Një ngjarje e rëndë ka ndodhur rreth mesnatës në fshatin Mbrostar Ura të Fierit, ku një 23-vjeçar ka plagosur babanë e tij pas një konflikti brenda banesës.
Shërbimet e Komisariatit të Policisë Fier janë njoftuar menjëherë dhe kanë mbërritur në vendngjarje për të ndaluar autorin.
Si rezultat, shtetasi Jashar Zyka është arrestuar dhe shoqëruar në komisariat, ndërkohë që babai i tij, 58-vjeçari Nexhmedin Zyka, ndodhet jashtë rrezikut për jetën dhe është nën kujdesin e mjekëve.
Njoftimi i plotë:
Shërbimet e Komisariatit të Policisë Fier, rreth mesnatës, sapo janë njoftuar se një shtetas kishte plagosur babanë e tij, në banesën e tyre, në fshatin Mbrostar Ura, kanë organizuar punën dhe kanë shkuar në vendngjarje, me qëllim kapjen e autorit.
Si rezultat i veprimeve të shpejta policore u kap dhe u vu në pranga, shtetasi Jashar Zyka, 23 vjeç.
Ai dyshohet se pas një konflikti me babanë e tij, shtetasin Nexhmedin Zyka, 58 vjeç, e ka plagosur atë, në këmbë, me një armë të modifikuar si armë sportive.
58-vjeçari është aktualisht në kujdesin e mjekëve dhe jashtë rrezikut për jetën.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
