shqipëria është mbrapa dhe arsyeja për këtë vjen për shkak të disa ndryshimeve strukturore të ekonomisë që lidhen me informalitetin, nëndeklarimin edhe përjashtimet. Shohim që pagesat për sistemin e pensioneve 85% janë kontribute, të tjerat vijnë nga të ardhurat e përgjithshme. Kjo është një sfidë për sa i përket qëndrueshmërisë së sistemit”, tha Angella Montfaucon, Ekonomiste e Lartë e Grupit të Bankës Botërore për Shqipërinë.
Banka botërore sugjeron të investohet më shumë në arsim, në zhvillim të kapitalit njerëzor, frenim të emigrimit si dhe të shikohet edhe vetë skema aktuale e pensioneve.
“Mbulesa është relativisht e mirë, por mjaftueshmëria është shumë e ulët. Për parashikimet e të ardhshmes. Kjo gjë do të vijë duke u përkeqësuar, sidomos duke pas parasysh aspektin migrator, deficiti në sistemin e pensioneve do të përkeqësohet duke garantuar që ne të investojmë tek të rinjtë të cilët të rriten dhe të arrijnë potencialin e tyre të plotë duke ju krijuar mundësitë dhe prindërve të tyre që kanë fëmijë të kthehen sërish në tregun e punës”, tha Montfaucon.
Këto sfida tha ministri i Financave Petrit Malaj, janë edhe prioritet i qeverisë shqiptare, dhe drejt tyre po orientohen edhe investimet.
“Korniza fiskale që do të ndërtojmë sot do të jetë ajo që do të vendosë të ardhmen e Shqipërisë për disa dekada. Do të përcaktojë aftësitë tona të investuar tek burimet njerëzore, për të mbështetur biznesin konkurrues, për të ndërtuar infrastrukturë të fuqishme dhe për të garantuar pensione dinjitoze”, tha Petrit Malaj, ministër i Financave.
Përtej këtyre sfidave Banka Botërore shprehet se ekonomia e Shqipërisë ka vijuar të rritet, e udhëhequr kryesisht nga turizmi dhe ndërtimi. -
Banka Kombëtare Tregtare feston 100-vjetorin e rrënjëve të saj me një mbrëmje gala në Teatrin Kombëtar të Operës, Baletit dhe Ansamblit Popullor
Banka Kombëtare Tregtare, institucioni financiar më i madh në vend, kremtoi 100-vjetorin e rrënjëve të saj me një mbrëmje gala organizuar në Teatrin Kombëtar të Operës, Baletit dhe Ansamblit Popullor. Në ceremoni morën pjesë Z. Ahmet Çalik, Kryetari i Bordit të Çalik Holding, aksionarit të vetëm të BKT dhe drejtues të tjerë, drejtues të Bankës së Shqipërisë dhe institucioneve financiare, partnerë vendas dhe ndërkombëtarë, trupën diplomatike, sipërmarrës, klientë dhe bashkëpunëtorë të bankës.
Rrënjët e Bankës Kombëtare Tregtare datojnë në vitin 1925 me themelimin e Bankës Kombëtare të Shqipnis, institucioni që krijoi sistemin e parë monetar kombëtar, ndërkohë që me emrin që mban sot banka ka nisur të operojë më 1 janar 1993, pas bashkimit të Bankës Shqiptare të Tregtisë dhe Bankës Kombëtare të Shqipërisë. Pas privatizimit të bankës në vitin 2000, një tjetër moment kyç në konsolidimin e saj ishte investimi i Çalık Holding, i cili në vitin 2006 bleu 60% të aksioneve të BKT-së për tu bërë aksionari i saj i vetëm në vitin 2009, duke vendosur themelet për zhvillimin, modernizimin dhe transformimin që e kanë pozicionuar BKT-në sot si lider të sistemit financiar shqiptar.
Në hapje të mbrëmjes u mbajtën fjalime përshëndetëse ku ai i mirëseardhjes për gjithë të ftuarit ishte nga Drejtori i Përgjithshëm dhe Anëtar i Bordit të BKT-së, z. Seyhan Pencabligil i cili tha se ndihet krenar për institucionin që ai drejton, banka më e madhe në vend që prej vitit 2014, një bankë e klasit botëror. Ai përmendi disa nga nismat e ndërmarra me rastin e këtij jubileu ku më e rëndësishmja është ajo e restaurimit dhe rinovimit të katër godinave historike të Bankës në qytetet Durrës, Elbasan, Korçë dhe Vlorë. Këto ndërtesa të ndërtuara në vitet ’20 shtoi ai janë një dëshmi e vizionit të themeluesve të bankës që e menduan bankën që do të ishte këtu për shumë vite dhe i ndërtuan të tilla që rezistuan 100 vjet dhe do të jenë këtu edhe për qindra vite të tjerë.
Mehmet Usta, Kryetar i Bordit të BKT u shpreh se “Banka Kombëtare Tregtare ka udhëhequr jetën ekonomike të Shqipërisë dhe është shndërruar në një simbol të zhvillimit, besimit dhe stabilitetit. Por mbi të gjitha, ajo është shembulli më i fortë i asaj se çfarë mund të arrijë një institucion kur arsyeja, puna dhe besimi bashkohen. “Sot BKT – tha ia – po ndërton një të ardhme të re mbi një trashëgimi të gjatë, ajo po lidh 100 vitet e historisë me inovacionin digjital, duke vendosur në qendër qëndrueshmërinë dhe kontributin në komunitet. Sot, mbi bazën e besimit të trashëguar nga e kaluara dhe përpjekjeve të përbashkëta, po vendosim themelet e një shekulli të ri dhe do të vazhdojmë të kontribuojmë për të ardhmen e Shqipërisë me të njëjtën vendosmëri.” Në fund të fjalës së tij ai falenderoi drejtuesit, punonjësit, klientët dhe partnerët e bankës për kontributin e tyre.
Guvernatori i Bankës së Shqipërisë, z. Gent Sejko, vuri në dukje rolin historik të institucionit që ai drejton dhe rrënjët e përbashkëta me BKT që prej vitit 1925. Ai u shpreh se: – “Një nga kontributet më të vlerësuara të BKT-së është edhe puna e saj në përfshirjen financiare: zgjerimi i aksesit në shërbime, besueshmëria në komunitet dhe edukimi i klientëve për përdorimin e instrumenteve bankare moderne. BKT-ja është gjithashtu një motor i rëndësishëm i inovacionit, me investime të mëdha në digjitalizim, në produkte moderne të pagesave dhe në shërbime bankare që lehtësojnë qasjen e qytetarëve në financë. Në shumë aspekte, banka ka qenë një ndër promotorët e tranzicionit të vendit drejt një ekonomie gjithnjë e më moderne dhe të orientuar drejt teknologjisë.
Programi artistik i mbrëmjes u konceptua si një udhëtim pa kohë mes të shkuarës, të tashmes dhe të ardhmes. Performuesit e mbrëmjes ishin sopranoja Marigona Qerkezi një nga zërat më të rëndësishëm të skenës ndërkombëtare operistike, baritoni i mirënjohur me famë botërore Gëzim Myshketa dhe violinisti virtuoz i njohur botërisht Olen Cesari të cilët performuan së bashku me Orkestrën Simfonike dhe Korin e Teatrit Kombëtar të Operës, Baletit dhe Ansamblit Popullor, nën drejtimin e maestros së mirënjohur Sergio Alapont. i njohur për interpretimet e tij të rafinuara dhe energjinë artistike që i jep jetë çdo performance. Ata sollën një program të përzgjedhur që ndërthurte mjeshtërisht traditën dhe modernen, me vepra nga kompozitorët shqiptarë Avni Mula, Pjetër Gaci, pjesë të njohura nga veprat e fuqishme operistike Tosca, Carmen dhe Maria Stuarda si edhe performanca elektrizuese në violinë nga muzika e filmit “Gladiatori” dhe “Tango Argjentine”. Udhëtimi në kohë u soll në skenë gjithashtu përmes një kolazhi vallesh tradicionale nga Ansambli Popullor dhe baleti kontemporan “Viceversa” nga balerinët e trupës së baletit të TKOBAP, me koreografi të Julind Dervishit si edhe një monolog nga artisti Indri Shiroka. Vizioni drejt së ardhmes u reflektua nëpërmjet një performance të balerinit të ri të talentuar Ergi Imeraj me koreografi të Donald Martinit. Të gjitha performancat u shoqëruan nga projeksione 360° që ofruan një përvojë të jashtëzakonshme shumë dimensionale për të ftuarit.
Në kuadër të këtij përvjetori, BKT përgjatë vitit 2025 ka përfunduar restaurimin e katër degëve të saj historike duke ruajtur identitetin e tyre arkitekturor, në qytetet Durrës, Elbasan, Korçë dhe Vlorë, një nismë shumë e rëndësishme në ruajtjen e trashëgimisë kulturore duke marrë parasysh që tre nga këto ndërtesa janë të shpallura monument kulture. Për më tepër është vijuar njëkohësisht edhe me transformimin e gjerë të rrjetit të degëve të BKT-së me qëllim përmirësimin e mëtejshëm të përvojës së klientit, ku tashmë më shumë se gjysma e tyrë operojnë me një model të ri të avancuar operacional dhe hapësira moderne. Në vijim të aktiviteteve të 100-vjetorit, BKT ka mbjellë gjithashtu 100 pemë rrapi në qytetet ku ndodhen degët historike, si simbol i vazhdimësisë, qëndrueshmërisë dhe lidhjes së bankës me komunitetin.
BKT është banka më e madhe në Shqipëri me një total aktivi prej rreth 7 miliardë dollarë në baza të konsoliduara grupi bankar në fund të dhjetorit 2024, duke zotëruar gjithashtu 25% të aseteve totale të sistemit bankar në Shqipëri. Ajo operon në Shqipëri nëpërmjet 62 degëve dhe agjencive dhe u shërben më shumë se 850,000 klientëve me produkte dhe shërbime novatore. Grupi BKT përfshin Bankën Kombëtare Tregtare Kosovë me 25 degë dhe Institucionin e Parasë Elektronike BKT Pay.
Në sajë të performancës së saj të lartë BKT është vlerësuar ndër vite me çmime të ndryshme prestigjioze si “Banka më e Mirë në Shqipëri” nga institucione të mirënjohura në nivel kombëtar dhe ndërkombëtar si The Banker, Global Finance, Euromoney, Emea Finance, Finance Central Europe etj. Vlerësime pozitive ka patur gjithashtu edhe nga agjenci të mirënjohura vlerësimi të kreditit si S&P Global Ratings dhe JCR Eurasia Rating apo banka korrespondente si Deutsche Bank. Aksionari i vetëm i bankës është Çalık Holding, themeluar në vitin 1981 në Stamboll që operon në sektorë të ndryshëm duke përfshirë atë të energjisë, ndërtimit, tekstileve, minierave dhe financës.Top Channel
-
Banka Kombëtare Tregtare feston 100-vjetorin, festë në Teatrin Kombëtar të Operës dhe Baletit
Banka Kombëtare Tregtare, institucioni financiar më i madh në vend, kremtoi 100-vjetorin e rrënjëve të saj me një mbrëmje gala organizuar në Teatrin Kombëtar të Operës, Baletit dhe Ansamblit Popullor.
Ceremonia mblodhi drejtues të aksionarit të vetëm Çalik Holding, drejtues të Bankës së Shqipërisë dhe institucioneve financiare, partnerë vendas dhe ndërkombëtarë, trupën diplomatike, sipërmarrës, klientë dhe bashkëpunëtorë të bankës.
Rrënjët e Bankës Kombëtare Tregtare datojnë në vitin 1925 me themelimin e Bankës Kombëtare të Shqipnis, institucioni që krijoi sistemin e parë monetar kombëtar, ndërkohë që me emrin që mban sot banka ka nisur të operojë më 1 janar 1993, pas bashkimit të Bankës Shqiptare të Tregtisë dhe Bankës Kombëtare të Shqipërisë.
Pas privatizimit të bankës në vitin 2000, një tjetër moment kyç në konsolidimin e saj ishte investimi i Çalık Holding, i cili në vitin 2006 bleu 60% të aksioneve të BKT-së për tu bërë aksionari i saj i vetëm në vitin 2009, duke vendosur themelet për zhvillimin, modernizimin dhe transformimin që e kanë pozicionuar BKT-në sot si lider të sistemit financiar shqiptar.
Në hapje të mbrëmjes u mbajtën fjalime përshëndetëse ku ai i mirëseardhjes për gjithë të ftuarit ishte nga Drejtori i Përgjithshëm dhe Anëtar i Bordit të BKT-së, z. Seyhan Pencabligil i cili tha se ndihet krenar për institucionin që ai drejton, banka më e madhe në vend që prej vitit 2014, një bankë e klasit botëror.
Ai përmendi disa nga nismat e ndërmarra me rastin e këtij jubileu ku më e rëndësishmja është ajo e restaurimit dhe rinovimit të katër godinave historike të Bankës në qytetet Durrës, Elbasan, Korçë dhe Vlorë. Këto ndërtesa të ndërtuara në vitet ’20 shtoi ai janë një dëshmi e vizionit të themeluesve të bankës që e menduan bankën që do të ishte këtu për shumë vite dhe i ndërtuan të tilla që rezistuan 100 vjet dhe do të jenë këtu edhe për qindra vite të tjerë.Mehmet Usta, Kryetar i Bordit të BKT u shpreh se “Banka Kombëtare Tregtare ka udhëhequr jetën ekonomike të Shqipërisë dhe është shndërruar në një simbol të zhvillimit, besimit dhe stabilitetit. Por mbi të gjitha, ajo është shembulli më i fortë i asaj se çfarë mund të arrijë një institucion kur arsyeja, puna dhe besimi bashkohen. “Sot BKT – tha ia – po ndërton një të ardhme të re mbi një trashëgimi të gjatë, ajo po lidh 100 vitet e historisë me inovacionin digjital, duke vendosur në qendër qëndrueshmërinë dhe kontributin në komunitet. Sot, mbi bazën e besimit të trashëguar nga e kaluara dhe përpjekjeve të përbashkëta, po vendosim themelet e një shekulli të ri dhe do të vazhdojmë të kontribuojmë për të ardhmen e Shqipërisë me të njëjtën vendosmëri.” Në fund të fjalës së tij ai falenderoi drejtuesit, punonjësit, klientët dhe partnerët e bankës për kontributin e tyre.
Guvernatori i Bankës së Shqipërisë, z. Gent Sejko, vuri në dukje rolin historik të institucionit që ai drejton dhe rrënjët e përbashkëta me BKT që prej vitit 1925. Ai u shpreh se: – “Një nga kontributet më të vlerësuara të BKT-së është edhe puna e saj në përfshirjen financiare: zgjerimi i aksesit në shërbime, besueshmëria në komunitet dhe edukimi i klientëve për përdorimin e instrumenteve bankare moderne.
BKT-ja është gjithashtu një motor i rëndësishëm i inovacionit, me investime të mëdha në digjitalizim, në produkte moderne të pagesave dhe në shërbime bankare që lehtësojnë qasjen e qytetarëve në financë. Në shumë aspekte, banka ka qenë një ndër promotorët e tranzicionit të vendit drejt një ekonomie gjithnjë e më moderne dhe të orientuar drejt teknologjisë.
Programi artistik i mbrëmjes u konceptua si një udhëtim pa kohë mes të shkuarës, të tashmes dhe të ardhmes. Performuesit e mbrëmjes ishin sopranoja Marigona Qerkezi një nga zërat më të rëndësishëm të skenës ndërkombëtare operistike, baritoni i mirënjohur me famë botërore Gëzim Myshketa dhe violinisti virtuoz i njohur botërisht Olen Cesari të cilët performuan së bashku me Orkestrën Simfonike dhe Korin e Teatrit Kombëtar të Operës, Baletit dhe Ansamblit Popullor, nën drejtimin e maestros së mirënjohur Sergio Alapont. i njohur për interpretimet e tij të rafinuara dhe energjinë artistike që i jep jetë çdo performance.
Ata sollën një program të përzgjedhur që ndërthurte mjeshtërisht traditën dhe modernen, me vepra nga kompozitorët shqiptarë Avni Mula, Pjetër Gaci, pjesë të njohura nga veprat e fuqishme operistike Tosca, Carmen dhe Maria Stuarda si edhe performanca elektrizuese në violinë nga muzika e filmit “Gladiatori” dhe “Tango Argjentine”. Udhëtimi në kohë u soll në skenë gjithashtu përmes një kolazhi vallesh tradicionale nga Ansambli Popullor dhe baleti kontemporan “Viceversa” nga balerinët e trupës së baletit të TKOBAP, me koreografi të Julind Dervishit si edhe një monolog nga artisti Indri Shiroka. Vizioni drejt së ardhmes u reflektua nëpërmjet një performance të balerinit të ri të talentuar Ergi Imeraj me koreografi të Donald Martinit. Të gjitha performancat u shoqëruan nga projeksione 360° që ofruan një përvojë të jashtëzakonshme shumë dimensionale për të ftuarit.
Në kuadër të këtij përvjetori, BKT përgjatë vitit 2025 ka përfunduar restaurimin e katër degëve të saj historike duke ruajtur identitetin e tyre arkitekturor, në qytetet Durrës, Elbasan, Korçë dhe Vlorë, një nismë shumë e rëndësishme në ruajtjen e trashëgimisë kulturore duke marrë parasysh që tre nga këto ndërtesa janë të shpallura monument kulture. Për më tepër është vijuar njëkohësisht edhe me transformimin e gjerë të rrjetit të degëve të BKT-së me qëllim përmirësimin e mëtejshëm të përvojës së klientit, ku tashmë më shumë se gjysma e tyrë operojnë me një model të ri të avancuar operacional dhe hapësira moderne. Në vijim të aktiviteteve të 100-vjetorit, BKT ka mbjellë gjithashtu 100 pemë rrapi në qytetet ku ndodhen degët historike, si simbol i vazhdimësisë, qëndrueshmërisë dhe lidhjes së bankës me komunitetin.
BKT është banka më e madhe në Shqipëri me një total aktivi prej rreth 7 miliardë dollarë në baza të konsoliduara grupi bankar në fund të dhjetorit 2024, duke zotëruar gjithashtu 25% të aseteve totale të sistemit bankar në Shqipëri. Ajo operon në Shqipëri nëpërmjet 62 degëve dhe agjencive dhe u shërben më shumë se 850,000 klientëve me produkte dhe shërbime novatore. Grupi BKT përfshin Bankën Kombëtare Tregtare Kosovë me 25 degë dhe Institucionin e Parasë Elektronike BKT Pay.
Në sajë të performancës së saj të lartë BKT është vlerësuar ndër vite me çmime të ndryshme prestigjioze si “Banka më e Mirë në Shqipëri” nga institucione të mirënjohura në nivel kombëtar dhe ndërkombëtar si The Banker, Global Finance, Euromoney, Emea Finance, Finance Central Europe etj. Vlerësime pozitive ka patur gjithashtu edhe nga agjenci të mirënjohura vlerësimi të kreditit si S&P Global Ratings dhe JCR Eurasia Rating apo banka korrespondente si Deutsche Bank. Aksionari i vetëm i bankës është Çalık Holding, themeluar në vitin 1981 në Stamboll që operon në sektorë të ndryshëm duke përfshirë atë të energjisë, ndërtimit, tekstileve, minierave dhe financës.Top Channel
-
“Shpëtoni pensionet! Ndryshoni skemën”, Banka Botërore: Mblidhni taksa nga qiraja, pronat, karboni dhe duhani”
Shqipëria rrezikon të ngadalësojë ritmin e zhvillimit nëse nuk thellon urgjentisht reformat fiskale. Është ky paralajmërimi që Banka Botërore jep në raportin e ri për financat publike.
Skema e pensioneve është një ndër sektorët prioritar sipas Bankës e cila po kthehet në e paqëndrueshme nga ngushtimi i raportit kontribues-përfitues.
“Perspektivat e rritjes ekonomike së Shqipërisë varen nga forcimi i kapitalit njerëzor, përmirësimi i infrastrukturës dhe avancimi i politikave klimatike për të përshpejtuar konvergjencën me BE-në, veçanërisht në kushtet e ndryshimeve demografike. Shqipëria mund të rrisë investimet tek njerëzit dhe të forcojë ekonominë duke rritur të ardhurat dhe duke shpenzuar më efikasitet.”, u shpreh Massimiliano Paolucci, Banka Botërore.
Raporti tregon se, ndonëse reformat e viteve të fundit kanë forcuar administratën tatimore, të ardhurat mbeten larg potencialit për shkak të informalitetit, mosdeklarimit të pagave.
Banka Botërore rekomandon ndërhyrje të drejtpërdrejta: formalizimin e qirave afatshkurtra, rivlerësimin e taksës mbi pronën sipas vlerës së tregut, taksën e karbonit për qymyrin dhe rritjen e taksave të duhanit në nivelin e BE-së. Këto masa mund të sjellin deri në 0.9 për qind të PBB-së shtesë në të ardhura.
Ministri i Financave vlerësoi rekomandimet e Bankës Botërore të cilat sipas tij do të ndihmojnë në hartimin e politikave më efikase.
“Kuadri fiskal që ndërtojmë sot do të formësojë të ardhmen e Shqipërisë për dekadat e ardhshme. Ne kemi bërë përparime të rëndësishme, por kërkohen reforma të thelluara dhe politika të koordinuara për të përmirësuar cilësinë dhe efikasitetin e financave publike”, deklaroi ministri i Financave, Petrit Malaj.
Në mbyllje, Banka Botërore thekson se Shqipëria ka njohur progres, por për të përshpejtuar konvergjencën me BE-në duhet disiplinë fiskale, reforma të qëndrueshme dhe investime më të mëdha te njerëzit dhe shërbimet publike.Top Channel
-
FMN shpreh shqetësim për rolin e Bankës Shqiptare të Zhvillimit
Fondi Monetar Ndërkombëtar (FMN) ka shprehur shqetësim për rreziqet e lidhura me krijimin e Bankës Shqiptare të Zhvillimit. Në deklaratën e fundit të misionit të FMN-së, thuhet se themelimi i Bankës Shqiptare të Zhvillimit do të shtojë kompleksitet të mëtejshëm për sektorin financiar në vend.
FMN gjykon se dispozitat rigoroze të qeverisjes dhe operacioneve do të jenë thelbësore për të parandaluar rreziqet e stabilitetit fiskal dhe financiar. Sipas FMN-së, aktivitetet e kësaj banke duhet të jenë të kufizuara në kohë dhe të synojnë dështimet e tregut për të shmangur pengimin e investimeve private.
Ligji “Për Bankën Shqiptare të Zhvillimit” u miratua në muajin mars, ndërsa themelimi i saj pritet të bëhet vitin e ardhshëm. Pjesëmarrja e Shtetit Shqiptar nuk do të jetë më e vogël se 51% e kapitalit të regjistruar të aksioneve në çdo kohë. Kapitali fillestar i kontribuar dhe i nënshkruar nga Shteti Shqiptar, do të jetë 10 miliardë lekë dhe do të shlyhet në këste brenda një afati katërvjeçar. Kësti i parë prej 1 miliard lekësh duhet të shlyhet brenda vitit 2026 dhe Qeveria e ka parashikuar në buxhetin e vitit 2026.
Përveç Shtetit Shqiptar, aksionet në Bankën e Zhvillimit mund të zotërohen nga institucione financiare ndërkombëtare, si banka dhe fonde zhvillimi e investimi europiane, institucione financiare ndërkombëtare dhe vendase të njohura, si dhe nga entitete të tjera të përcaktuara me vendim të Këshillit të Ministrave.
Sipas ligjit, Banka e Zhvillimit do të mund të mbledhë kursime kryesisht nga individët të cilëve nuk u ofrohet shërbim i plotë nga sistemi bankar. Kjo dispozitë ishte subjekt i rishikimeve në Kuvendin e Shqipërisë, pasi në variantin e propozuar nga qeveria, ai nuk përcaktonte kufizime për sa u takon subjekteve, duke lënë të hapur mundësinë për të mbledhur kursime edhe nga bizneset apo subjekte të tjera.
Gjithashtu, në ligj vendoset një kufizim për sasinë e kursimeve që Banka e Zhvillimit do të mund të mbledhë nga publiku. Shuma e pranuar e këtyre fondeve nga Banka Shqiptare e Zhvillimit nuk duhet të jetë më e lartë se 2% e Prodhimit të Brendshëm Bruto.
Ligji parashikon se aktiviteti i Bankës së Zhvillimit do të financohet me pranimin e fondeve të kthyeshme nga publiku, veçanërisht nga individët që nuk u ofrohet shërbim i plotë nga sistemi bankar, në formën e produkteve të kursimit, nëpërmjet një entiteti të veçantë të Postës Shqiptare.
Produktet e kursimit të mbledhura nga publiku do të garantohen me garanci shtetërore dhe përdoren për aktivitete promovuese.
Llojet e produkteve, karakteristikat e tyre, përfshirë kufizimet në vlerë, do përcaktohen me urdhër të përbashkët të ministrit përgjegjës për financat dhe të ministrit përgjegjës për ekonominë, duke respektuar kufijtë monetarë të përcaktuar në ligjin që rregullon sigurimin e depozitave. Kjo nënkupton se shuma e garantuar do të jetë e kufizuar. Sipas kuadrit ligjor në fuqi, depozitat bankare sigurohen deri në shumën e 2.5 milionë lekëve, ndërsa ato të shoqërive të kursim-kreditit deri në 2 milionë lekë.
Subjekti ndërmjetës për mbledhjen e fondeve të kthyeshme nga publiku do të jetë një entitet i veçantë i Postës Shqiptare. Këshilli i Ministrave do të përcaktojë me vendim kushtet kryesore të marrëdhënies ndërmjet entitetit të veçantë dhe Bankës Shqiptare të Zhvillimit.
Entiteti i veçantë i Postës Shqiptare dhe Banka Shqiptare e Zhvillimit do të nënshkruajnë një marrëveshje bashkëpunimi, e cila rregullon aspektet kryesore të funksionimit e të administrimit të fondeve të mbledhura dhe shpërndarjes së produkteve, minimalisht procedurat operacionale për shpërndarjen dhe administrimin e produkteve financiare; interesat e zbatueshëm për produktet financiare të ofruara; detyrimin për informimin e transparencën ndaj publikut mbi produktet.
Ligji parashikon gjithashtu si burime financimi linjat e kredisë nga institucionet financiare ndërkombëtare dhe përdorimin e instrumenteve të tjera financiare të garantuara, rast pas rasti, me garanci shtetërore, duke respektuar parimet e përcaktuara në ligjin që rregullon huamarrjen shtetërore. Emetimi i titujve të garantuar me garanci shtetërore nuk do t’u nënshtrohet parashikimeve të ligjit që rregullon tregjet e kapitalit.
Aktiviteti i mbledhjes së produkteve të kursimit, nëpërmjet një entiteti të veçantë të Postës Shqiptare, mbikëqyret nga Banka e Shqipërisë. Megjithatë, entiteti i veçantë i Postës Shqiptare, nuk do të jetë subjekt licencimi.
Ligji gjithashtu përcakton se Banka Shqiptare e Zhvillimit do të raportojë te Banka e Shqipërisë për qëllime statistikore dhe për Regjistrin e Kredive. Banka e Shqipërisë do përcaktojë, gjithashtu, metodologjinë e mbikëqyrjes së aktivitetit të mbledhjes së produkteve të kursimit, si dhe të raportimit statistikor.
Banka Shqiptare e Zhvillimit do të ketë si objektiv kryesor nxitjen e zhvillimit ekonomik, social e mjedisor, kryesisht përmes financimit dhe mbështetjes së sipërmarrjeve në sektorët e nënfinancuar të ekonomisë, si dhe përfshirjen në sistemin financiar të publikut, që nuk i ofrohet shërbim i plotë nga sistemi bankar.
Ajo do të ketë të drejtë të ushtrojë aktivitet financimi me karakter promovues, si kredidhënia për ndërmarrjet e vogla dhe të mesme, si dhe startup-et vendase, për të nxitur rritjen, produktivitetin, konkurrueshmërinë dhe zgjerimin në tregjet ndërkombëtare./Monitor -
Banka Evropiane paralajmëron: “Të përgatitemi për tronditje në sistemet financiare”
Bankat e eurozonës duhet të përgatiten për tronditje të papara që shkaktojnë ndërprerje serioze me pasoja të gjera për sistemet financiare, tha Banka Qendrore Evropiane të martën, duke përshkruar prioritetet e saj mbikëqyrëse për tre vitet e ardhshme.
BQE ka argumentuar prej kohësh se bankat po përballen me një realitet të ri me tronditje më të shpeshta, nga tarifat te sulmet kibernetike, duke kërkuar që ato të jenë të gatshme për një sërë mundësish pa e ditur natyrën e saktë të krizës së ardhshme, shkruan Reuters.
Kjo kërkon rezerva të shëndetshme kapitali, një infrastrukturë moderne teknologjike, menaxhim proaktiv që është në përputhje me realitetet financiare dhe shumë më tepër.
“Tensionet gjeopolitike dhe ndryshimet në politikat tregtare, krizat që lidhen me klimën dhe natyrën, ndryshimet demografike dhe ndërprerjet teknologjike po përkeqësojnë dobësitë strukturore, duke e bërë probabilitetin e ngjarjeve ekstreme dhe të pamundura jashtëzakonisht të lartë”, tha BQE në një deklaratë.
Prandaj, forcimi i qëndrueshmërisë së bankave ndaj rrezikut politik dhe pasigurisë do të mbetet një përparësi kryesore për mbikëqyrjen e BQE-së, me fokus në marrjen e kujdesshme të rrezikut dhe kapitalizimin e duhur, tha BQE. /tesheshi.com/ -
Rënia e interesave po ‘korrigjon’ në ulje fitimet e sektorit bankar
Rënia e normave të interesit po ul fitimet e sektorit bankar për këtë vit.
Të dhënat e paaudituara të bankave tregtare, sipas Standardeve Ndërkombëtare të Raportimit Financiar (IFRS), të publikuara nga Shoqata Shqiptare e Bankave, tregojnë se fitimi neto i sektorit për 9-mujorin 2025 kishte vlerën e 26 miliardë lekëve, në rënie me 8% krahasuar me të njëjtën periudhë të një viti më parë.
Ulja e normave bazë nga bankat qendrore, që filloi qysh vitin e kaluar, është reflektuar në kthimet prej instrumenteve financiare.
Treguesi kryesor benchmark për Euron, Euribori 12-mujor, në fund të 9-mujorit 2025 ishte pranë nivelit të 2.2%, nga 2.75% që kishte qenë një vit më parë.
Ndërsa yield-i mesatar i bonove 12-mujore në Lekë ka rënë në 2.57%, nga 3.11% që kishte qenë një vit më parë. Rënia e treguesve benchmark përcillet më tej edhe në normat e kredive me norma të ndryshueshme interesi të bankave tregtare, që përbëjnë edhe pjesën dërrmuese të portofolit të tyre.
Efekt i rënies së normave të interesit në vlerat e fitimeve është i dukshëm për pothuajse të gjitha bankat e sektorit. Nga 11 banka në treg, nëntë raportojnë ulje të fitimeve krahasuar me një vit më parë. Madje, dy prej tyre e kanë mbyllur 9-mujorin e parë me humbje.
Vetëm dy banka (Banka Amerikane e Investimeve dhe Banka e Parë e Investimeve Shqipëri) kanë arritur fitime më të larta krahasuar me 9-mujorin e parë të vitit të kaluar.
Banka më e madhe në vend, Banka Kombëtare Tregtare kryeson renditjen e fitimeve, me një rezultat neto prej 3.87 miliardë lekësh. BKT raporton një rënie të rezultatit financiar, me 8% më pak krahasuar me 9-mujorin e parë të vitit 2024.
Raiffeisen Bank renditet e dyta, me një rezultat neto në vlerën e 6.12 miliardë lekëve, por në rënie me 4% krahasuar me 9-mujorin e parë të vitit të kaluar.
Vijon, OTP Albania, me 3.63 miliardë lekë (7% më pak krahasuar me të njëjtën periudhë të një viti më parë); Banka Amerikane e Investimeve (ABI Bank), me 2.75 miliardë lekë (14% më shumë krahasuar me një vit më parë); Intesa Sanpaolo, me 2.28 miliardë lekë (14% më pak krahasuar me 9-mujorin 2024); Tirana Bank, me 2.08 miliardë lekë (pothuajse në të njëjtën nivel të një viti më parë); Credins Bank, me 1.26 miliardë lekë (11% më pak krahasuar me një vit më parë); Banka e Parë e Investimeve (Fibank), me 1.12 miliardë lekë (33% më shumë krahasuar me një vit më parë), Union Bank, me 1.04 miliardë lekë (24% më pak krahasuar me një vit më parë).
ProCredit Bank e ka mbyllur 9-mujorin me humbje në vlerën e 54 milionë lekëve, (kundrejt një fitimi 147 milionë lekë një vit më parë), ndërsa Banka e Bashkuar e Shqipërisë (UBA) raporton humbje në vlerën e 390 milionë lekëve, ndërsa një vit më parë raportonte fitim neto për 167 milionë lekë. Megjithatë, raportimet e UBA në të dyja rastet janë bërë sipas standardeve lokale të mbikëqyrjes, të Bankës së Shqipërisë dhe jo sipas IFRS-ve.
Për sa i takon kthimit nga kapitali aksionar, renditja kryesohet nga ABI Bank, me 29.49% (30.95% një vit më parë), e ndjekur nga Raiffeisen Bank, me 25.65% (29.67% një vit më parë); Fibank, me 22.12% (19.19% një vit më parë); OTP Albania, me 17.9% (23.93% një vit më parë); Tirana Bank, me 16.92% (21.2% një vit më parë); BKT, me 16.18% (19% një vit më parë); Union Bank, me 14.91% (23.56% një vit më parë); Intesa Sanpaolo, me 13.14% (14.45% një vit më parë); Credins Bank, me 6.74% (8.95% një vit më parë; ProCredit Bank, me -1.56% (4.59% një vit më parë) dhe UBA, me -20.29% (7.38% një vit më parë)./ Monitor.al
-
‘100-vjetori’/ Banka e Shqipërisë prezanton monedhën e re
Në konferencën e organizuar për 100 vjetorin e Bankës së Shqipërisë, guvernatori Gent Sejko ka prezantuar dhe një monedhë të re me rastin e këtij viti jubilar për këtë institucion.
Bëhet fjalë për një monedhë me vlerë 100 lekë, e cila sipas guvernatorit Sejko, nuk do të hidhet në treg por është përgatitur vetëm për këtë event.
“Është monedhë numizmatike pa kurs ligjor. Ku ka një djalë fshatar dhe Asdrenin. Në krahun tjetër është shenja e 100 vjetorit”, tha Sejko.
Banka e Shqipërisë ka të drejtën të emetojë kartëmonedha, monedha dhe medaljone për qëllime numizmatike. Ato përkujtojnë ngjarje dhe personalitete të rëndësishme.
Në vitin 1926 Banka Kombëtare e Shqipërisë shtypi për herë të parë një monedhë qarkullimi, e cila kishte edhe qëllime përkujtimore. Ajo ishte monedha 20 Franga Ar e vitit 1926 dhe përkujtonte “Paktin e Miqësisë dhe Sigurisë” që Italia dhe Shqipëria nënshkruan në vitin 1926.
Kartëmonedha e parë e qarkullimit, e cila kishte edhe qëllime përkujtimore ishte 20 Skënder i emetuar nga Katundaria e Korçës në 1921. Ajo përkujtonte konfirmimin e kufijve politiko-administrativë të Shqipërisë në Konferencën e Ambasadorëve në Paris (Lidhja e Kombeve), nëntor 1921.
-
Drejtoresha e FMN: Shqipëria, mes vendeve me rritjen ekonomike më të shpejtë në Europë
Një urim me rastin e 100-vjetorit të Bankës së Shqipërisë erdhi edhe nga Kristalina Georgieva, Drejtoresha e Përgjithshme e Fondit Monetar Ndërkombëtar. Ajo tha se ky përvjetor nuk është thjesht një rast për të festuar jetëgjatësinë e Bankës së Shqipërisë, por gjithashtu një testament i qëndrueshmërisë së institucionit dhe vizionit të tij.
Georgieva theksoi se ndër vite, banka qendrore në Shqipëri ka pasqyruar evoluimin e vetë shtetit shqiptar. Ajo u shpreh se vendi është përballur me goditje ekonomike, ndryshime politike dhe ndikime të zhvillimeve globale. Por sot, Shqipëria ndodhet mes shteteve me rritjen ekonomike më të shpejtë në europë dhe një rol kyç në këtë e ka pasur Banka e Shqipërisë.
“Sot Shqipëria renditet midis vendeve me rritjen ekonomike më të shpejtë në Europë. Bravo! Testament i progresit të palëkundur dhe qëndrueshmërisë së saj gjithnjë e në rritje. Në këtë arritje Banka e Shqipërisë ka luajtur një rol kyç. Falë angazhimit të palëkundur ndaj politikës monetare të qëndrueshme kuadrit rregullativ të kujdesshëm dhe transparencës institucionale”, tha drejtoresha e FMN-së.
Ajo theksoi se banka ka hedhur një themel të fortë për rritjen ekonomike dhe qëndrueshmërinë e vendit.
“Rrugëtimi i Shqipërisë na ofron një mësim kyç. Pavarësia e bankave qendrore është shumë më tepër se një teknikalitet formal. Ajo është gur themeli e qëndrueshmërisë kombëtare”, theksoi ajo.
Gjithashtu përmendi edhe sfidat e Shqipërisë në vijim që janë fragmentimi gjeopolitik në rritje, transformimi i shpejtë digjital, roli i inteligjencës artificiale dhe zhvendosje demografike. Georgieva nënvizoi se FMN-ja do vijojë të mbështesë Shqipërinë.
“Shqipëria është e vendosur t’i bashkohet BE dhe ka bërë përparime të qëndrueshme drejt këtij objektivi. Në këtë kontekst Banka e Shqipërisë ka një rol thelbësor, të përkushtuar dhe me vizion të qartë në këtë rrugë sfiduese për të mbështetur vendin në shfrytëzimin e mundësive që ofron anëtarësimi në një periudhë transforimi të thellë të ndryshimeve globale. FMN do vijojë të jetë partnere e palëkundur në këtë udhëtim, duke mbështetur Shqipërinë me këshilla”, tha ajo.