Një ngjarje e rëndë është shënuar në orët e para të mëngjesit në fshatin Gurëz, njësia administrative Fushë Kuqe, Kurbin, ku një sasi lënde plasëse ka shpërthyer pranë një banese.
Sipas njoftimit të Policisë së Shtetit, rreth orës 04:20, në portën e jashtme të murit rrethues të banesës së shtetases M. D. (alias M. B.) u hodh një lëndë plasëse e dyshuar si artizanale.
Burime pranë grupit hetimor bëjnë me dije se shënjestra e mundshme e këtij sulmi ka qenë këngëtari Jozi, një emër i njohur për publikun shqiptar. Për pasojë, porta e banesës u dëmtua lehtë, ndërsa fatmirësisht nuk raportohet për persona të lënduar.
Në vendngjarje mbërritën menjëherë forcat e policisë dhe grupi hetimor, të cilët nisën këqyrjen e perimetrit përreth. Gjatë kontrollit, hetuesit gjetën disa gëzhoja plumbash, të cilat sipas ekspertizës paraprake duken të vjetra, por megjithatë u sekuestruan si prova materiale.
Aktualisht, nën drejtimin e Prokurorisë, po kryhen veprime të thelluara hetimore për zbardhjen e plotë të ngjarjes, identifikimin e autorëve dhe dokumentimin ligjor të rastit. Policia ende nuk ka dhënë një version përfundimtar mbi motivet e shpërthimit, ndërsa ngjarja ka krijuar panik në zonë.









