Tag: bajram

Një furtunë e vërtetë duket se ka përfshirë Presidencën e Republikës pas vendimit të djeshëm të Gjykatës Kushtetuese që pezulloi dekretin e Presidentit Bajram Begaj për zgjedhjet në Bashkinë e Tiranës. Ky vendim trondit themelin e institucioneve, duke e vënë kreun e shtetit përballë akuzave të rënda për shkelje flagrante të Kushtetutës dhe abuzim me kompetencat. Juristët flasin për një krizë të paprecedentë kushtetuese, ndërsa opozita kërkon dorëheqjen e menjëhershme të Presidentit, duke e cilësuar veprimin e tij si “puç institucional” dhe “tradhti ndaj Kushtetutës”. Franc Nuri, këshilltar ligjor i Partisë Demokratike, deklaroi dje në një media se zgjedhjet e 9 nëntorit nuk mund të zhvillohen, pasi Begaj ka vepruar në kundërshtim të hapur me ligjin, duke dekretuar votime në një bashki ku ende nuk kishte përfunduar procesi i ankimimit të Erion Veliajt. “Kushtetuta e ka parashikuar mekanizmin e garancisë që Ti, t’i drejtohesh Gjykatës Kushtetuese.
Automatikisht thotë Kushtetuta. Në momentin që kryetari i bashkisë i cenuar në aspektin e tij personal në momentin e shkarkimit ankohet në Gjykatën Kushtetuese, automatikisht pezullohet vendimi i shkarkimit i marrë nga Kryeministri. Bajram Begaj si President i Republikës, ishte i detyruar të merrte për bazë gjithë çfarë kishte ndodhur dhe nuk mund ta injoronte pezullimin e shkarkimit të kryebashkiakut të Tiranës, por e tejkaloi këtë element sikur të mos ekzistonte. Shkeli me të dyja këmbët Kushtetutën Presidenti i Republikës, i këshilluar keq ndoshta nga këshilltarët e tij apo vet, do t’i mbetet atij ta sqarojë këtë pjesë”, deklaroi dje Nuri në një media. Në të njëjtën linjë, kreu i grupit parlamentar i PD, Gazment Bardhi hodhi akuza të forta ndaj Presidentit, duke e quajtur “klloun në Presidencë dhe ushtar të Edi Ramës”.
Ai kërkoi dorëheqjen e menjëhershme të Begajt, duke theksuar se “shkelja e Kushtetutës nga kreu i shtetit është më e rënda në 35 vitet e demokracisë”. “Kllouni në Presidencë u diskretitua sot në sytë e gjithë opinionit publik, duke u shpallur me vendim të Gjykatës Kushtetuese si ushtar i Edi Ramës. Nëse do kishte një grimcë dinjiteti sot do kishte dhënë dorëheqjen. Shkelje më të rëndë të Kushtetutës nuk ka kryer kurrë asnjë President në këto 35 vjet”, shkroi dje Bardhi në rrjetet sociale. Ndërkaq deputeti i Partisë Demokratike, Besart Xhaferri, në një media dje deklaroi se Presidenti Begaj është në shkelje kushtetuese, sipas tij si një “kukull” i përdorur nga kryeministri Rama.
Po ashtu, avokati Arbër Hoxha theksoi dje në një media se “S’do ketë zgjedhje pa u dhënë vendimi për ankimimin e Veliajt! Begaj mund të akuzohet për shpërdorim detyre”. Sakaq, Diplomati Agim Nesho theksoi dje në një media se Gjykata Kushtetuese ka marrë një vendim të drejtë pasi ishte në shkelje të hapur të Kushtetutës vendimi i Presidentit. “Ishim para një momenti që kjo Gjykatë Kushtetuese, ose do të pranonte hapur turpin, pasi Rama i sfidoi hapur. Arroganca dhe prepotenca e Ramës që është i gjithë shkaktari i të gjithë këtij çrregullimi dhe gjendje në Shqipëri, noterizimi i presidentit si një ushtar i mirë që do t’i bëjë qejfin shefit të tij, por nuk ka asnjë përgjegjësi për të mbrojtur Kushtetutën në rolin që ka”, theksoi Nesho.
Prapaskenat
Gjykata Kushtetuese, në një vendim të argumentuar gjerësisht dhe tashmë të botuar në Fletoren Zyrtare, theksoi se zbatimi i dekretit presidencial do të sillte pasoja të pariparueshme, pasi çështja e shkarkimit të Veliajt është ende nën shqyrtim. Vendimi i Gjykatës i ka dhënë një goditje të fortë Presidencës, ndërsa ekspertët ligjorë paralajmërojnë se nëse Prokuroria do të nisë hetimet, ku presidenti Begaj mund të përballet me akuzën e shpërdorimit të detyrës. Në skenën politike ka shpërthyer një debat i zjarrtë mbi legjitimitetin e vendimeve të Kreut të Shtetit, ndërsa burime nga Kuvendi nuk përjashtojnë mundësinë e nisjes së procedurave për shkarkimin e Presidentit nëse akuzat për shkelje të Kushtetutës vërtetohen.
Analistët politikë, juristët dhe konstuticionalistë, flasin për një “moment historik”, ku për herë të parë pas shumë vitesh, Gjykata Kushtetuese i vendos kufi prerë arrogancës institucionale të Presidencës. Në korridoret e politikës qarkullojnë zëra se kjo krizë mund të çojë në riformatimin e skenës politike dhe në një përplasje të re të ashpër midis Presidencës dhe Qeverisë. Skena po ngjason me një “luftë të ftohtë kushtetuese”, ku çdo lëvizje e Presidentit po monitorohet me lupë nga opozita, gjykatat dhe faktori ndërkombëtar. Në këto kushte, Presidenca ndodhet në izolim total, ndërsa vetë Begaj nuk ka reaguar publikisht ndaj vendimit që i pezullon dekretin.
Por një gjë është e qartë: Gjykata Kushtetuese ka folur me zë të fortë, dhe për shumëkënd, karriera institucionale e Bajram Begajt është në pikëpyetje. Opozita po përgatitet të kërkojë nisjen e procedurës së hetimit parlamentar dhe shkarkimit të presidentit Begaj nga detyra, ndërsa juristët paralajmërojnë se rasti mund të hyjë në historinë e shtetit shqiptar si skandali më i madh institucional pas 1991-shit. Megjithatë në fund, pyetja që po qarkullon në çdo korridor të politikës është e vetmja: A do të japë dorëheqjen Bajram Begaj përpara se të detyrohet nga ligji?
Reagon Begaj
Ndërkohë presidenti i Republikës, Bajram Begaj ka reaguar dje pas shpalljes së vendimit të Gjykatës Kushtetuese, e cila rrëzoi dekretin për zgjedhjet në Tiranë, të caktuara për tu zhvilluar në 9 nëntor. Dukshëm në panik nga shkarkimi, proces i nisur nga deputetët e PD-së dhe opozitës, pasi e quajtën shkelje të rëndë kushtetuese, dekretimin e zgjedhjeve të pjesshme për Bashkinë Tiranë, presidenti Begaj ka pranuar vendimin e Kushtetueses. Shkurt dhe pa asnjë shpjegim të mëtejshëm, si ai që sqaronte se përse i dekretoi zgjedhjet, Presidenca shkruan se kreu i shtetit e respekton vendimin e Kushtetueses. “Në përgjigje të interesit të mediave, ju bëjmë me dije se Institucioni i Presidentit të Republikës respekton vendimin e Gjykatës Kushtetuese për pezullimin e pjesës që përcakton datën e zgjedhjeve vendore në Bashkinë e Tiranës të dekretit me nr.350, datë 01.10.2025”, njoftoi dje Presidenca gjatë një reagimi për mediat.