Tag: avokatin

Avokati i Popullit duket se nuk do të jetë më monopol i opozitës, teksa mazhoranca mund të tërhiqet nga projekti fillestar për t’ia dhënë këtë institucion minorancës. Dje grupi parlamentar i Partisë Socialiste u mblodh për të shqyrtuar ngritjen e dy komisioneve të posaçme: një për Reformën Zgjedhore dhe një tjetër për Reformën Administrative Territoriale. Po ashtu u diskutua edhe për zgjedhjen e Avokatit të Popullit. Në një deklaratë për mediat, kryetari i grupit parlamentar socialist, Taulant Balla komentoi shpalljen e vakancës për Avokatin e Popullit, duke theksuar nevojën për një proces gjithëpërfshirës dhe larg ndikimeve politike. Ai shprehu dëshirën që ky pozicion të plotësohet brenda vitit, përmes një marrëveshjeje me opozitën.
Por shtoi se zgjedhja e Avokatit të Popullit do bëhet, me apo pa opozitën. “Përpjekjet e shumicës parlamentare tanimë në kufijtë e 3/5 është që t’i japim Shqipërisë një avokat populli edhe në vizion Shqipëria 2023, për t’i dhënë avokat popullit dikë që përmbush profesionalisht parashikimet që ka kushtetua për avokatin dhe  jo anëtar të një partie politike, por një përfaqësues i shoqërisë civile me kontribute në fushën sociale. I bëj thirrje të gjithëve kush përmbush kriteret për të aplikuar. Kësaj radhe nuk e kanë më të drejtën ta mbajnë peng zgjedhjet e avokatit të popullit. Të ndërtojmë së bashku një proces.
Jemi këtu në këtë situatë 3 vite me vonesë për zgjedhjet e avokatit të popullit për shkak të mungesës së dëshirës për t’u bërë pjesë e këtij procesi. Nuk e kanë më as mbajtjen peng se nëse opozita nuk do të bëhet pjesë, ne jemi të detyruar të zgjedhim Avokatin e Popullit. Shpresoj që të zgjidhet brenda krishtlindjeve. Ne do t’i japim Shqipërisë avokatin e popullit me shpresën që do ti japim një personalitet në fushën e të drejtave të njeriut”, deklaroi dje Balla.
PS shpall vakancën
Ndërkohë Komisioni Parlamentar për Çështjet Ligjore dhe Administratën Publike ka shpallur dje për herë të dytë vakancën për pozicionin e Avokatit të Popullit, duke hapur një afat 20-ditor për dorëzimin e dokumentacionit nga kandidatët e interesuar. Vendimi u mor vetëm me votat e deputetëve të Partisë Socialiste, ndërsa 5 përfaqësuesit e opozitës bojkotuan procesin, duke e cilësuar atë të paligjshëm dhe politikisht të motivuar. Sipas opozitës, nuk ka nevojë për një shpallje të re, pasi vakanca është shpallur që në legjislaturën e kaluar dhe procedura duhet të vazhdonte aty ku kishte mbetur. Në atë seancë, PD kishte kërkuar futjen urgjente në rendin e ditës të votimit për emërimin e Avokatit të ri të Popullit, duke propozuar kandidaturën e Besim Ndregjonit.
Kërkesa u injorua nga mazhoranca dhe çështja mbeti pezull. Kryetari i Komisionit të Ligjeve, Ulsi Manja, hodhi poshtë pretendimet e opozitës, duke thënë se firmat e mbështetjes së kandidaturave të mëparshme janë të pavlefshme, pasi disa nga deputetët e legjislaturës së kaluar nuk janë më pjesë e Kuvendit. Sipas tij, kjo e bën të domosdoshme nisjen nga e para të procesit. Nga ana tjetër, ky qëndrim interpretohet si përpjekje për të kontrolluar emërimin e një figure institucionale që duhet të jetë mbi palët dhe garant i të drejtave të qytetarëve.
Kujtojmë se Erinda Balanca e ka përfunduar mandatin që në maj 2022, por ka vazhduar të mbajë detyrën për më shumë se tre vite për shkak të mungesës së një zëvendësuesi të dakordësuar. Përveç shpalljes së vakancës për Avokatin e Popullit, komisioni miratoi me 13 vota edhe hapjen e procedurës për plotësimin e vakancës në Komisionin për Mbikëqyrjen e Shërbimit Civil. Opozita e konsideron këtë një tjetër provë se mazhoranca po uzurpon institucionet përmes kontrollit të procedurave dhe përjashtimit të zërave kundër.